ޑްރަގްގެ މައްސަލައާއި އެނޫންވެސް އިޖްތިމާޢީ މައްސަލަތައް ހައްލުކޮށްދެއްވާނީ ޕީޕީއެމްގެ ކެނޑިޑޭޓް މޫސާ ފަތުހީކަމަށް ޕީއެންސީގެ ނާއިބު ރައީސް އަދި މަޑުއްވަރީ ދާއިރާގެ މެންބަރު އާދަމް ޝަރީފް ޢުމަރު ވިދާޅުވެއްޖެއެވެ. އާދަމް ޝަރީފް މިހެން ވިދާޅުވީ، ކޮމަންޑޫ ދާއިރާގެ ރައްޔިތުން ކުރިއަށް އޮތް މަޖިލިސް އިންތިޚާބުގައި ވޯޓު ދެއްވަންވީ ޑްރަގާއި، ބަޣާވާތާއި ދެކޮޅަށް ކަމަށް އިދކޮޅު ފަރާތްތަކަށް އިޝަރާތްކުރައްވާ ރައީސް ރޭ ވިދާޅުވުމާއި ގުޅިގެންނެވެ.
ރައީސްގެ އެވާހަކަފުޅަށް ރައްދުދެއްވައި އާދަމް ޝަރީފް ވިދާޅުވީ، ކޮމަންޑޫ ދާއިރާގެ ބައި އިލެކްޝަންގައި ރައީސް އިބްރާހީމް މުޙައްމަދު ޞާލިޙް ވިދާޅުވިގޮތަށް ޑްރަގާއި ދެކޮޅަށް ވޯޓު ދޭންވާނީ ޕީޕީއެމް ކެންޑިޑޭޓް މޫސާ ފަތުހީއަށްކަން އެދާއިރާގެ އެންމެންނަށް ޔަޤީންވާނެކަމަށެވެ. އަލްއުސްތާޛް ފަތުހީއަކީ ޑްރަގާއި އެނޫންވެސް އެފަދަ އިޖްތިމަޢީ މައްސަތައް ހައްލުކުރުމަށް ނަމޫނާއެއްކަމަށްވެސް އާދަމް ޝަރީފް ވިދާޅުވިއެވެ.
ރޭ ރައީސް ޞާލިހު ވިދާޅުވީ ރާއްޖޭގެ ރައްޔިތުންނަކީ ފާއިތުވެދިޔަ ކައިރި މާޒީގައި ހިނގައިދިޔަ ކަންތައްތަކުގެ މަތީން ހަދާން ނެތޭނެ ބައެއް ނޫންކަމަށެވެ. މިއިންތިޚާބުގައި އެމްޑީޕީއާއި ވާދަކުރާ، އެމްއެންޕީއާއި، ޕީޕީއެމްއަށް އިޝާރާތްކޮށް ރައީސް ވިދާޅުވީ މިއީ ބަޣާވާތާއި، ޑްރަގާއި ދެކޮޅަށް ވޯޓުދޭންވީ ފަހަރު ކަމަށެވެ.
ރައީސް ވިދާޅުވެފައިވަނީ ރާއްޖޭގައި ޑްރަގުގެ ވަބާއާއި ދެކޮޅަށް ސަރުކާރުން ކުރަމުންދާ މަސައްކަތަކީ އިދިކޮޅު ފަރާތްތަކަށް ކެތްވާވަރުގެ ކަމެއް ނޫންކަމަށެވެ. ޚާއްސަކޮށް މިސަރުކާރުން މިހާތަނަށް އަތުލައިގެން މަސްތުވާތަކެތީގެ ބޮޑެތި އަދަދުތަކަކީ އެކަމާއި ކަންބޮޑުވާނެ ބަޔަކު ތިބޭނެ ކަމެއްކަމަށާއި، ނަމަވެސް އެކަން ނުހުއްޓުވޭނެކަމަށެވެ.
ރައީސްގެ ވާހަކަފުޅުގައި ވަނީ މިސަރުކާރުން ވެރިކަމަށް އައީ ވައުދުތައް ވެގެން ކަމަށާއި، ކުރިއަށް އޮތް ކޮމަންޑޫ ދާއިރާގެ ބައި އިލެކްޝަންގައިވެސް އެމްޑީޕީން ވެފައިވާ ވައުދުތައް ފުއްދުމަށް ޖާގަ ދިނުމަށްވެސް ގޮވާލައްވާފައެވެ.
ބައި އިލެކްޝަންގައި އެހެން ކެނޑިޑޭޓުން މަޑުކޮށްލައްވަން ރައީސް ޞަލިޙް އެދިވަޑައިގަތީ މަލްޓިޕާޓީ ޑިމޮކްރަސީގެ އަސާސްތަކާ އެއްގޮތަށް ސަރުކާރު ހިންގެވުމުގެ ބަދަލުގައި އޮޓޮކްރެޓިކް/ޑިކްޓޭޓަރޝިޕްގެ އުސޫލުން ކަންކަން ކުރެއްވުމަށް! އެއީ ޑިމޮކްރަސީއާއި ބީރައްޓެހިކަމެއް.
– އާދަމް ޝަރީފް ޢުމަރު
ރޭގެ ޖަލްސާއަކީ އެމްޑީޕީގެ ޖަލްސާއަކަށްވުމުން ރައީސްވަނީ ސިޔާސީ ގޮތުން އިދިކޮޅު ފަރާތްތަކަށް ރައްދު ދެއްވައި ބަހުގެ ހަމަލާތައް ބަދަލު ކުރައްވާފައެވެ. ރައީސް ޞާލިހު ވިދާޅުވީ ލާމަރުކަޒީ ނިޒާމު ނުދަންނަ ބަޔަކަށް ރައްޔިތުން ވޯޓު ދިނުމަކީ ހެދޭނެ ގޯހެއްކަމަށެވެ. މަރުކަޒީ އުސޫލުން ކަންކަން ކުރަން ބޭނުންވާ ބަޔަކަށް ފަހުންވެސް އަތޮޅު ތެރޭގެ ރަށްތަކަށް ގެނެވޭނެ ތަރައްޤީއެއް ނޯންނާނެކަމަށެވެ. އެމަނިކުފާނު ވިދާޅުވީ އައިޖީއެމް އިމާރާތައި ޖެހިގެން އެމަނިކުފާނަށްވެސް 25 ބުރީގެ އިމާރާތެއް އެޅިދާނެކަމަށެވެ.
ނަމަވެސް ސަރުކާރުގެ ސިޔާސަތަކީ ރާއްޖޭގެ ފަސް ސަރަހައްދެއްގައި ޓާޝަރީ ފެންވަރުގެ ފަސް ހޮސްޕިޓަލު ތަރައްޤީކޮށް ލާމަރުކަޒީ އުސޫލުން ޞިއްޚީ ޚިދުމަތްވެސް ދިނުންކަމަށެވެ. ރައީސް ޞާލިހު ވަނީ މިރޭގެ ޖަލްސާގައި އިދިކޮޅު ކެނޑިޑޭޓުން މިއިންތިޚާބުގައި މަޑުކޮށްލައި، އެމްޑީޕީއަށް ޖާގަ ދިނުމަށް ގޮވާލާފައެވެ.
