އެންޓި-ކޮރަޕްޝަން ކޮމިޝަން، އޭސީސީގެ މެމްބަރުން ވަކިކުރުމަށް މަޖިލީހުގެ މިނިވަން މުއައްސަސާތަކާއި ބެހޭ ކޮމެޓީން ނިންމާފައިވަނީ، ކުރިމަތިވެ ނުފޫޒަށް ތަބާނުވެ، މިނިވަންކަމާއިއެކު މަސައްކަތްކުރާތީ ކަމުގައި އެންޓި ކޮރަޕްޝަން ކޮމިޝަންގެ މެމްބަރުން ބުނެފިއެވެ.

އޭސީސީގެ މަސައްކަތްތަކާއި ގުޅޭގޮތުން އޮޑިޓަރ ޖެނެރަލްގެ އޮފީހުން ކުރިއަށްގެންގޮސް އާންމުކޮށްފައިވާ ޕަރފޮމަންސް އޮޑިޓާ ގުޅޭގޮތުން ކޮމިޝަނުން ނެރުނު ބަޔާނެއްގައި ބުނެފައިވަނީ، އޮޑިޓު ރިޕޯޓުގައި އިސްލާހުކުރުމަށް ލަފާދީ، ފާހަގަކޮށްފައިވާ ކަންކަމަކީ، ކޮމިޝަނުގެ މަސައްކަތްތައް އެކި މަރުޙަލާތަކުގައި ހަރުދަނާކުރުމަށް ކުރެވެމުންދާ ކަންކަން ކަމަށްވެފައި، އެކަން އޮޑިޓަރުންނާ ހިއްޞާކޮށްފައިވާއިރު، މިހާރުވެސް އިޞްލާޙުކުރުމަށް ކޮމިޝަނުން ކުރަމުންދާ ނުވަތަ އިސްލާހުކޮށްފައިވާ މަސައްކަތްތަކެއް އަލުން އިޞްލާޙުކުރަން ލަފާ ދީފައިވަނީ ކޮން އަސާސެއްގެ މައްޗަށް ބިނާކޮށްފައިކަން، ރިޕޯޓުގައި ސާފެއް ނުވާކަމަށެވެ.

ކޮމިޝަނުގެ މަސްއޫލިއްޔަތު އަދާކުރުމުގައި އެންމެ އިސް ވާޖިބަކަށްވީ، ވަކި ފަރާތަކަށް ބުރަނުވެ ޖެހިލުންވުމެއް ނެތި މަސްއޫލިއްޔަތު އަދާކުރުން ކަމަށާއި، މިހާތަނަށް ކޮށްފައިވާ މަސައްކަތްތައް ވަޒަންކުރުމުންވެސް އެކަން ފެނިގެންދާނެ ކަމަށެވެ.

ސިޔާސީގޮތުން ވަކި ފަރާތަކަށް ބުރަ ނުވާކަމާއި، ކޮމިޝަނަށް ނުފޫޒު ނުފޯރުވޭނެކަން ވާނީ ސާބިތުކޮށްދީފަ. ކޮމިޝަނުގެ ތަޙުޤީޤުތައް ކުރިއަށްގެންދިއުމުގައިވެސް ވަކި ސިޔާސީ ވިސްނުމަކަށް ނުވަތަ ވަކި ފަރާތަކަށް ބެލުމެއްނެތި ތަޙުޤީޤުތައް ކުރިއަށްގެންގޮސް ނިންމުންތައް ނިންމާތީ އެކަމުގެ މަސްލަހަތު ހިމެނޭ ފަރާތްތަކުގެ ފާޑުކިޔުންތައް ކޮމިޝަނަށް ތަކުރާރުކޮށް އަމާޒުވޭ. އެފަދަ މީހުންގެ ސިޔާސީ މަސައްކަތްތައް ވަކި ޓާގެޓްތަކެއް ކަނޑައަޅައި ކޮމިޝަނާ ދެކޮޅަށް އަމާޒުކުރެވޭ. އަދި ނިޒާމުގެ އެތެރެއިންނާއި ބޭރުން އެކި ސިފަސިފައިގައި ކޮމިޝަނުގެ މަސައްކަތްތައް ފެއިލްކޮށްލުމަށް މަސައްކަތްކުރިތަން ފެނިގެންދިޔަ. ނަތީޖާއަކަށް ވެގެންދިޔައީ މި ކޮމިޝަނުގެ ދައުރުގައި ވޭތުވެމިދިޔަ 2 އަހަރު ތެރޭގައި ކޮމިޝަނުގެ މެމްބަރުންގެ އިތުބާރު ނެތްކަމުގެ ވޯޓު ނެގުމަށް ތަކުރާރުކޮށް މަސައްކަތް ކުރުން.

– އޭސީސީގެ ބަޔާނުގައި ބުނެފައިވެއެވެ.

އޭސީސީން ބުނެފައިވަނީ ރައްޔިތުންގެ މަޖިލީހުގެ މިނިވަން މުއައްސަސާތަކުގެ ކޮމެޓީގެ 50ވަނަ ބައްދަލުވުމުގައި، މި ކޮމިޝަނުގެ މެމްބަރުން އުސޫލާ ޚިލާފަށް މަސައްކަތްކުރާކަމަށް ބުނެ ހުށަހެޅުނު މައްސަލާގައި ކޮމެޓީގެ ޖަލްސާގައި، ކޮމިޝަނުގެ ފަރާތުން ކުރިއަށްގެންދާ ތަޙުޤީޤުތަކަށް އުސޫލާ ޚިލާފަށް މީހުން ހާޒިރުކުރާކަމަށާއި، ކޮމިޝަނުގެ މެމްބަރުންގެ ޖަލްސާތައް ކޯރަމް ހަމަނުވާގޮތަށް ކުރިއަށްގެންދާކަމަށް ކޮމެޓީގައި ފާހަގަކުރައްވާފައިވާކަމަށެވެ.

ކޮމިޝަނުގެ ޤާނޫނުގައި ކޮމިޝަނުގެ މަސްއޫލިއްޔަތެއްގެ ގޮތުގައި ތަޙުޤީޤުކުރުން ހިމެނޭއިރު، ކޮމިޝަނުގެ ތަޙުޤީޤުތައް ކުރިއަށް ގެންދިއުމުގައި ބަލަމުން ގެންދަނީ ކޮމިޝަނުގެ ޤާނޫނުނާއި، ޖިނާއީ އިޖުރާޢަތުގެ ޤާނޫނާއި، ކޮމިޝަނުގެ ތަޙުޤީޤު ކުރުމުގެ އިޖުރާއަތުގެ ގަވާއިދު އަދި އެހެނިހެންވެސް ގުޅުންހުރި ޤާނޫނުތަކާއި ގަވާއިދުތަކަށް ކަމަށާއި، ޤާނޫނުތަކާއި ގަވާއިދުތަކުގެ ތަރަހައިގެ ތެރެއިން ކޮމިޝަނުގެ ތަޙުޤީޤުތައް ހިނގަމުންދާނެކަން ކޮމިޝަނުން ކަށަވަރުކުރާނެ ކަމަށެވެ. އަދި ކޮމިޝަނުގެ ތަޙުޤީޤުތައް ހިންގުމުގެ އިޖުރާޢަތްތައް ފުރިހަމަކުރުން ބިނާކުރާނީ، މި ދެންނެވި ޤާނޫނީ ތަރަހައިގެ ތެރޭގައިކަމަށެވެ.

އެއްގޮތަކަށްވެސް ތުހުމަތުކުރެވޭ ފަރާތުގެ މަޤާމަށް ނުވަތަ ޙައިޞިއްޔަތަށް ބަލައިގެނެއް ނޫން ކަމަށާއި، އަދި، ކޮމިޝަނުން ކަމެއް ނިންމުމަށް ބޭނުންވާ ކޮމިޝަނުގެ ޤާނޫނީ ޢަދަދު ކޮމިޝަނުގެ ޤާނޫނުގައި ސާފުކޮށް ބަޔާންކޮށްފައިވަނިކޮށް، އެގޮތާ ކަނޑައެޅިގެން ޚިލާފަށް އެ ޖަލްސާގައި ފާޅުކުރެއްވި ޚިޔާލެއްގައި ފާހަގަކުރައްވާފައިވާތީ މިއީ ކޮމިޝަނުގެ ޤާނޫނީ މަސްއޫލިއްޔަތު އަދާކުރުމަށް ކޮމިޝަނުގެ ޤާނޫނުން ކަނޑައަޅާފައިއޮތް ގޮތް އޮޅޭގޮތަށް އަދި ކޮމިޝަނުން ކުރާ މަސައްކަތްތަކާމެދު ރައްޔިތުންގެ މެދުގައި ސުވާލު އުފެދޭ ގޮތަށް އެކަމަށް ފަރުވާލެއް ނެތި ފާހަގަކުރައްވާފައިވާ ކަމަކަށްވާތީ، އެކަމާމެދު ކޮމިޝަނުން ކަންބޮޑުވާކަމަށެވެ.

ކޮރަޕްޝަނާ ދެކޮޅަށް ކުރާ މަސައްކަތުގައި، އެ މަސައްކަތުގެ ތެދުވެރިކަން މިންކުރުމަށް ބޭނުންކުރެވޭ އެއް މިންގަނޑަކީ، އެ މަސައްކަތްކުރާ މީހުންނާމެދު ނަފްރަތުވެ، އެ މަސައްކަތް ނާކާމިޔާބު ކުރުވައި، އެ މަސައްކަތްކުރާ މީހުން ބަލިކަށިކޮށްލަން މަސައްކަތްކުރާ މީހުން ގިނަވުންކަމަށް މިބަޔާނުގައި ބުނެފައިވެއެވެ. އަދި ކުރިއަށް އޮތްތާގައިވެސް މަސައްކަތްކުރާނީ، ސިޔާސީގޮތުން ނުވަތަ އެނޫންވެސް ގޮތަކުން ނުފޫޒު ގަދަ ފަރާތަކަށް ނުލެނބި އަދި ބެލުމެއް ނެތިކަމަށް ވަނީ ބުނެފައެވެ.

އޭސީސީގެ މެންބަރުން ވަކިކުރުމަށް ގޮތެއް ނިންމުމަށް ބޭއްވި ކޮމިޓީގެ ބައްދަލުވުމުގައި ކޮމިޓީގެ ގިނަ މެންބަރުން ވިދާޅުވީ އޭސީސީއަށް ޖަވާބު ދާރީވުމަށް ފަސް ދުވަހުގެ މުއްދަތެއް ދިން ނަމަވެސް މެމްބަރުން ޖަވާބުދާރީވެފައިވަނީ އެމުއްދަތު ހަމަވިފަހުން ކަމަށެވެ. އަދި އޭސީސީގެ މެންބަރުން ކޮމިޓީއަށް ފޮނުއްވާފައިވާ ޖަވާބުގައި ފާހަގަކޮށްފައިވާ ގިނަ ކަންކަމަކީ މީގެ ކުރިންވެސް ކޮމިޓީއާއި ހިއްސާކޮށްފައިވާ ކަންތައް ކަމަށްވުމުން، އެއީ ގިނަ ހައްލުތަކެއް ހޯދައިދީފައިވާ ކަންކަން ކަމަށް މެންބަރުން ފާހަގަކުރެއްވިއެވެ. އެގޮތުން އޭސީސީއަށް އޮތް މުވައްޒަފުންގެ ދަތިކަމާއި، ބަޖެޓްގެ ދަތިކަމާއި، ޕީޖީއާމެދު އޮތް ނުތަނަވަސްކަމުގެ ވާހަކަތައް މެންބަރުން ފާހަގަކުރެއްވިއެވެ.

އޭސީސީގައި މިހާރު ތިއްބެވި ތިން މެންބަރުން ވަކިކުރުމަށް ކޮމިޓީން ފާސްކޮށްފައިވާއިރު، އެ ތިން މެންބަރުންނަކީ ކޮމިޝަނުގެ ރައީސް މަރިޔަމް ޝިއުނާއާއި، ނާއިބު ރައީސް ފާޠިމަތު އަނޫލާގެ އިތުރުން މެންބަރު ޢާއިޝަތު ޢަބްދުﷲ އެވެ. އޭސީސީގެ މެންބަރުން ވަކިކުރުމުގެ މަސައްކަތް މަޖިލީހުން ފަށާފައިވަނިކޮށް އެކޮމިޝަންގައި ހިމެނިވަޑައިގަންނަވާ 2 މެންބަރަކު ވަނީ އިސްތިއުފާ ދެއްވާފައެވެ. އެއީ އިބްރާހީމް ޝަކީލް އާއި އަލީ އަޝްރަފްއެވެ.

އޭސީސީގެ މެންބަރުން ވަކިކުރުމަށް ކޮމިޓީން ނިންމި ނިންމުން ދެން ފޮނުވާނީ މަޖިލީހުގެ ތަޅުމަށެވެ. އަދި ތަޅުމުން މި މައްސަލައަށް ގޮތެއް ނިންމުމަށް ދައުރުން ބޭރުން ޖަލްސާއެއް ބާއްވަން ވަނީ ކަނޑައަޅަފައެވެ.