ނަފްރަތު އުފެދޭ ކަންކަމާއި ދުރުވެ، ސުލްހަވެރި ސިޔާސީ ހަރަކާތުގައި ދެމިތިބުމަށް އެމްޑީޕީގެ ރައީސް އަދި މަޖިލީހުގެ ރައީސް މުހައްމަދު ނަޝީދު ގޮވާލައިފިއެވެ.

މިއަދު ފާހަގަ ކުރަމުންދާ ރާއްޖޭގެ އެއްބައިވަންތަ ކަމުގެ ދުވަހާއި ގުޅިގެން ރައީސް ނަޝީދު ކުރެއްވި ޓުވީޓެއްގައި ވިދާޅުވީ މިފަދަ ދުވަހެއްގައި ޤައުމުގައި ބައިބައިވުން އުފެދި ހަމަޖެހުން ގެއްލޭފަދަ ކަންކަމުން ދުރުވުމަށް އަޒުމް އާކުރަން ޖެހޭކަމަށެވެ. ނަފްރަތު އުފެދޭ ކަންކަމާއި ދުރުވެ، ސުލްހަވެރި ސިޔާސީ ހަރަކާތުގައި ދެމިތިބުމަކީ މިއަދު އަޒުމް އާކުރަންޖެހޭ ކަމެއްކަމަށް ރައީސް ނަޝީދު ވިދާޅުވިއެވެ.

2004 ވަނަ އަހަރުގެ ސުނާމީގެ ބިރުވެރި ހާދިސާއަށް ފަހު ރާއްޖޭގައި މިއަދުވެސް ފާހަގަ ކުރާންފެށީ ދިވެހިންގެ އެއްބައިވަން ކަމުގެ ދުވަސް ގޮތުގައި. އެމްޑީޕީއާއި އެމްޑީޕީގެ ވާދަވެރިންވެސް ބައިވެރިވުމާއި، ނަފްރަތު އުފެދޭ ކަންކަމާއި ދުރުވެ، ސުލްހަވެރި ސިޔާސީ ހަރަކާތުގައި ދެމިތިބުމަށް މިއަދު އަޅުގަނޑު ގޮވާލަން.

– ރައީސް ނަޝީދު ވިދާޅުވިއެވެ.

ރައީސް ނަޝީދު މިޓުވީޓުގައި މާނަކުރައްވަނީ އިދިކޮޅުން ހިންގަމުންދާ "އިންޑިއާ އައުޓް" ހަރަކާތަށް ކަމަށްބެލެވެއެވެ. ރައީސް ނަޝީދު ވަނީ އެހަރަކާތް ހުއްޓުވަމަށާއި، އެހަރަކާތް ހިންގޭނެ ޖާގަ ނުދިނުމަށް ފުލުހުންނަށް ރައީސް ނަޝީދު ވަނީ ގޮވާލާފައެވެ.

ސުނާމީގެ ރާޅު، ރާއްޖޭގެ 9ރަށެއް ފިޔަވާ ހުރިހާ ރަށަކަށް އެރިއެވެ. ޙާދިސާގެ ގެއްލުންތަކުގެ ސަބަބުން ޒަރޫރީ ބޭނުންތައް ނުފުދި ތިބި، 13 ރަށަކުން މީހުން ބާލަން ޖެހުނެވެ. މީގެތެރެއިން 4 ރަށެއް، މީހުންނަށް ދިރި ނޫޅެވޭވަރަށް ސުންނާފަތިވެ ފަޅުވިއެވެ. 15،000 މީހުންގެ ގެދޮރު ގެއްލި ޙާލުގައިޖެހުނެވެ.