އިންޑިއާ އައުޓް ކެމްޕެއިން ކުރިއަށް ގެންދަންޖެހެނީ އިންޑިއާއެކު އޮންނަ ޒަމާންވީ ޑިޕްލޮމެޓިކް ގުޅުން ދިވެހިންނަށް ރަނގަޅަށް އެނގޭތީކަމަށް ކުރީގެ އުއްތަމަ ފަނޑިޔާރު ޑރ.އަޙްމަދު ޢަބްދުﷲ ދީދީ ވިދާޅުވެއްޖެއެވެ.
ޑރ.އަޙްމަދު ޢަބްދުﷲ ދީދީ މިހެން ވިދާޅުވެފައި މިވަނީ ރާއްޖޭގައި އޮތް އިންޑިއާގެ ދައުރާއި، އިންޑިއާ ކަނޑުގައި އޮތް އިންޑިއާގެ ދައުރަކީ ދިވެހިންނަށް އޮޅޭނެ ދައުރެއް ނޫންކަމަށާއި، އިންޑިއާ އައުޓް ނުގޮވޭނެކަމަށް ކުރީގެ ރައީސް އަދި ރައްޔިތުންގެ މަޖިލީހުގެ ރައީސް މުޙައްމަދު ނަޝީދު މިއަދު ވިދާޅުވުމާއި ގުޅިގެންނެވެ.
ނަޝީދުގެ އެ ވާހަކަތަކަށް ރައްދު ދެއްވަމުން ޑރ.ދީދީ ވިދާޅުވީ، އިންޑިއާއައުޓު ކެމްޕެއިން ކުރިއަށް ދާންޖެހެނީ؛ ރާއްޖޭއާ އެކު ޒަމާނުއްސުރެ ޑިޕްލޮމެޓިކް ގުޅުން އޮންނަ، އެކުވެރި އަވަށްޓެރި އިންޑިއާގެ ދައުރު ދިވެހިންނަށް ރަނގަޅަށް އެނގޭތީކަމަށެވެ. ޤާނޫނުއަސާސީއާ ޚިލާފަށް އިންޑިއާގެ މިލިޓަރީ ސިފައިން ރާއްޖޭގައި ތިބޭ ތިބުން ނިމުމަކަށް ގެންނަންޖެހޭނެކަމަށްވެސް އެމަނިކުފާނު ވިދާޅުވިއެވެ.
ރާއްޖޭއާ އެކު ޒަމާނުއްސުރެ ޑިޕްލޮމެޓިކް ގުޅުން އޮންނަ، އެކުވެރި އަވަށްޓެރި އިންޑިއާގެ ދައުރު ދިވެހިންނަށް ރަނގަޅަށް އެނގޭތީ #އިންޑިއާއައުޓު ކެމްޕެއިން ކުރިއަށް ދާންޖެހެނީ؛ ޤާނޫނުއަސާސީއާ ޚިލާފަށް އިންޑިއާގެ މިލިޓަރީ ސިފައިން ރާއްޖޭގައި ތިބޭ ތިބުން ނިމުމަކަށް ގެންނަންޖެހޭނެ.
– ކުރީގެ އުއްތަމަ ފަނޑިޔާރު ޑރ.އަޙްމަދު ޢަބްދުﷲ ދީދީ
އިންޑިއާ އައުޓް ހަރަކާތަށް އިޝާރާތްކުރައްވާ ރައީސް ނަޝީދު ވިދާޅުވީ ދިވެހިރާއްޖޭގައި އޮތް އިންޑިއާގެ ދައުރާއި، އިންޑިއާ ކަނޑުގައި އޮތް އިންޑިއާގެ ދައުރަކީ ދިވެހިންނަށް އޮޅޭނެ ދައުރެއް ނޫންކަމަށެވެ. އިންޑިއާ އުޓް ކަމަށް ނުބުނެވޭނެކަމަށްވެސް ރައީސް ނަޝީދު ވިދާޅުވިއެވެ.
އިންޑިއާ އައުޓު ހަރަކާތަކީ ފާއިތުވެދި ދެ އަހަރެއްހާ ދުވަހުގެ ތެރޭގައި އިދިކޮޅު ސިޔާސީ ހަރަކާތްތަކުގެ އެންމެ ވަރަގަދަ އަސާސެވެ. މި ސަރުކާރުން އިންޑިއާ ސިފައިންނާ އެކީ ކޮށްފައިވާ އެގްރީމަންޓްގެ އަސްލުތައް ހޯދުމަށާއި، އަދި އިންޑިއާ ސިފައިން ދާއިމީ ގޮތެއްގައި ރާއްޖޭގައި ތިބުމުގެ މަގު ފަހިވެފައިވާކަމަށް ބުނެ، އިދިކޮޅު ޕާޓީން ކުރިޔަށްގެންދިޔަ ހުރިހާ ސިޔާސީ ހަރާކާތެއްގައިވެސް ވަނީ މި ގައުމު އަޅުވެތި ކޮށްފައިވާ ކަމަށް ވަކާލާތުކޮށް، ގައުމުގެ މިނިވަންކަން މިސަރުކާރުން ގެއްލުވާލާފައިވާ ކަމަށް ގިނަބަޔަކަށް ވިސްނޭ މިންވަރަށް މި ހަރަކާތްތައް ކުރިޔަށް ގެންގޮސްފައެވެ.
ނަތީޖާއެއްގެ ގޮތުން، ރައީސް ޔާމިން ޖަލުގައި ހުންނެވި ދެ އަހަރެއްހާ ދުވަހުގެ މުއްދަތުގައި އިދިކޮޅު ޕީޕީއެމްއިން ކުރިޔަށް ގެންދިޔަ އިންޑިއާ އައުޓުގެ ހަރަކާތަށް ތާއީދުކޮށް، ޕީޕީއެމްއަށް ތާއީދު ނުކުރާ އެތައް ބަޔަކުވެސް ވަނީ، މިހަރަކާތާއި ގުޅި، އަދި މިހަރަކާތައްވަނީ ރާއްޖޭގެ އެކި ކަންކޮޅުތަކަށް ފުޅާ ކޮށްފައެވެ.
