ނޫސްވެރިކަމުގެ މިނިވަންފަދަ ހައްގުތައް ކަށަވަރުކޮށްދީގެން ސަރުކާރަށް ވީ އުނދަގުލެއް، ލިބުނު ގެއްލުމެއް ނެތްކަމަށާއި، ލިބުނީ ފައިދާކަމަށް ރައީސުލްޖުމްހޫރިއްޔާ އިބްރާހީމް މުޙައްމަދު ޞާލިޙް ވިދާޅުވެއްޖެއެވެ.
ރައީސް މިހެން ވިދާޅުވީ ބައިނަލްއަޤްވާމީ އިންސާނީ ހައްގުތަކުގެ ދުވަހާއި އެޗްއާރުސީއެމްގެ 18 ވަނަ އަހަރދީ ދުވަހާއި ގުޅިގެން ބޭއްވި ރަސްމިއްޔާތުގައި ވާހަކަފުޅު ދައްކަވަމުންނެވެ. ރައީސްގެ ވާހަކަފުޅުގައި ޑިމޮކްރެސީއެއްގެ އެންމެ މުހިންމު ބާރަކީ، އެޤައުމެއްގެ ރައްޔިތުންކަމަށާއި، ރައްޔިތުންނަށް ލިބިގެންވާ ބަސް ބުނުމުގެ ޙައްޤުގެ ބޭނުންހިފާ ތަނަކީ ރައްޔިތުންގެ މަޖިލިސް. މީގެ ތިން އަހަރު ކުރިން، ރައްޔިތުންގެ މަންދޫބުންނަށް ވެސް، މަޖިލީހުގެ އިދާރާއަށް ވަދެނުކުމެ އުޅުމުގެ މިނިވަންކަން ނެތް ދުވަސްތަކެއް ހިނގައްޖެކަމަށް ވިދާޅުވިއެވެ. އެގޮތުން މަޖިލީހަށް ވަދެވިއްޖެއްޔާ އޭރު ފެންނަނީ، ސިފައިންނާއި ފުލުހުންގެ އަތްދަނޑިމަތީ އުފުލާލައިގެން، މަޖިލީހުގެ ފާރުމަތިން އަޅުގަނޑުމެން ބޭރުކުރާ މަންޒަރުކަމަށް ރައީސް ވިދާޅުވިއެވެ. ނަމަވެސް މިއަދު މުޅި މަންޒަރު ބަދަލުވެއްޖެކަން ފާހަގަކުރައްވާ ރައީސް ވިދާޅުވީ، ރައްޔިތުންގެ މަންދޫބުން މަޖިލީހުގައި މަސައްކަތް ކުރައްވަނީ އެއްވެސް ނުފޫޒެއް ބިރުދެއްކުމެއް ނެތިކަމަށެވެ. ސިފައިންނާއި ފުލުހުން މިއަދު އެތިބީ، މަޖިލީހުގެ މެމްބަރުންނަށް ފުރިހަމަ ޙިމާޔަތާއި ރައްކާތެރިކަން ކަށަވަރުކޮށްދީގެންކަމަށް ރައީސް ވިދާޅުވިއެވެ.
މިނިވަން ދައުލަތެއްގެ އެންމެ ބާރުގަދަ ޙައްޤަކީ، ނޫސްވެރިކަމާއި ޚިޔާލު ފާޅުކުރުމުގެ މިނިވަންކަން. މީގެ އަހަރުތަކެއް ކުރިން ނޫސްވެރިކަމާއި ޚިޔާލު ފާޅުކުރުމުގެ މިނިވަންކަމުގެ މުޅި އުދަރެސް އޮތީ، އަބުރުގެ ގާނޫނުގެ ނަމުގައި އޮތް ބަނަ ވިލާގަނޑަކުން ބައްދާލާފައި. މީޑިއާގެ ކުރިއެރުމާ ގުޅޭ ދެ މުއައްސަސާގެ ކަމަކީ، ނޫސްވެރިންނާއި ނޫސް އިދާރާތައް ޖޫރިމަނާކޮށް އަދަބު ދިނުން. ސަރުކާރުގެ ފިއްތުންތަކާ ހެދި، އޭރު ހުއްޓާލަން ޖެހުނު މީޑިއާތައް މަދެއް ނޫން. މިއަދު އަޅުގަނޑުމެން މިތިބީ ނޫސްވެރިކަމަށް ފުރިހަމަ މިނިވަންކަން ދީގެން. އެކަމުން ސަރުކާރަށް ވީ އުނދަގުލެއް، ލިބުނު ގެއްލުމެއް ނެތް. އެމިނިވަންކަން ދިނުމުން ހަމަ ގައިމުވެސް އަޅުގަނޑަށް ލިބެނީ ފައިދާ.
– ރައީސުލްޖުމްހޫރިއްޔާ އިބްރާހީމް މުޙައްމަދު ޞާލިޙް
ރައިސްގެ ވާހަކަފުލުގައި ޚިޔާލު ފާޅުކުރުމަކީ ޙައްޤަކަށްވާ ފަދައިން، އަބުރު ރައްކާތެރިކުރުމަކީ ވެސް ކޮންމެ މީހެއްގެ ޒާތީ ޙައްޤެއްކަން ފާހަގަކުރައްވާ ވިދާޅުވީ، ޚިޔާލު ފާޅުކުރަންވާނީވެސް، އަދި ނޫސްވެރިކަން ކުރަންވާނީވެސް، އަނެކާގެ އަބުރު ރައްކާތެރިކުރުމަށް ތިމާގެ ކޮނޑުގައި އެޅިފައިވާ ޒިންމާއަށް ވެސް ރައްކާތެރިވެގެންކަމަށެވެ.
އިންސާނީ ޙައްޤުތައް ފެށިގެން އަންނަނީ، ދިރިހުރުމުގެ ޙައްޤާ ހަމައިންކަމަށާއި، ދިރިހުރުމުގެ ޙައްޤު ފުރިހަމަވަނީ އަސާސީ އެތައް ޙައްޤުތަކެއް ގެތި ލާމެހިގެންކަމަށް އެމަނިކުފާނު ވިދާޅުވިއެވެ. އެކަށީގެންވާ ބޯހިޔާވަހިކަމެއް ލިބުމަކީ އެންމެ މުހިންމު އެއް ޙައްޤުކަމަށާއި، މި ޙައްޤު ލިބިދިނުމަށްޓަކައި މާލެއާއި އަތޮޅުތަކުގައި ގިނަ މަޝްރޫޢުތަކެއް މިހާރުވެސް ހިނގަމުންދާކަމަށް ރައީސް ވިދާޅުވިިއެވެ. އަދި އިތުރު މަޝްރޫޢުތައް ފެށުމަށް ތައްޔާރުވަމުން އަންނަކަމަށްވެސް ރައީސް ވިދާޅުވިއެވެ.
މާތް ﷲގެ ވާގިފުޅާއެކު އަޅުގަނޑުމެން ފަށައިގެން ކުރިއަށް މިގެންދާ، ތަރައްޤީގެ ކޮންމެ މަޝްރޫޢަކީ، އަސާސީ ޙައްޤުތަކާ ގުޅިފައިވާ ޚިދުމަތްތައް، ރައްޔިތުންގެ މެދުގައި ތަފާތުނުކޮށް ހަމަހަމަ ގޮތެއްގައި ލިބިދިނުމަށް ހިންގާ މަޝްރޫޢެއް. އެތައް އަހަރެއް ވަންދެން ރައްޔިތުން އާދޭސްކުރަމުން ދިޔައިރުވެސް، އަސާސީ ޚިދުމަތްތައް ލިބިދޭންޖެހޭ ކަމަށް ސަރުކާރަށް ޤަބޫލުނުކުރެވުނު ކިތަންމެ ރަށެއްގައި، އަޅުގަނޑުމެން މިއަންނަނީ އެ ޚިދުމަތްތައް ޤާއިމުކުރަމުން. އެއީ އަޅުގަނޑުމެންނަށް ކުރެވޭނެ ކަމެއް. މިދިޔަ ދެ އަހަރަކީ، މިފަހުގެ ތާރީޚުގައި ރާއްޖެ ނުދެކޭ ފަދަ އިޤްތިޞާދީ ދަތިތަކާ ކުރިމަތިލާންޖެހުނު ދެ އަހަރު. ނަމަވެސް، މީހުން ދިރިއުޅޭ ހުރިހާ ރަށެއްގައި، ސާފު ބޯފެނާއި ނަރުދަމާ ނިޒާމު ޤާއިމުކުރުމަށް ހިންގާ މަޝްރޫޢުތައް މެދުކެނޑުމެއް ނެތި މިގެންދަނީ ކުރިއަށް.
– ރައީސުލްޖުމްހޫރިއްޔާ އިބްރާހީމް މުޙައްމަދު ޞާލިޙް
ރައީސްގެ ވާހަކަފުޅުގައި ޙައްޤުތަކަކީ މީގެ ކުރިން ހަމައެކަނި ޤާނޫނުއަސާސީގެ ދެލިގަނޑުގައި ހުރި ޙައްޤުތަކެއްކަމަށާއި، ލިޔުމުގައި އޮންނަ ކިޔުމުގައި ނޯންނަ ޙައްޤުތަކެއްކަމަށް ވިދާޅުވިއެވެ. ނަމަވެސް އެމަނިކުފާނުގެ އަމާޒަކީ، މިދެންނެވި ޙައްޤުތަކަކީ ރައްޔިތުންނަށް ފުރިހަމައަށް ލިބޭ ޙައްޤުތަކެއް ކަމުގައި ހެދުންކަމަށް ވިދާޅުވިއެވެ.
މާތް ﷲގެ ވާގިފުޅާއެކު، ކުރިމަގުގައި ވެސް ސަރުކާރުގެ އެންމެ އިސް ސިޔާސަތަކަށް ވާނީ، އިންސާނީ ޙައްޤުތައް އެންމެ ފުރިހަމަ ގޮތުގައި ލިބިދިނުން. އިންސާނީ ޙައްޤުތަކާއި އަސާސީ ޚިދުމަތްތައް ފޯރުކޮށްދިނުމުގައި ރައްޔިތުންގެ މެދުގައި ހަމަހަމަކަން ޤާއިމުކުރުން. އަދި އިންސާނީ ޙައްޤުތަކަށް ހުރަސްއެޅޭ ގޮތަށް، ދައުލަތް ހިންގުމުގެ ނިޒާމުގެ ތެރޭގައި އެއްވެސް ކަމެއް ހުރި ނަމަ، އެކަމެއް ނައްތައިލުން. އިންސާނީ ޙައްޤުތައް ފުރިހަމައަށް ރައްކާތެރިކުރެވޭނީ، އަންހެނުންނާއި ކުޑަކުދިންނާއި ޢުމުރުން ދުވަސްވީ މީހުންގެ ޙައްޤުތައް ވެސް ރައްކާތެރިކޮށްގެން. އެންމެ ނާޒުކު ޙާލަތުގައި ތިބި އެފަދަ މީހުންނަށް އަނިޔާކުރުމާއި ގޯނާކުރުމަކީ، އަޅުގަނޑުމެން ތަޙައްމަލުކުރާނެ ކަންކަމެއް ނޫން. ދައުލަތުގެ ހުރިހާ ހަކަތައެއް ބޭނުންކޮށްގެންވެސް، އެމީހުން ރައްކާތެރިކުރުމަށް ސަރުކާރުން މަސައްކަތް ކުރާނެ.
– ރައީސުލްޖުމްހޫރިއްޔާ އިބްރާހީމް މުޙައްމަދު ޞާލިޙް
ރައީސް ވިދާޅުވީ، ލާމަރުކަޒީ ނިޒާމުގައި އަންހެނުންގެ ދައުރު ފުޅާކުރުމަށް ސަރުކާރުން ގެނައި ބަދަލުތަކަކީ، އަންހެނުންގެ ސިޔާސީ އަދި މަދަނީ ޙައްޤުތައް ލިބިދިނުމަށް އެޅުނު ވަރަށް މުހިންމު ފިޔަވަޅެއްކަމަށެވެ. ރަށު ކައުންސިލްތަކާއި ސިޓީ ކައުންސިލްތަކުގެ މެންބަރުންގެ 33 އިންސައްތައަށް ވުރެ މަތީ ނިސްބަތެއް މިހާރު ޙިއްޞަކުރަނީ އަންހެނުންކަން ރައީސް ފާހަގަކުރެއްވިއެވެ.
އަންހެނުންގެ ތަރައްޤީއަށް މަސައްކަތްކުރާ ކޮމިޓީތަކަކީ، ރައްޔިތުންގެ ވޯޓުން އިންތިޚާބުކުރާ އަދި ސަރުކާރުން މުސާރަދޭ ބަޔަކަށް ހެދުމަކީ ވެސް މުހިންމު ފިޔަވަޅެއްކަމަށާއި، މިބަދަލުގެ ސަބަބުން، އަންހެނުން ބާރުވެރިކުރެވި، ރަށްރަށުގެ ތަރައްޤީގައި އަންހެނުންގެ ދައުރު ވަރަށް ބޮޑު ތަނުން އިތުރުވެގެން ދާނެކަން ޔަޤީންކުރައްވާކަމަށްވެސް ރައީސް ވިދާޅުވިއެވެ. އެމަނިކުފާނުގެ ވާހަކަފުޅުގައި ރާއްޖޭގެ ނާޒުކު ތިމާވެށި ޙިމާޔަތްކުރުމަކީވެސް، އިންސާނީ އަސާސީ ޙައްޤުތަކުގެ ޙިމާޔަތަށްޓަކައި ކޮންމެހެން ކުރަންޖެހޭ ކަމެއްކަމަށާއި، މާކަނޑުގެ ރާޅުތަކާއި ގަދަ އޮއިވަރާއި އުދަބާނިތަކުން، މިޖަޒީރާތައް ރައްކާތެރި ކޮށްގެންނޫނީ، ދިރިހުރުމުގެ ޙައްޤުވެސް އަދި ބަނޑުފުރާނަ މުއްތިކުރުމަށް އާމްދަނީ ހޯދުމުގެ ޙައްޤުވެސް ރައްކާތެރިއެއް ނުކުރެވޭނެކަމަށް ވިދާޅުވިއެވެ.
އާދެ، ކުރުކޮށް ދަންނަވާ ނަމަ، އިންސާނާގެ ޒާތާ ގުޅިފައިވާ އަދި އިންސާނާގެ ވަށައިގެންވާ މާޙައުލުގެ އެންމެހައި ކަންކަމަކީ، އިންސާނީ ޙައްޤުތަކާ ގުޅިފައިވާ ކަންކަން. އެހެންކަމުން، އަޅުގަނޑުމެންގެ އަމިއްލަ ނަފްސުގެ ޙައްޤުތަކަށް ރައްކާތެރިވާ ފަދައިން، އަޅުގަނޑުމެންގެ ވެށި ޙިމާޔަތްކުރުމަށް ސަމާލުކަން ދޭންޖެހޭނެ. މިދެންނެވި ހުރިހާ ޙައްޤުތަކެއް ރައްޔިތުންނަށް ލިބިދިނުމަކީ ސަރުކާރުގެ ޒިންމާއަކަށްވާއިރު، އެ ޒިންމާ ސަރުކާރުން އަދާކުރާ މިންވަރު ބެލުމަށް އުފެއްދި ތަނަކީ ހިއުމަން ރައިޓްސް ކޮމިޝަން. އެކޮމިޝަނަށް މިފުރުނީ 18 އަހަރު. ޤާނޫނުއަސާސީ ބުނާ ގޮތުން ނަމަ، ބޮޑު މީހަކަށްވެ، ޒިންމާތަކާއި ޙައްޤުތަކާއި މަސްއޫލިއްޔަތުތައް އިތުރުވެގެން ދާ އުމުރަށް އެޅީ.
– ރައީސުލްޖުމްހޫރިއްޔާ އިބްރާހީމް މުޙައްމަދު ޞާލިޙް
ރައީސް ވިދާޅުވީ، މިދިޔަ 15 ވަރަކަށް އަހަރު، ސިޔާސީ ފިއްތުންތަކެއްގެ ތެރޭގައި އޮތުމުން، ކޮމިޝަންގެ ޙަޤީޤީ ޒިންމާ އަދާކުރެވިފައިވާ ކަމަކަށް ދެންނެވޭކަށް ނެތްކަމަށެވެ. ނަމަވެސް މިއަދު ސަރުކާރުގެ އެއްވެސް ނުފޫޒެއް އެ ކޮމިޝަނަށް، އަދި އެހެން މިނިވަން މުއައްސަސާއަކަށް ވެސް ނޯންނާނެކަން ޔަޤީންކަންދެއްވާކަމަށް ވިދާޅުވިއެވެ. ސަރުކާރުގެ ފަރާތުން އެކޮމިޝަނަށް ކަށަވަރުކޮށްދީފައިވާ މިނިވަންކަމުގެ ސަބަބުން، ރާއްޖޭގައި އިންސާނީ ޙައްޤުތައް ރައްކާތެރިކުރުމާއި، ޙައްޤުތައް ލިބިދޭ މިންވަރާ މެދު ސަރުކާރު ޒިންމާދާރު ކުރުމުގައި، އެކޮމިޝަންގެ ދައުރު މިހާރު އަންނަނީ ފުޅާވަމުންކަމަށާއި، އެއީ ހެޔޮ ފާލެއްކަމަށްވެސް ރައީސް ވިދާޅުވިއެވެ.
އެމަނިކުފާނުގެ އުންމީދަކީ، ރާއްޖޭގައި އިންސާނީ ޙައްޤުތައް ކުރިއަރުވައި ރައްކާތެރިކޮށް ދެމެހެއްޓުމަށް، ހިއުމަން ރައިޓްސް ކޮމިޝަންގެ ފަރާތުން މަސައްކަތް ކުރައްވާއިރުވެސް، އިންސާނީ ޙައްޤުތަކާ ގުޅިފައިވާ ހުރިހާ ދާއިރާތަކަށް މިހާރަށް ވުރެ ބޮޑު ސަމާލުކަމެއް ދެއްވައިގެން އެ މަސައްކަތް ކުރެއްވުންކަމަށް ރައީސް ވިދާޅުވިއެވެ.
