ރާއްޖޭގެ ޝަރުއީ ދާއިރާއިން ނިންމާ ނިންމުންތަކާއި، ކުރާ ހުކުމްތަކަކީ، ސިޔާސީ ޕާޓީތަކުން ބޭނުންވާހާ ގޮތަކަށް އޮންނަ ހުކުމަކަށް ވާންޖެހޭކަމަށް ދެކޭ ދެކުން ބަދަލު ކުރަންޖެހޭ ކަމުގައި ރައްޔިތުންގެ މަޖިލީހުގެ ވިލިނގިލި ދާއިރާގެ މެމްބަރު ސައުދު ހުސެއިން ވިދާޅުވެއްޖެއެވެ.
ރާއްޖޭގެ ޝަރުއީ ދާއިރާގެ މިނިވަންކަން ނެގެހެއްޓުމަށާއި، ޝަރުއީ ދާއިއާގެ މުސްތަގިއްލު ކަމާއިމެދު މިއަދު އުފައްދަމުންދާ ސުވާލުތަކާއި ގުޅިގެން ސައުދު ވިދާޅުވީ ސިޔާސީ ޕާޓީތަކުން ބޭނުންވާހާ ގޮތަކަށް ޝަރުއީ މަރުހަލާއިން ހުކުމްތައް އަނަންޖެހޭކަމަށް ދެކޭ ދެކުން ބަދަލު ކުރަންޖެހޭކަމަށެވެ.
ޝަރުއީ މަރުހަލާއިން ނިންމާ ނިންމުންތަކަކީ މިނިވަން ކަމަށާއި، އަދުލުވެރިކަމާއިއެެކު ނިންމޭ ނިންމުތަކެއްކަމަށް ގަބޫލުކޮށް، ވަކި ޕާޓީއަކުން ނުވަތަ ވަކި ސިޔާސީ ފިކުރަކުން ދެކޭ ގޮތަށް އަންނަންޖެހޭ ހުކުމެއްކަމަށް ދެކޭ ދެކުން ބަދަލު ކުރަންޖެހޭކަމަށެވެ. އެގޮތަށް އޮތްހާ ހިނދަކު ރާއްޖޭގެ ޝަރުއީ ދާއިރާއާއިމެދު އޮންނަންޖެހޭ އިންސާފުވެރިކަމާއި ހަމަހަމަކަން ނޯންނާނެކަށާއި، ސިޔާސީ ޕާޓީތަކުން މިކަމުގައި ޒިންމާދާރު ކަމާއިއެކު މަސައްކަތް ކުރަންޖެހޭކަމަށް ސައުދު ވިދާޅުވިއެވެ.
ސިޔާސީ ޕާޓީތަކުން އެ ޕާޓީއަކަށް ބޭނުންވާ ގޮތަށް ހުކުމް ނުކުރާނަމަ ޖުޑީޝަރީ އާއިމެދު ސުވާލު އުފައްދާ ރައްޔިތުންދެކޭ ގޮތް ބަދަލު ކުރުމަށް ކުރާ މަސައްކަތް ހުއްޓާނުލާހާ ހިނދަކު ދިވެހި ރާއްޖޭގެ އަދުލު އިންސާފު ގާއިމްވީކަމަށް ނުވާނެ. ޕާޓީތަކުން ޒިންމާދާރު މަސައްކަތްތަކެއް ކުރަންވެއްޖެ.
– ސައުދު ވިދާޅުވިއެވެ.
ނިމިދިޔަ ވެރިކަމުގައި ޖަލުގައި ގިނަ ދުވަސްތަކެއް ހޭދަކުރި ސައުދަކީ އުދަގޫ ދަތި މަރުހަލާއެއްގައި މަޖިލީހުގެ ވިލިނގިލީ ދާއިރާގެ ގޮޑި ކާމިޔާބު ކުރި މެމްބަރެކެވެ. މިނިވަން މެމްބަރެއްގެ ގޮތުގައި ސައުދު މަޖިލީހުގައި ހަރަކާތްތެރިވާއިރު، ވަކި ސިޔާސީ ފިކުރަކަށް ތާއީދު ކުރުމަށްވުރެއް ސައުދުގެ ވިސްނުން އަމާޒުވެފައިވަނީ ޤައުމީ މަސްލަހަތާއި، ޤާނޫނުގެ ތަކުގެ މައްޗައްކަން ފާހަގަކޮށްލެވެއެވެ.
ރާއްޖޭގެ ޝަރުއީ ނިޒާމާއިމެދު ސިޔާސީ ޕާޓީތަކުން އަބަދުވެސް ގެންދަނީ ސުވާލު އުފައްދަމުންނެވެ. ޚާއްސަކޮށް އެއިރެއްގައި އިދިކޮޅުގައި އޮންނަ ކޮންމެ ސިޔާސީ ޕާޓީއަކުންވެސް ޝަރުއީ ނިޒާމާއިމެދު ސުވާލު އުފައްދައި ކޯޓުތަކުން ނިންމާ ނިންމުންތަކާއިމެދު ސުވާލު އުފައްދައެވެ. ސައުދު މިފަދަ ގޮތަކަށް ޓުވީޓު ކުރައްވާފައިވާއިރު، ކުރީގެ ރައީސް ޔާމިނަށް ކޮށްފައިވާ 5 އަހަރު ދުވަހުގެ ހުކުމާއިމެދު ސްޕްރީމް ކޯޓުން ގޮތް ނިންމުން އަންގާރަ ދުވަހު އޮންނާނެއެވެ.
