އިދިކޮޅު ފަރާތަތަކުގެ މައްޗަށް އަނިޔާވެރިކަން ދައްކާ، އަދި ކުރެވުނު ބޮޑެތި މުޒާހިރާތަކަށްފަހު ވެރުކަމުން ފައިބައި ވަޑައިގަންނަވަން މަޖުބޫރިވި، ސައުތު ކޮރެއާގެ ކުރީގެ ޚުދުމުޚްތާރު ވެރިޔާ ޗުން ޑޫ-ވަން އަވަހާރަ ވެއްޖެކަމަށް، ދިގު ޒަމާންތަކެއް ވަންދެން އޭނާއަށް ޚިދުމަތް ކުރި އޭގެ ގާތް މީޖަކު މައުލޫމާތު ދީފިއެވެ.
ކުރީގެ ރައީސް އަވަހާރަ ވެފައިވަނީ، ސައުތު ކޮރެއާގެ ވެރިރަށް ސޯލްގައި ހުންނަ އޭނާގެ ގޭގައި ކަމަށް ޗުންގެ ގޭގެ ބޭރުގައި ހުންނަވައިގެން ރިޕޯޓަރުންނަށް މައުލޫމާތު ދެމުން މިން ޖިއޮންގ-ކީ ބުނެފައި ވެއެވެ. އަވަހާރަވި އިރު ޗުންގގެ އުމުރަކީ 90 އަހަރެވެ.
ކުރީގެ ރައީސް ޗުންގެ ރައީސްކަމުގައި ސައުތު ކޮރެއާވަނީ އިގްތިސާދީ ގޮތުން ބޮޑެތި ކުރިއެރުންތަކެއް ހޯދާފައެވެ. އަދި އޭނާގެ ވެރިކަމުގައި އެގައުމުންވަނީ 1988ވަނަ އަހަރުގެ އޮލިމްޕިކްސް އެގައުމުގައި ބޭއްވުމުގެ ބިޑްވެސް ކާމިޔާބު ކޮށްފައެވެ. އަދި އޭނާއަކީ ސުލްހަވެރިކަމާއެކު، ވެރިކަމުގެ ބާރުތައް ދޫކޮށްލެވި އެގައުމުގެ ފުރަތަމަ ރައީސްވެސް މެއެވެ.
އޭނާ ހަރުކަށިކަމާއެކު، އަދި ސައުތު ކޮރެއާގެ އިދިކޮޅު ފަރާތްތަކުގެ މައްޗަށް ހަރުކަށިކަން ދައްކަވާ، އެގައުމުގެ ރައީސްކަން ކުރައްވާފައިވަނީ، 1980ވަނަ އަހަރުން ފެށީގެން 1988ވަނަ އަހަރާ ހަމައަށެވެ. އަދި އޭނާ ބެލެވިގެން ގޮސްފައިވަނީ މިއަދާ ހަމައަށްވެސް ސައުތު ކޮރެއާގައި އެންމެ ބޮޑަށް މީހުން ނަފްރަތުކުރާ އެކެއްގެ ގޮތުގައެވެ.
އޭނާގެ ވެރިކަމާ ދެކޮޅަށް، ސައުތު ކޮރެއާގެ ހުޅަގު ދެކުނުގެ ސިޓީއެއްގައި ތެދުވި މީހުން މައިތިރި ކުރުމަށް އެގައުމުގެ ސިފައިން ފޮނުވި ފޮނުވުމަށް ނިސްބަތްކޮށް އޭނާ އެގައުމުގައި މަޝްހޫރު ވެގެން ގޮސްފައިވަނީ، "ބަޗަރ އޮފް ގުވާންގޖޫ"ގެ ނަމުންނެވެ.
ގުވާންގޖޫގައި އޭނާގެ ވެރިކަމާ ދެކޮޅަށް ތެދުވި މީހުން މައިތިރިކުރުމަށް ޗުންގެ އަމުރަށް ސިފައިން ހިންގި ހަރަކާތަތަކުގައި މަރުވީ މީހުންގެ ރަސްމީ އަދަދަކީ 200 އެވެ. އެހެންނަމަވެސް، އެކްޓިވިސްޓުން ބުނާ ގޮތުގައި މިއަދަދު މިގެ ތިން ގުނައަށް އިތުރުވާނެއެވެ.
އެހެންނަމަވެސް، ޗުންގ ވަނީ ސިފައިންގެ މި ހަރަކާތުގައި އެއްވެސް ބައިވެރިވުމެއް ނޯންނާނެ ކަމުގައި ފަހުން ބުނެފައެވެ.
ޗުންގެ ވެރިކަމުގައި އޭނާ މަރާލުމަށް ދިން ހަމަލާއަކުންވަނީ ސަލާމަތް ވެފައެވެ. 1983ވަނަ އަހަރު އޭނާ މިޔަންމާރއަށް ކުރެއްވި ރަސްމީ ދަތުރުފުޅެއްގައި ނޯތު ކޮރެއާގެ އޭޖެންޓުންވަނީ އޭނާ ހާޒިރުވި މެމޯރިއަލް ހަފްލާއަކަށް ބޮމުގެ ހަމަލާދީ އޭނާ މަރާލުމަށް މަސައްކަތް ކޮށްފައެވެ.
ހަޔާތުގެ ފަހު ދުވަސްކޮޅުވެސް ޗުން އުޅެފައިވަނީ ކޯޓުގައި އޭނާއާއި ދެކޮޅަށް ހިގަމުންދިޔަ ޝަރީއަތަތަކުގައެވެ. ގުވާންގޖޫގައި އޭނާގެ ވެރިކަމާ ދެކޮޅަށް ހިގައިދިޔަ ހަރަކާތަކާއި ގުޅިގެން އަބުރުގެ ދައުވާ ފާއިތުވެދިޔަ އަހަރު އޭނާގެ މައްޗަށް ސާބިތު ވެފައިވެއެވެ.
