މާލޭ ރައްޔިތުންނަށް ދިމާވެފައިވާ ބޯހިޔާވަހިކަމާއި ގޯތި ގެދޮރުގެ ދަތިކަމަށް ހައްލު ހޯދައި ދެއްވާނެ ކަމުގެ ޔަގީންކަން ރައީސުލްޖުމްހޫރިއްޔާ އިބްރާހިމް މުހައްމަދު ޞާލިހު ދެއްވައިފިއެވެ.
23 ރަށެއްގެ ވޯޓަރ އެންޑް ސްވަރޭޖް ޕްރޮޖެކްޓުގައި ސޮއިކުރުމަށް ބޭއްވި ރަސްމިއްޔާތުގައި ވާހަކަފުޅު ދައްކަވަމުން ރައީސުލްޖުމްހޫރިއްޔާ އިބްރާހިމް މުހައްމަދު ޞާލިހު ވިދާޅުވީ މާލޭގެ ރައްޔިތުންނަށް ދިމާވެފައިވާ ބޯހިޔާ ވަހިކަމުގެ މައްސަލަތަކަށް ހައްލު ހޯދައި ދިނުމަކީ މިސަރުކާރުން ކޮށްދޭނެ ކަމެއްކަމަށެވެ. މިހާރުވެސް މިމަސައްކަތް ކުރެވެމުންދާއިރު، ހުޅުމާލެއާއި، ގުޅިފަޅާއި، އެނޫން ފަޅުތަކުންވެސް މާލޭ ރައްޔިތުންނަށް ގޯތި ލިބޭނެ ގޮތެއް ހޯދައި ދެއްވާނެކަމުގެ ޔަގީންކަން ރައީސް ޞާލިހު ވިދާޅުވިއެވެ.
މިސަރުކާރުން މާލޭގެ ރައްޔިތުންގެ ބޯހިޔާވަހިކަމާއި، ގޯތި ގެދޮރުގެ މައްސަލައަށްވެސް ހައްލެއް ހޯދައިދޭނަން. މިހާރުވެސް ހުޅުމާލޭގައި 5،000 ހައުސިން ޔުނިޓް އެޅުމުގެ މަޝްރޫޢު ކުރިއަށް އެބަދޭ. މީގެ އިތުރުން މާލޭގެ ރައްޔިތުންނަށް ގޯތި ދިނުމުގެ މަޝްރޫއެއް ކުރިއަށް ގެންދިއުމަށް އަޅުގަނޑުމެން ރާވާފައި އެބައޮތް. އަޅުގަނޑުމެން ގޯތި ދޭނީ ގުޅިފަޅުން އެކަންޏެއްނޫން. ހުޅުމާލެއިންވެސް ގޯތި ދެވޭނެ. އަދި އެހެން ފަޅުތަކުންވެސް ލިބޭނެ. އަޅުގަނޑުމެން މިދައްކަނީ 1،000 ގޯތީގެ ވާހަކައެއްނޫން. އޭގެ ދެގުނަ ތިން ގުނަ، އިރާދަ ކުރެއްވިޔާ ހަތަރުގުނަ ގޯތި އިރާދަ ކުރެއްވިޔާ މާލޭގެ ރައްޔިތުންނަށް އަޅުގަނޑުމެން ފޯރުކޮށްދޭނަން.
– ރައީސް ޞާލިހު ވިދާޅުވިއެވެ.
ރައީސް ވިދާޅުވީ މާލޭގެ ރައްޔިތުންގެ ބޯހިޔާވަހިކަމާއި ގޯތި ގެދޮރުގެ މައްސަލަތަކުގެ ވާހަކަ ދައްކަވާ ބޭފުޅުން އެވާހަކަ ދައްކަމުންދަނީ ވަކި މަންފާތަކެއް ހާސިލް ކުރުމަށް ކަމަށެވެ. އަދި ޚާއްސަކޮށް ސަރުކާރުގެ ސިޔާސަތުތައް އެގިވަޑައި ގަންނަވާ ބޭފުޅުންވެސް އެވާހަކަ ދައްކަމުންދަނީ ވަކި މަންފާތަކެއް ހާސިލް ކުރުމަށް ކަމަށެވެ.
ރައީސް ވިދާޅުވީ މާލޭގެ ރައްޔިތުންނަށް ދިމާވެފައިވާ ބޯހިޔާވަހިކަމުގެ މައްސަލަ ހައްލު ކުރުމަށް މިހާރުވެސް ކުރިއަށްދާ މަސައްކަތްތައް ވީހާވެސް އަވަހަށް ނިންމުމަށްޓަކައި، މިމަސައްކަތް ހަވާލު ކުރައްވާފައިވާ ވަޒީރުންނާއި، ސިޔާސީ ބޭފުޅުން މަސައްކަތް ނިންމުމަށް ކަނޑައެޅިފައިވާ ތާރީހުތަކަށް މަސައްކަތް ނިންމުމަށް ބާރު އަޅަންޖެހޭކަމަށެވެ. ތާރީހުތަކަށް މަސައްކަތް ނިންމައި، މިމައްސަލައަށް ހައްލު ހޯދައިދެވޭނީ އޭރުންކަމަށް ރައީސް ވިދާޅުވިއެވެ.
ކުރިއަށް އޮތް 2 އަހަރުގެ ތެރޭގައި މުޅި ރާއްޖޭގެ އެކި ކަންކޮޅުތަކުގައި ބޯހިޔާވަހިކަމަށް ޚާއްސަކޮށް 1.2 ބިލިޔަން ރުފިޔާގެ މަޝްރޫޢު ހިންގުމަށް ވަނީ ހަމަޖެހިފައެވެ.
ސަރުކާރުން ކުރިއަށް ގެންދާ ބޯހިޔާވަހިކަމުގެ އެކި މަޝްރޫއުތަކުގެ ތެރެއިން ހުޅުމާލޭގައި ފަސް ހާސް ހައުސިން ޔުނިޓުގެ ތިން މަޝްރޫޢެއް މިހާރުވެސް ކުރިއަށް ގެންދެއެވެ. އަދި އިތުރު ބައެއް ކުދި މަޝްރޫޢުތަކުގެ 1000 ހައުސިން ޔުނިޓުގެ މަސައްކަތާއެކު ޖުމްލަ 6000 ހައުސިން ޔުނިޓުގެ މަސައްކަތް މިވަގުތު ކުރިއަށްދާކަމަށް ސަރުކާރުން ވަނީ ވިދާޅުވެފައެވެ.
ރާއްޖޭގެ ބޯހިޔާވަހިކަމަށް ދިމާވެފައިވާ މައްސަލަތަކަށް ހައްލެއް ހޯދައިދިނުމަށްޓަކައި ސަރުކާރުން އަންނަނީ މަސައްކަތްތައް ކުރަމުންނެވެ. މިގޮތުން ސަރުކާރުން ވަނީ 1.5 ބިލިޔަން ރުފިޔާގެ ހައުސިން މަޝްރޫޢޫތަކެއް ކުރިއަށްގެންދިޔުމަށް ނިންމާފައެވެ. އަދި އަންނަ އަހަރަށް ދަޢުލަތުން ހުށައެޅީ ބަޖެޓުގައި ވަނީ ނޭޝަނަލް ސޯޝަލް ހައުސިން މަޝްރޫޢުއަށް 449 މިލިޔަން ރުފިޔާ ޚަރަދު ކުރުމަށް ކަނޑައަޅާފައެވެ. މީގެ އިތުރުން އެފޯޑަބަލް ހައުސިން މަޝްރޫޢޫއަށް 57 މިލިޔަން ރުފިޔާ ކަނޑައަޅާ 94 މިލިޔަން ރުފިޔާ އެކި އަތޮޅުތަކުގައި ހައުސިން މަޝްރޫޢުތައް ގެންދިޔުމަށް ބަޖެޓުގައި ވަނީ ކަނޑައަޅަފައެވެ.
