ފެބްރުއަރީ 5، 2022ގައި ބޭއްވުމަށް ހަމަޖެހިފައިވާ ށ. ކޮމަންޑޫ ދާއިރާގެ ބައި އިލެކްޝަންގައި މޯލްޑިވްސް ނެޝަނަލް ޕާޓީގެ ކެމްޕެއިން މަސައްކަތްތަކުގައި ވޮލެންޓިއަރުންގެ ގޮތުގައި މަސައްކަތް ކުރާނެ ފަރާތްތަކަށް އެފުރުސަތު ހުޅުވާލައިފިއެވެ.

އެމްއެންޕީން ބުނެފައިވަނީ ވޮލެންޓިއަރުންގެ ގޮތުގައި ކޯލް ސެންޓަރ، ދޮރުން ދޮރަށް، އެޑްމިނިސްޓްރޭޝަން، ޑޭޓާ މެނޭޖްމެންޓް، ލޮގިސްޓިކްސް، ޓްރާންސްޕޯޓް އަދި އިލެކްޝަންސް މޮނިޓަރ/އޮބްޒަރވާއެއް ގޮތުގައި މަސައްކަތް ކުރެވިދާނެ ކަމަށެވެ.

މިގޮތުން ވޮލެންޓިއަރއެއް ގޮތުގައި މަސައްކަތް ކުރަން ޝައުގުވެރިވާ ފަރާތްތަކުން https://bit.ly/MNPVolunteer ލިންކަށް ވަޑައިގެން ފޯމު ފުރުއްވުމަށްވަނީ އެދިފައެވެ. އަދި ކަމުގަ އިތުރު މައުލޫމާތު ބޭނުންފުޅުވާނަމަ 9708080 އަށް ގުޅުމުން މައުލޫމާތު ސާފުކުރެވުމަށްވެސް ވަނީ އެދިފައެވެ.

ހުސްވެފައިވާ 19 ވަނަ ރައްޔިތުންގެ މަޖްލީހުގެ ށ. ކޮމަންޑޫ ދާއިރާގެ ގޮނޑިއަށް މޯލްޑިވްސް ނެޝަނަލް ޕާޓީގެ ފަރާތުން ވާދަކުރުމަށް ވަނީ ނިންމާފައެވެ. ށ. އަތޮޅު ކޮމަންޑޫ، މަރޮށި އަދި ފޯކައިދޫގެ މައްޗަށް އެކުލެވޭ މިދާއިރާގެ ބައި އިލެކްޝަން ބާއްވަން ޖެހުނީ އެދާއިރާއަށް އިންތިހާބު ވެވަޑައިގެން ހުންނެވި މެންބަރު ހުސައިން ވަހީދު އަވަހާރަ ވުމާ ގުޅިގެންނެވެ.

މިމަހުގެ 19 ވަނަ ދުވަހު ބޭއްވި އެމްއެންޕީގެ ނޫސްވެރިންގެ ބައްދަލުވުމުގައި ޕާޓީގެ ރައީސް ކާނަލް (ރޓޑ) މުހައްމަދު ނާޒިމް ވަނީ އެމްއެންޕީއިން ކޮމަންޑޫ ދާއިރާއަށް ވާދަކުރައްވާނެކަން އިއުލާން ކުރައްވާފައެވެ. ކޮމަންޑޫ ދާއިރާއަށް އެމްއެންޕީގެ ފަރާތުން ވާދަކުރައްވަން ބޭނުންވާ ފަރާތްތަކަށް ވަނީ މިހާރު އެފުރުސަތު ހުޅުވާލެވިފައެވެ.

ހަމައެއާއެކު ށ. ކޮމަންޑޫ ދާއިރާގެ ބައި އިލެކްޝަންގައި މޯލްޑިވްސް ނެޝަނަލް ޕާޓީއަށް ވޮލިންޓިއަރުން ހޯދުމަށްވެސް މިއަދު ވަނީ އިޢުލާންކޮށްފައެވެ. މިދާއިރާގެ ބައި އިލެކްޝަންގައި މޯލްޑިވްސް ނެޝަނަލް ޕާޓީގެ ކެމްޕޭނުގައި ވޮލަންޓިއަރުންގެ ގޮތުގައި މަސައްކަތް ކުރައްވަން ބޭނުންވާ ފަރާތްތަކުން ޕާޓީގެ ވެބްސައިޓުގައިވާ 'އިލެކްޝަން ވޮލަންޓިއަރ' ފޯމު ފުރިހަމަކުރުމަށްފަހު ހުށައެޅޭނެއެވެ.

ބައި އިލެކްޝަންގައި ވާދަކުރަން ބޭނުންފުޅުވާ އެމްއެންޕީގެ މެމްބަރުން އެކަމަށް އެދޭ ފޯމް ފުރިހަމަކޮށް، ފޯމާއެކު ހުށައަޅަންޖެހޭ ލިޔެކިޔުންތަކާއެކު، 23 ޑިސެމްބަރ 2021 ވާ ބުރާސްފަތި ދުވަހުގެ 17:00 ކުރިން އެމްއެންޕީގެ އޮފީހަށް ހުށަހެޅުމަށް ވަނީ އިއުލާން ކުރެވިފައެވެ. ޕާޓީގެ ފަރާތުން މިއިންތިހާބުގެ ޕްރައިމަރީއެއް ބާއްވަންޖެހޭ ހާލަތެއްގައި، ވޯޓްލުން ކުރިއަށްދާނީ 28 ޑިސެމްބަރ 2021 ވާ (ބުދަ) ދުވަހު ހެނދުނު 10:00 ން ހަވީރު 17:00 އަށް ކޮމަންޑޫ ދާއިރާގެ ރަށްރަށުގެ އިތުރުން މާލޭގެ އެމް.އެން.ޕީ އޮފީހުގައެވެ.