ރައްޔިތުންގެ މަޖިލީހުގެ ރައީސް، މުހައްމަދު ނަޝީދަށް ދިން ނުރައްކާތެރި ޓެރެރިސްޓް ހަމަލާއަށްފަހު އެމަނިކުފާނަށް ދެމުންދާ ސެކިރިޓީ ވަރުގަދަ ކުރުމުން އެކަމާއި ސުވާލު އުފައްދުމަކީ ކަންބޮޑުވުން އޮތް ކަމެއްކަމުގައި ރައްޔިތުންގެ މަޖިލީހުގެ އުނގޫފާރު ދާއިރާގެ މެމްބަރު މުހައްމަދު ވަހީދު (ވައްޑޭ) ވިދާޅުވެއްޖެއެވެ.

ރައްޔިތުންގެ މަޖިލީހުގެ ރައީސް ދިރިއުޅުއްވަން ދައުލަތުން ހަމަޖައްސަވާ ވަގުތީ ގެކޮޅު "މުރައިދޫގެ" ސަރަހައްދުގައި ރަތް ރޮނގުދަމައި ރެޑް ޒޯނެއްކަމަށް އެ ސަރަަހއްދު ވަނީ ކަނޑައަޅައިފައެވެ. އެސަރަހައްދުގައި ރަތް ރޮނގު ދަމާފައިވަނީ ސެކިއުރިޓީ ވަރުގަދަކުރުމުގެ ގޮތުންނެވެ.

މިކަމާއި ގުޅިގެން ބައެއް ފަރާތްތަކުން ދަނީ ކަންބޮޑުވުން ފާޅު ކުރަމުންނެވެ. އެގެ ތެރޭގައި ސަރުކާރު ކޯލިޝަންގައި ހިމެނޭ ބައެއް ޕާޓީތަކަށް ނިސްބަތްވާ ބޭފުޅުންވެސް ހިމެނެއެވެ. ޚާއްސަކޮށް ދީނީ ބައެއް އިލްމުވެރިންވެސް ދަނީ ނަޝީދަށް މިހާ މަތީ ސެކިއުރިޓީއާއިއެކު އާންމު ރައްޔިތުންގެ ފައިސާއިން ބޮޑު އިންސައްތައެއް ޚަރަދު ކުރަމުންދާތީ ކަންބޮޑުވުން ފާޅު ކުރަމުންނެވެ.

މިކަމާއި ގުޅިގެން ވަހީދު ވިދާޅުވީ ރައީސް ނަޝީދު މަރާލަން ދިން ހަމަލާއިން ކުރިޔާ ސަލާމަތްވުމަށްފަހު އެމަނިކުފާނުގެ ސެކިއުރިޓީ ވަރުގަދަ ކުރުމުން، އެކަމާއި ހިތްހަމަ ނުޖެހި ކަންބޮޑުވާ މީހުންނާއި، ހަމަލާއާއި ގުޅުމެއް އޮތްތޯ ބަލަންޖެހޭކަމަށެވެ.

ބޮމެއް ގޮއްވާލައިގެން ކިރިޔާ މަރުން ސަލާމަތްވި މީހެއްގެ ސެކިޔުރިޓީ ސިފައިން ވަރުގަދަކުރުމުން އެކަމާ މާބޮޑަށް ކަންބޮޑުވެގެން އުޅޭ މީހުންނާ، ބޮމުގެ ހަމަލާއާ ގުޅުމެއް އޮތްތޯ ނެތްތޯ ބަލައި ތަހުގީގު ކުރަންޖެހޭ.

– ވައްޑެ ވިދާޅުވިއެވެ.

މުރައިދޫގެ ސަރަހައްދު ރެޑް ޒޯންކަމަށް ކަނޑައަޅާފައިވާއިރު މިއީ ފަހުގެ ތާރީޚެއްގައި ރެޑް ޒޯން ކަނޑައެޅި ފުރަތަމަ ފަހަރެވެ. އެހެނީ ރައީސުލްޖުމްހޫރިއްޔާ ދިރިއުޅުއްވާ ރަސްމީ ގެކޮޅާއި، ރައީސުލްޖުމްހޫރިއްޔާގެ ނާއިބު ދިރިއުޅުއްވާ ގެކޮޅާއި އުއްތަމަ ފަނޑިޔާރު ދިރިއުޅުއްވާ ގެކޮޅު ސަރަހައްދުގައިވެސް ރަތް ރޮނގު ދަމާފައި ނުހުރެއެވެ.

ނަޝީދު ދިރިއުޅުއްވާ ގެކޮޅު ކައިރީގައި ރަތް ރޮނގު ދަމާފައިހުރުމުން އެސަރަހައްދުގައި މަޑުކޮށްގެން ހުރުމަކީވެސް މަނާކަމެކެވެ.ރައީސް ނަޝީދަށް ދައުލަތުން ބޮޑު ޚަރަދެއް ކުރާތީ ގިނަ ބައެއްގެ ފާޑުކިޔުން ވަނީ އަމާޒުވެފައެވެ. އެގޮތުން މިއަހަރުގެ މެއި މަހުގެ 6 ވަނަ ދުވަހު ރައީސް މުހައްމަދު ނަޝީދަށް ދިން ނުރައްކާތެރި ޓެރަރިސްޓް ހަމަލާއަށްފަހު ރާއްޖޭގައި ބޭރުގައި ކުރެއްވި ބޭސްފަރުވާއަށް 1.6 މިލިޔަން ރުފިޔާ ދައުލަތުން ޚަރަދުކޮށްކޮށްފައިވެއެވެ.

މީގެ އިތުރުން ރައީސް ނަޝީދު ޖެންގައި 21 ދުވަހު (ތިން ހަފުތާ) ގައި ނަޝީދު ހުންނެވުމަށް މިހާތަނަށް 698،168ރ. ވަނީ ހޭދަވެފައިވެއެވެ. މިއީ ބޭސްފަރުވާއަށް ފަހު އެމަނިކުފާނު ރާއްޖެ އިން ބޭރުން ވަޑައިގެންނެވި ފަހުން މިހާތަނަށް ހިނގާފައިވާ ހަރަދެވެ.