މާލޭގެ ރައްޔިތުންގެ ބޯހިޔާވަހިކަން ހައްލު ކޮށްދިނުމަށް މާލެ ސިޓީ ކައުންސިލުން އެކުލަވާލާފައިވާ ޕްލޭންއާއި އެއްގޮތަށް ރައްޔިތުންނަށް ފަސޭހައިން ބޯހިޔާވަހިކަން ލިބޭނެ ގޮތަކަށް ކަންކަން ފަހިކޮށްދެއްވުމަށް މާލެ ސިޓީގެ މޭޔަރު ޑރ.މުހައްމަދު މުއިއްޒު ސަރުކާރަށް ގޮވާލައިފިއެވެ.

މިއަދު ފެށުނު މީލާދީ އައު އަހަރުގެ ތަހުނިޔާ މާލެ ސިޓީ ރައްޔިތުންނަށް ފޮނުވައި މުއިއްޒު ދެއްވި ކުރު ވޯޑިއޯ މެސެޖްގައި ވިދާޅުވީ ކައުންސިލާއި ހަވާލުވެގެން މިވީ ކުރު މުއްދަތުގައިވެސް މާލޭގެ ރައްޔިތުންނަށް ދިމާވެފައިވާ މައްސަލަތަކަށް ހައްލު ހޯދުމަށް ގިނަ މަސައްކަތްތަކެއް ކޮށްފައިވާކަމަށެވެ.

ނަމަވެސް މާލޭގެ ރައްޔިތުންނަށް ކުރިމަތިވެފައިވާ އެންމެ ބޮޑު މައްސަލަތަކަށް ހައްލު ހޯދުމަށް ކުރިމަތިވާ ދަތިތަކާއިއެކު ގޮންޖެހުންތަކެއް ހުރިކަމަށެވެ. އެގޮތުން ބޯހިޔާވަހިކަމުގެ މައްސަލަ ހައްލުކުމަށް މާލޭ ރައްޔިތުންގެ ޚިޔާލާއި އެއްގޮތަށް ކައުންސިލުން ސަރުކާރުގައި އެދިފައިވާ ކަންކަމަށް އިޖާބަ ނުދިނުމަކީ ބޯހިޔާވަހިކަމުގެ މައްސަލަ ހައްލު ކުރުމަށް ކުރިމަތިވެފައިވާ ބޮޑު ގޮންޖެހުންމެއްކަމަށެވެ.

މުއިއްޒު ވިދާޅުވީ ސަރުކާރުން މިހާރުވެސް ކައުންސިލުން އެދޭގޮތަށް ގުޅިފަޅުގެ ޕްލޭން ބަދަލުކޮށް، މާލޭގެ ރައްޔިތުންނަށް ގޯތި ގެދޮރު ލިބޭނެ ގޮތަކަށް ފަހި ކުރުމަކީ ބޭނުންތެރި ކަމެއްކަމަށެވެ. އަދި ހުޅުމާލޭގެ ދެވަނަ ފިޔަވަހިން އަގުބޮޑުކޮށް ބިންވިއްކުން ކުރިއަށް ގެންދާނަމަ، އެއަށްވުރެއް އިސްކަން ދެއްވައިގެން މާލޭގެ ނިކަމެތި ރައްޔިތުންނަށް އަތްފޯރާފަށުން ގޯތި ލިބޭނެ ގޮތް ފަހިކޮށްދެއްވުމަކީ ކުރަންޖެހޭ ކަމަށެވެ.

ސަރުކާރުގެ ސިޔާސަތު އެކަމުގައި ކައުންސިލާއި އެއްހަމަ ކުރެވިއްޖިއްޔާ އެއީ ޔަގީނުންވެސް ހާސިލްވާނެ ކަމެއް. އަޅުގަނޑުމެން ސަރުކާރަށް މިއަދުވެސް އާއަހަރުގެ މި މުނާސަބަތުގައި ދަންނަވާލަން ބޭނުންވަނީ މާލޭގެ ރައްޔިތުންނަށް ކުިރމަތިވެފައިވާ އެންމެ ބޮޑު މައްސަލަ ކަމުގައިވާ ގެދޮރުގެ މައްސަލަ ހައްލު ކުރުމުގައި ކައުންސިލުން މިއެދޭ ގޮތަށް ސަރުކާރުން ހަމަޖައްސައި ދެއްވާށޭ.

– މުއިއްޒު ވިދާޅުވިއެވެ.

މީލާދީ އާ އަހަރާއި ގުޅިގެން މާލެ ސިޓީގެ މޭޔަރު ޑރ. މުޙައްމަދު މުޢިއްޒު ދެއްވާ ޚާއްސަ މެސެޖް. pic.twitter.com/xj3kehoA9P

— Male' City Council (@MaleCitymv) January 1, 2022

މުއިއްޒު ވިދާޅުވީ މާލެއަކީ ހިތްފަސޭހަ ތަނަކަށް ހެދުމަށް ކައުންސިލުން މިހާތަނަށްވެސް ގިނަ މަސައްކަތްތަކެއް ކޮށްފައިވާނެކަމަށެވެ. އަދި މިފެށޭ އާ އަހަރުގައި މާލޭގެ ރައްޔިތުންނަށް ދިމާވެފައިވާ މައްސަލަތައް ހައްލުކުރުމުގައި ކުރިމަތިވާ ހުރަސްއަކާއިއެކުގައިވެސް ކުރަންޖެހުނު ކޮންމެ ކަމެއް ކުރާނެކަމަށް މުއިއްޒު ވިދާޅުވިއެވެ.