ކޮމަންޑޫ ދާއިރާގެ ބައި އިލެކްޝަންގައި މޯލްޑިވްސް ތާރޑްވެ ޑިމޮކްރަޓިކް (އެމްޓީޑީ)އިންވެސް ވާދަކުރަން ނިންމާ ޕްރައިމަރީއަށް ހުލުވާލައިފިއެވެ.
ކޮމަންޑޫ ދާއިރާއަށް ވާދަކުރާނެކަން މީގެ ކުރިން އިންއުލާންކޮށްފައިވަނީ ވެރިކަންކުރާ މައި ޕާޓީ އެމްޑީޕީއާއި އިދކޮޅު ޕީޕީއެމް އާއި، އެމްއެންޕީ އިންނެވެ. އެމްޓީޑީ އިން ބުނީ ކޮމަންޑޫ ދާއިރާ ރައްޔިތުން މަޖިލީހުގެ ބައި-އިލެކްޝަންގައި ވާދަކުރުމުގެ ފުރުޞަތު އެމް.ޓީ.ޑީ އިން ހުޅުވާލާފައިވާކަމަށެވެ. ބައި އިލެކްޝަންގައި ވާދަކުރަން ބޭނުންފުޅުވާ ޕާޓީގެ މެމްބަރުން އެކަމަށް އެދުމުގެ ފުރުސަތު 27 ވާ ހޯމަ ދުވަހުގެ 17:00 އާއި ހަމަޔަށް ވަނީ ހުޅުވާލެވިފައިވާކަމަށާއި، މި އިލެކްޝަންގައި ބައިވެރިވުމަށް އެމް.ޓީ.ޑީގެ އީމެއިލް [email protected] އަށް މެއިލް ކުރުމަށް އެދޭކަމަށް ބުންޏެވެ.
ކޮމަންޑޫ ދާއިރާ ރައްޔިތުން މަޖިލީހުގެ ބައި-އިލެކްޝަންގައި ވާދަކުރުމުގެ ފުރުޞަތު އެމް.ޓީ.ޑީ އިން ހުޅުވާލުން. pic.twitter.com/QtRd8Fvxrc
— Maldives Third-Way Democrats (@MTDSecretariat) December 25, 2021
ކޮމަންޑޫ ދާއިރާގެ ބައި އިލެކްޝަން ޕްރައިމަރީ ވެރިކަންކުރާ މައި ޕާޓީ އެމްޑީޕީން ހުޅުވާލުމުން ވާދަކުރެއްވި ހަމައެކަނި ކެނޑިޑޭޓަކީ ށ.ފޯކައިދޫ ޔުނިވާސް، މުޙައްމަދު ރާޝިދެވެ. އެމްޑީޕީގެ އަސާސީ ޤަވާއިދު ހަމަޖެހިފައިވާ ގޮތުން އެއް ބޭފުޅަކު ކުރިމަތިލެއްވުމުން އޭނާއަށް ޕްރައިމަރީއަކާ ނުލައި އިންތިޚާބުގައި ވާދަކުރުމުގެ ފުރުސަތު ލިބިގެންދާނެއެވެ. މުޙައްމަދު ރާޝިދަކީ މިދިޔަ 3 ދައުރުގައިވެސް ފޯކައިދޫ ކައުންސިލްގެ ރައީސްކަން ކުރައްވައި މިހާރު ފޯކައިދޫ ކައުންސިލްގެ ސެކްރެޓަރީ ޖެނެރަލެއްގެ ގޮތުގައި ހުނެނެވި ބޭފުޅެކެވެ.
ކޮމަންޑު ދާއިރާގެ ބައި އިލެކްޝަންގައި އިދިކޮޅު ޕްރޮގްރެސިވް ކޮންގްރެސް ކޯލިޝަނުން ވާދަކުރާނެ ކެނޑިޑޭޓަކީ ކޮމަޑުއަށް އުފަން އަލްއުތާޒު މޫސާ ފަތުހީ އާދަމް ކަމަށް އެކޯލިޝަނުން ވަނީ ނިންމާފައެވެ.
ފަތުހީއަށް ޓިކެޓް ދީފައިވަނީ، އިދިކޮޅު ކޯލިޝަނުން ހުޅުވާލި ފުރުސަތުގައި އިތުރު މީހަކު ވާދަ ނުކުރުމުންނެވެ. ފަތުހީއަކީ ރައީސް ޔާމީންގެ ވެރިކަމުގައި ހޯމް މިނިސްޓްރީގެ ޑެޕިއުޓީ މިނިސްޓަރުކަންވެސް ކުރައްވާފައިވާ ބޭފުޅެކެވެ. އަދި ށ.އަތޮޅު އަތޮޅު ކައުންސިލްގެ ރައީސްކަންވެސް އޭނާ ވަނީ ކުރިން ކުރައްވާފައެވެ.
މޯލްޑިވްސް ނެޝެނަލް ޕާޓީ(އެމްއެންޕީ)އިން ކޮމަންޑޫ ދާއިރާގެ ބައި އިލެކްޝަނަށް ވާދަކުރާނީ ޕްރައިމަރީގައި ހަމައެކަނި ވާދަކުރެއްވި އަބްދުލް ހަންނާން އިދުރީސް ކަމަށް އެޕާޓީން ވަނީ ހާމަކޮށްފައެވެ. އަބްދުލް ހަންނާން އިދުރީސަކީ ތައުލީމީ ދާއިރާއަށް ގިނަ ޚިދުމަތްތަކެއް ކުރައްވާފައިވާބޭފުޅެކެވެ.
ކޮމަންޑޫ ދާއިރާގެ ބައި އިލެކްޝަނުގައި ކުރިމަތިލުމަށް ފުރުސަތު ހުޅުވާލާފައިވަނީ އެ ދާއިރާގެ މެމްބަރު ހުސެއިން ވަހީދު އަވަހާރަވުމުން އެދާއިރާގެ ގޮނޑި ހުސްވުމާ ގުޅިގެންނެވެ. ހުސެއިން ވަހީދު މަޖިލީހުގައި ކޮމަންޑޫ ދާއިރާ ތަމްސީލް ކުރައްވަމުން ދިޔައީ އެމްޑީޕީ ޓިކެޓުގައެވެ.
އިލެކްޝަންސް ކޮމިޝަނުންރި މިހާރުވަނީ ކޮމަންޑޫ ދާއިރާގެ ބައި-އިލެކްޝަނަށް ކުރިމަތިލުމަށް އެދޭ ބޭފުޅުންނަށް މި މަހުގެ 30ވާ ބުރާސްފަތި ދުވަހުގެ 15:00ގެ ނިޔަލަށް އެފުރުސަތު ހުޅުވާލައްވާފައެވެ.
