ސަރުކާރު އޮފީސް އަދި ކުންފުނިތަކަށް ހުޅުވާލައިގެން ބާއްވާ އެންމެ ޝަރަފްވެރި ފުޓްސަލް މުބާރާތް ކަމަށްވާ ކްލަބް މޯލްޑިވްސް ކަޕްގެ ޗެމްޕިއަންކަން ރޯޑް ރެކްރިއޭޝަން ކްލަބް (އާރްއާރްސީ) އިން ހޯދައިފިއެވެ.
އާރްއާރްސީން މި މުބާރާތުގެ ޗެމްޕިއަންކަން ހޯދީ މިރޭ ކުޅުނު މި މުބާރާތުގެ ފައިނަލް މެޗުގައި ފިއުލް ސަޕްލައި މޯލްޑިވްސް (އެފްއެސްއެމް) 0-4 ގެ ނަތީޖާއަކުން ބަލިކުރުމަށްފަހުއެވެ.
ފައިނަލް މެޗުގެ ފުރަތަަމަ ހާފުގައި ދެ ޓީމުގެ ފަރާތުންވެސް ރަނގަޅު ކުޅުމެއް ފެނިގެންދިޔައިރު، އާރްއާރްސީން ލަނޑު ޖަހާ ލީޑު ނެގީ ފުރަތަމަ ހާފް ނިމެން ކައިރިވެފައިވަނިކޮށެވެ. މި ލަނޑު އާރްއާރްސީއަށް ކާމިޔާބުކޮށްދިނީ، މި މުބާރާތުގައި މޮޅު ކުޅުމެއް ދެއްކި އިބްރާހިމް އަސްވަދުއެވެ.
މެޗުގެ ދެވަނަ ހާފް ފަށައިގެން އެފްއެސްއެމް އިން ލަނޑެއް ޖަހަން މަސައްކަތްކުރި ނަމަވެސް އެކަން ކާމިޔާބުވާގޮތެއް ނުވިއެވެ. އޭގެ ބަދަލުގައި އާދަމް ނަސީހް ވަނީ އާރްއާރްސީގެ ދެވަނަ ލަނޑު ކާމިޔާބުކޮށްދީ ލީޑު ފުޅާކޮށްފައެވެ. އަދި އޭގެ އިރުކޮޅެއް ފަހުން އާދަމް ނަސީހް ވަނީ އިތުރު ލަނޑެއް ޖަހާ މެޗުގެ ނަތީޖާ 0-3 އަކަށް ބަދަލުކޮށްލާފައެވެ. މި މެޗުގައި އާދަމް ނަސީހް އޭނާގެ ހެޓްރިކް ފުރިހަމަކުރީ މެޗު ނިމެން ކައިރިވެފައިވަނިކޮށް ކާމިޔާބުކުރި ލަނޑުންނެވެ.
މުބާރާތުގެ ފައިނަލް މެޗުގެ މޮޅު ކުޅުންތެރިޔާގެ މަގާމް ހޯދީ މި މެޗުގައި ހެޓްރިކް ހެދި އާރްއާރްސީގެ އާދަމް ނަސީހުއެވެ. މި މުބާރާތުގެ ފެއާޕްލޭ ކުޅުންތެރިއަކަށް ހޮވިފައިވަނީ އާރްއާރްސީގެ އަބްދުﷲ މިދުހަތު ފަހުމީއެވެ. އެންމެ މޮޅު ކޯޗަކީ އާރްއާރްސީގެ ކޯޗު އަބްދުﷲ ނަސީރު ހޮވުނުއިރު، ފެއާ ޕްލޭ ޓީމަކީ ޕްރިޒަން ކްލަބްއެވެ.
މި މުބާރާތުގެ އެންމެ މޮޅު 5 ކުޅުންތެރިންނަކީ މއާރްއާރްސީގެ މައިޝާން، އަސްވަދު އަދި ކީޕަރު ޒުހަލްގެ އިތުރުން އެފްއެސްއެމްގެ ވިޖުދާން އާއި ނާއިފް ޝަފީގުއެވެ.
