ކޮމަންޑޫ ދާއިރާގެ އިންތިޚާބުގައި ވޯޓު ދޭންވީ އަމިއްލަ ފަސްގަނޑުގައި ދެވަނަ ދަރަޖައިގެ ރައްޔިތުންނަށް ނުވާންކަމަށް އިދިކޮޅޫ ޕީއެންސީގެ ރައީސް ޢަބްދުއްރަޙީމް ޢަބްދުﷲ (އަދުރޭ) ވިދާޅުވެއްޖެއެވެ. އަދުރޭ މިހެން ވިދާޅުވީ، ކޮމަންޑޫ ދާއިރާގެ ރައްޔިތުން ކުރިއަށް އޮތް މަޖިލިސް އިންތިޚާބުގައި ވޯޓު ދެއްވަންވީ ޑްރަގާއި، ބަޣާވާތާއި ދެކޮޅަށް ކަމުގައި ރައީސުލްޖުމްހޫރިއްޔާ އިބްރާހިމް މުހައްމަދު ޞާލިހު އިދިކޮޅަށް އިޝާރާތްކުރައްވާ ދެއްކެވި ވާހަކަފުޅުތަކަށް ދެއްވި ރައްދުގައެވެ.
އަދުރޭ ވިދާޅުވީ، ކޮމަންޑޫ ދާއިރާގެ އިންތިޚާބުގައި ވޯޓްލާންވީ ގައުމުގެ ޚާއިނުންނާ ޣައްދާރުންނާ ދެކޮޅަށްކަމަށެވެ. މި އިންތިޚާބުގައި ވޯޓުލާންވީ އަޅުވެތިކަމަށް ނޫނެކޭ ބުނުމަށާއި، ބާޠިލު ދީންތަކަށް ފުރުޞަތު ނުދިނުމަށާއި، ދީނާ މިނިވަންކަމުގެ ދިފާޢުގައިކަމަށްވެސް އަދުރޭ ވިދާޅުވިއެވެ. އަދި އިންތިޚާބުގައި ވޯޓު ދޭންވީ އަމިއްލަ ފަސްގަނޑުގައި ދެވަނަ ދަރަޖައިގެ ރައްޔިތުންނަށް ނުވާންކަމަށްވެސް އަދުރޭ ވިދާޅުވިއެވެ.
ކޮމަންޑޫ ދާއިރާގެ އިންތިޚާބުގައި ވޯޓް ލާންވީ ގައުމުގެ ޚާއިނުންނާ ޣައްދާރުންނާ ދެކޮޅަށް.އަޅުވެތިކަމަށް ނޫނެކޭ ބުނާން.ބާޠިލު ދީންތަކަށް ފުރުޞަތު ނުދޭން.ދީނާ މިނިވަންކަމުގެ ދިފާޢުގައި.އަމިއްލަ ފަސްގަނޑުގައި ދެވަނަ ދަރަޖައިގެ ރައްޔިތުންނަށް ނުވާން #MageyVoteRukah #Tick2 #IndiaOut pic.twitter.com/6PFfx2vPGy
— Abdul Raheem Abdulla (@Banafsaa) January 8, 2022
އަދުރޭ މިހެން ވިދާޅުވެފައިވާއިރު، ރޭ އިދިކޮޅަށް އިޝާރާތްކުރައްވާ ރައީސް ވިދާޅުވެފައިވަނީ ރާއްޖޭގައި ޑްރަގުގެ ވަބާއާއި ދެކޮޅަށް ސަރުކާރުން ކުރަމުންދާ މަސައްކަތަކީ އިދިކޮޅު ފަރާތްތަކަށް ކެތްވާވަރުގެ ކަމެއް ނޫންކަމަށެވެ. ޚާއްސަކޮށް މިސަރުކާރުން މިހާތަނަށް އަތުލައިގެން މަސްތުވާތަކެތީގެ ބޮޑެތި އަދަދުތަކަކީ އެކަމާއި ކަންބޮޑުވާނެ ބަޔަކު ތިބޭނެ ކަމެއްކަމަށާއި، ނަމަވެސް އެކަން ނުހުއްޓުވޭނެކަމަށެވެ.
މިޖަލްސާއަކީ އެމްޑީޕީގެ ޖަލްސާއަކަށްވުމުން ރައީސްވަނީ ސިޔާސީ ގޮތުން އިދިކޮޅު ފަރާތްތަކަށް ރައްދު ދެއްވައި ބަހުގެ ހަމަލާތައް ބަދަލު ކުރައްވާފައެވެ. ރައީސް ޞާލިހު ވިދާޅުވީ ލާމަރުކަޒީ ނިޒާމު ނުދަންނަ ބަޔަކަށް ރައްޔިތުން ވޯޓު ދިނުމަކީ ހެދޭނެ ގޯހެއްކަމަށެވެ. މަރުކަޒީ އުސޫލުން ކަންކަން ކުރަން ބޭނުންވާ ބަޔަކަށް ފަހުންވެސް އަތޮޅު ތެރޭގެ ރަށްތަކަށް ގެނެވޭނެ ތަރައްޤީއެއް ނޯންނާނެކަމަށެވެ. އެމަނިކުފާނު ވިދާޅުވީ އައިޖީއެމް އިމާރާތައި ޖެހިގެން އެމަނިކުފާނަށްވެސް 25 ބުރީގެ އިމާރާތެއް އެޅިދާނެކަމަށެވެ.
ނަމަވެސް ސަރުކާރުގެ ސިޔާސަތަކީ ރާއްޖޭގެ ފަސް ސަރަހައްދެއްގައި ޓާޝަރީ ފެންވަރުގެ ފަސް ހޮސްޕިޓަލު ތަރައްޤީކޮށް ލާމަރުކަޒީ އުސޫލުން ޞިއްޚީ ޚިދުމަތްވެސް ދިނުންކަމަށެވެ. ރައީސް ޞާލިހު ވަނީ މިރޭގެ ޖަލްސާގައި އިދިކޮޅު ކެނޑިޑޭޓުން މިއިންތިޚާބުގައި މަޑުކޮށްލައި، އެމްޑީޕީއަށް ޖާގަ ދިނުމަށް ގޮވާލާފައެވެ.
