އަންނަ މަހުގެ ފަސްވަނަ ދުވަހު ބޭއްވުމަށް ހަމަޖެހިފައިވާ ކޮމަންޑޫ ދާއިރާގެ ބައި އިލެކްޝަންގައި ވާދަކުރާ ޕާޓީތަކުގެ މެދުގައި އާންމުންގެ ޚިޔާލް ހޯދުމަށް ނެގުނު ފުރަތަމަ ޕޯލްގައި ބޮޑު ތަފާތަކުން ޕްރޮގްރެސިވް ޕާޓީ ޕީޕީއެމްއިން ކާމިޔާބު ކުރާނެކަމަށް ދައްކައިފިއެވެ.
ސައުވީސް ގަޑިއިރަށް ކުރިއަށް ގެންދިޔަ މި ޕޯލްގައި ވޯޓު ދިން މީހުންގެ ތެރެއިން 48.3 އިންސައްތަ މީހުން ގަބޫލުކުރާ ގޮތުގައި މިއިންތިޚާބު ކާމިޔާބު ކުރާނީ ޕީޕީއެމުންނެވެ. ވެރިކަން ކުރާ މައި ޕާތީ އެމްޑީޕީއަށް އިންތިޚާބު ކާމިޔާބު ވާނެކަމަށް ގަބޫލުކުރަނީ 27.6 އިންސައްތަ މީހުންނެވެ. އަދި މޯލްޑިވްސް ނޭޝަނަލް ޕާޓީއަށް މިއިންތިޚާބު ކާމިޔާބް ކުރެވޭނެކަމަށް ގަބޫލު ކުރަނީ 13.4 އިންސައްތަ މީހުންނެވެ. މި އިންތިޚާބުގައި 10.6 އިންސައްތަ މީހުން ބުނަނީ އެއްވެސް ޕާޓީއަކަށް އިތުބާރެއް ނެތްކަމަށެވެ.
ޚަބަރު އޮންލައިނުން މިއިންތިޚާބުގެ ދެން އޮންނަ ޕޯލްގައި ކުރިއަށް ގެންދާނީ ވަކިވަކި ކެނޑިޑޭޓުންނަށް ތާއީދު އޮތްގޮތެއް ބެލުމަށެވެ. ކޮމަންޑޫ ދާއިރާގެ ބައި އިލެކްޝަންގެ ކެމްޕެއިން ފޯރީގައި ކުރިއަށްދާއިރު، އިންތިޚާބުގައި އެންމެ ބޮޑަށް ވަދަކުރާނެ ކަމަށް މިހާރު ފެންނަ މަންޒަރުތަކުން ބެލެވެނީ އިދިކޮޅު ޕީޕީމްގެ ކެނޑިޑޭޓާއި، އެމްޑީޕީގެ ކެނޑިޑޭޓެވެ. މިއަދު ރައީސް ޞާލިހު ކޮމަންޑޫއަށް ވަޑައިގަތުމުން ކޮމަންޑޫއިން ވަނީ ހޫނު މަރުހަބާ އެއް ދަންނަވާފައެވެ.
އަދި ކޮމަންޑޫ ދާއިރާއަށް ޕީޕީއެމްގެ ކެނޑިޑޭޓް މޫސާ ފަތުހީ ވަޑައިގަތުުންވެސް ވަނީ އެރަށުން ވަރަށް ހޫނު މަރުހަބާއެއް ކިޔާފައެވެ. މިއިންތިޚާބަކީ ސަރުކާރަށް އޮތް ވަރަށް ބޮޑު ޓެސްޓަކަށްވާއިރު، އިންތިޚާބުގައި ވާދަކުރާ ކެނޑިޑޭޓުންގެ މެދުގައި ވާދަވެރިކަން ބޮޑުވެ ކެމްޕެއިން ދަނީ ވަރަށް ފޯރީގައި ކުރެވެމުންނެވެ.
ކޮމަންޑޫ ދާއިރާގެ ގޮނޑި ހުސްވެ، ބައި އިލެކްޝަނެއް ބާއްވަނީ އެ ދާއިރާ ތަމްސީލުކުރެއްވި އެމްޑީޕީގެ މެމްބަރު ޙުސެއިން ވަހީދު ކެންސަރު ބަލީގައި މިމަހުގެ 14 ވަނަދުވަހު ނިޔާވުމުންނެވެ. ކޮމަންޑޫ ދާއިރާގެ ގޮނޑީގެ ވާދަވެރިކަން ބޮޑުވެފައިވާއިރު ކުރިން އެ ދާއިރާ ތަމްސީލުކުރެއްވި ޙުސެއިން ވަހީދު އެ ގޮނޑި ކާމިޔާބުކުރެއްވީ 332 ވޯޓްގެ ތަފާތުންނެވެ. އެފަހަރު އޭނާއާއި އެންމެ ވާދަކުރީ ޕީއެންސީގެ ކެންޑިޑޭޓް އިބްރާހިމް ރަޝީދެވެ.
އަންނަ ފެބްރުއަރީ މަހުގެ 5 ވަނަދުވަހު އޮންނަ ބައި އިލެކްޝަންގައި 6 ވޯޓް ފޮއްޓެއް ބެހެއްޓުމަށް އިލެކްޝަންސް ކޮމިޝަނުން ވަނީ ނިންމާފައެވެ. މި ފޮށިތަކުގެ ތެރެއިން މާލޭގައި އުޅޭ އެ ދާއިރާގެ ރައްޔިތުން ވޯޓްލާން ޖެހޭ ފޮށި ހުންނާނީ އިންތިޚާބާއި ބެހޭ މަރުކަޒު ބާ ޖަމާލުއްދީނުގައެވެ.
އިލެކްޝަންސް ކޮމިޝަނުން މިހާރު ވަނީ ކޮމަންޑޫ ދާއިރާގެ ބައި-އިލެކްޝަންގައި ވޯޓު ދިނުމުގެ ހައްގު ލިބިފައިވާ މީހުންގެ ލިސްޓު އާންމުކޮށް ޝަކުވާ ހުށަހެޅުމުގެ ފުރުސަތު ހުޅުވާލާފައެވެ. އަދި މިއަދު ވަނީ ކޮމަންޑޫ ދާއިރާގެ ބައި އިލެކްޝަން މޮނިޓަރ ކުރަން ބޭނުންވާ ފަރާތްތަކަށް އެ ފުރުސަތު ވެސް ހުޅުވާލާފައެވެ. ކޮމަންޑޫއާއި ފޯކައިދޫ އަދި މަރޮށި ހިމެނޭ މި ދާއިރާގައި 3316 މީހުންނަށް ވޯޓްލުމުގެ ހައްޤު ލިބިގެންވެއެވެ.
