އަންނަ އަހަރުގެ ފެބްރުއަރީ މަހުގެ 5 ވަނަ ދުވަހު ބޭއްވުމަށް ހަމަޖެހިފައިވާ ކޮމަންޑު ދާއިރާގެ ބައި އިލެކްޝަންގައި މޯލްޑިވްސް ނޭޝަނަލް ޕާޓީގެ ފަރާތުން ވާދަ ކުރާނެ ކެނޑިޑޭޓަކަށް ކޮމަންޑޫ އަށް އުފަން އަބްދުލް ހަންނާން އިދުރީސްއަށް ދިނުމަށް އެ ޕާޓީން ނިންމައިފިއެވެ.
ހަންނާނަށް ޓިކެޓް ދީފައިވަނީ، އެމްއެންޕީން މިޓިކެޓަށް ހުޅުވާލުމުން އިތުރު ބޭފުޅަކު ވާދަ ނުކުރުމުންނެވެ. ހަންނާނަކީ ތައުލީމު ދާއިރާގައި ވަރަށް ގިނަ އަހަރުތަކަކު މަސައްކަތް ކުރެއްވުމަށްފަހު މިހާރު އަމިއްލަ ވިޔަފާރީގައި އުޅުއްވާ ބޭފުޅެކެވެ.
ކޮމަންޑޫ ދާއިރާގެ ބައި އިލެކްޝަން ޕްރައިމަރީ ވެރިކަންކުރާ އެމްޑީޕީން ހުޅުވާލުމުންވެސް ވާދަކުރީ އެންމެ ކެންޑިޑޭޓެކެވެ. އެމްޑީޕީން ޓީކެޓް ދީފައިވަނީ މުޙައްމަދު ރާޝިދު، ޔުނިވާސް، ށ.ފޯކައިދޫއެވެ. އެމްޑީޕީގެ އަސާސީ ގަވާއިދު ހަމަޖެހިފައިވާ ގޮތުން އެއްބޭފުޅަކު ކުރިމަތި ލުމުން އޭނާއަށް ޕްރައިމަރީއަކައި ނުލައި އިންތިޚާބުގައި ވާދަކުރުމުގެ ފުރުސަތު ލިބިގެންދާނެއެވެ.
ކޮމަންޑޫ ދާއިރާގެ ބައި އިލެކްޝަނުގައި ކުރިމަތިލުމަށް ފުރުސަތު ހުޅުވާލާފައިވަނީ އެ ދާއިރާގެ މެމްބަރު ހުސެއިން ވަހީދު އަވަހާރަވުމުން އެދާއިރާގެ ގޮނޑި ހުސްވުމާގުޅިގެންނެވެ. ހުސެން ވަހީދު މަޖިލީހުގައި ކޮމަންޑު ދާއިރާ ތަމްސީލް ކުރައްވަމުން ދިޔައީ އެމްޑީޕީ ޓިކެޓުގައެވެ.
ކޮމަންޑޫ ދާއިރާގެ ބައި-އިލެކްޝަންގައި ވާދަކުރާނެކަމަށް ޝައުގުވެރިކަން ފާޅުކޮށްފައިވާ ޕާޓީތަކީ އެމްޑީޕީއާއި، އިދިކޮޅު ޕީޕީއެމްގެ އިތުރުން، އެމްއެންޕީންނެވެ.
އިލެކްޝަންސް ކޮމިޝަނުން މިއަދު ކުރި އިއުލާނެއްގައިވަނީ ކޮމަންޑޫ ދާއިރާގެ ބައި-އިލެކްޝަނަށް ކުރިމަތިލުމަށް އެދޭ މީހުންނަށް އެ ފުރުސަތު މިއަދު ހެނދުނު 8:30އިން ފެށިގެން މި މަހުގެ 30 ވާ ބުރާސްފަތި ދުވަހުގެ 15:00 ގެ ނިޔަލަށް ހުޅުވާލާފައިވާ ކަމަށެވެ.
