މަތި ކޮމަންޑޫ އާއި ކޮމަންޑޫ ގުޅާލާ ބްރިޖެގެ މަސައްކަތް ހަފްތާއެއްގެ ތެރޭ ފައްޓަވާނެ ކަމުގައި ރައީސުލްޖުމްހޫރިއްޔާ އިބްރާހިމް މުހައްމަދު ޞާލިހު ވިދާޅުވެއްޖެއެވެ.
ކޮމަންޑޫ ދާއިރާގެ ބައި އިލެކްޝަންގައި ވާދަކުރާ އެމްޑީޕީގެ ކެނޑިޑޭޓް ރާޝިދުގެ ކެމްޕެއިން އިފްތިތާހު ކުރުމަށް ބޭއްވި ޖަލްސާގައި ވާހަކަ ދައްކަވަމުން ރައީސުލްޖުމްހޫރިއްޔާ އިބްރާހިމް މުހައްމަދު ޞާލިހު ވިދާޅުވީ، މިސަރުކާރުން ކޮމަންޑޫ ދާއިރާއަށް ވެފައިވާ ވައުދުތައް ފުއްދުމަކީ މިސަރުކާރުން ކުރާނެ ކަމެއްކަމަށެވެ.
ރައީސް ވިދާޅުވީ ކޮމަންޑޫއަށް ދިމާވެފައިވާ ބުމުގެ ޖާގައިގެ ދަތިކަން ހައްލު ކުރުމަކީ މިސަރުކާރުން ވެފައިވާ ވައުދެއްކަމަށެވެ. އެވައުދު ފުއްދުމަށްޓަކައި، މިސަރުކާރުން މިފެށޭ ހަފްތާގައި މަސައްކަތް ފައްޓަވާނެކަމަށެވެ. އަދި މިއީ ކެމްޕެއިނަށް ނުފޫޒު ފޯރުވުންކަމަށް ވާދަވެރި ފަރާތްތަކުން ވިދާޅުވަމުން ދިޔަނަމަވެސް އެކަން ހުއްޓާލެވޭކަތް ނެތްކަމަށެވެ. އެކަންކަން ދާނީ ވަރަށް ބާރު ސްޕީޑުގައި ކުރިއަށް ކަމުގައި ރައީސް ވިދާޅުވިއެވެ.
އަޅުގަނޑުމެން މިކަން ފަށާތީ ވާދަވެރި ފަރާތްތަކުން ވިދާޅުވެދާނެ ކެމްޕެއިނަށް ނުފޫޒު ފޯރުވަނީއޭ. ނަމަވެސް އަޅުގަނޑު ދަންނަވާލަން އޮތީ، ނުފޫޒޭ ވިދާޅުވިޔަސް، މިރަށާއި، މަތި ކޮމަންޑޫ ގުޅާލުމުގެ މަސައްކަތް އިރާދަ ކުރެއްވިއްޔާ ހަފްތާއެއްގެ ތެރޭގައި ފަށާނަމޭ. އެކަން ތިިޔަބޭފުޅުންނަށް ފެނިގެންދާނެއޭ.
– ރައީސް ވިދާޅުވިއެވެ.
ރައީސް ވަނީ މިވައުދުގެ އިތުރުން ކޮމަންޑޫ، ފޯކައިދޫ، މަރޮއްޓަށް ގިނަ ވައުދުތަކެއް ވެވަޑައިގެންފައެވެ. ޚާއްސަކޮށް މިރޭ ވެ ވަޑައިގެންނެވި ގިނަ ވައުދުތައް މަދު ހަފްތާތަކެއްގެ ތެރޭގައި ފައްޓަވާނެކަމުގެ ޔަގީންކަން ރައީސް ވަނީ ދެއްވާފައެވެ. ރައީސް ވިދާޅުވީ މިކަންކަމަށް ކިތަންމެ ބޮޑެތި ފާޑުކިޔުންތަކެއް އަމާޒުވެ، ކެމްޕެއިންނަށް ނުފޫޒު ފޯރުވުންކަމަށް ވިދާޅުވި ނަމަވެސް ތަރައްޤީ މަޑު ޖައްސާލެވެން ނެތްކަމަށެވެ.
ރައީސް ވިދާޅުވީ ކޮމަންޑޫ ދާއިރާއަށް އެމްޑީޕީން ވެފައިވާ ވައުދު ފުއްދޭނީ ސަރުކާރުގެ ކެނޑިޑޭޓަކަށް ކަމަށެވެ. އެކަން އެހެން ވިސްނުމެއްގެ އެހެން ފިކުރެއްގެ ބަޔަކަށް ނުކުރެވޭނެކަމަށެވެ. މިޖަލްސާގައި ރައީސް ވަނީ ކޮމަންޑޫ ދާއިރާގެ ގޮނޑިއަށް މެމްބަރަކު ހޮވުމަށް ބާއްވާ އިންތިހާބުގައި ވޯޓުލާންވީ ބަޣާވާތާއި މަނީ ލޯންޑަރިންއާ ދެކޮޅަށް ކަމަށްވެސް ވިދާޅުވެފައެވެ. ސަރުކާރުން މިއަދު ޑްރަގާއި ދެކޮޅަށް ކުރަމުންދާ މަސައްކަތްތަކީ އިދިކޮޅު ފަރާތްތަކަށް ބަލައި ގަނެވޭނެ ކަމެއް ނޫންކަމަށާއި، އެކަން ހުއްޓާލެވެން ނެތްކަމަށް ރައީސް ވަނީ މިރޭގެ ޖަލްސާގައިވެސް ވިދާޅުވެފައެވެ.
މިޖަލްސާގައި ރައީސްވަނީ މިވީ ތިން އަހަރުގެ ތެރޭގައި ސަރުކާރުން ކޮށްދެއްވާފައި މުހިންމު ކަންތައްތައް ހިއްސާ ކުރައްވާފައެވެ. ޚާއްސަކޮށް ރައީސް ވަނީ ޕީއެފްއައިޕީގައި އެތައް ބިލިޔަނުން ޚަރަދު ކުރެވިފައިވާކަމަށް ވިދާޅުވެ އެކަމުގެ ތަފްސީލްވެސް ދެއްވާފައެވެ.
