އދ.ގެ ޔޫތު ފެލޯޝިޕް ޕްރޮގްރާމަށް ޒުވާނުން ނޮމިނޭޓް ކުރުމަށް އދގެ ޖެނެރަލް އެސެމްބްލީގެ ރައީސް އަބްދުއްﷲ ޝާހިދު އެދިވަޑައިގެންފިއެވެ.
އދ ގެ މެމްބަރު ގައުމުތަކުގެ އެހީތެރިކަމާއި އެކު، މި ފެލޯޝިޕް ޕްރޮގްރާމްގެ ދަށުން، މި ދައުރުގައި ޒުވާން 8 ޑިޕްލޮމެޓަކަށް މި ފެލޯޝިޕްގައި ބައިވެރިވުމުގެ ފުރުޞަތު ލިބިގެން ދާނެއެވެ. މި ފެލޯޝިޕަށް ޒުވާނުން ނެގުމުގައި އިސްކަމެއް ދީފައިވަނީ އެންމެ ކުޑަ މިންވަރަށް ތަރައްގީވެފައިވާ ޤައުމުތަކަށާއި، ލޭންޑްލޮކްޑް ޑިވެލޮޕިންގ ގައުމުތަކަށާއި، އަދި ސްމޯލް އައިލެންޑް ޑިވެލޮޕިންގ ސްޓޭޓްތަކަށެވެ. މި ފެލޯޝިޕްގެ ދަށުން މި ޤައުމުތަކުން އައްޔަން ކުރެވޭ ޒުވާނުންނަށް އދގެ އެތެރޭގެ މަސައްކަތްތައް ދެނެގަތުމަށް ދޮރު ހުޅުވުގެން ދާނެއެވެ.
މިއީ ޕްރެޒިޑެންސީ އޮފް ހޯޕްގެ އިސްނެންގެވުމެއް. މިކަމަކީ އަޅުގަނޑަށް ވަރަށް މުހިންމު ކަމެއް. ހުރިހާ މަރުހަލާއެއްގައިވެސް ކަންތައްތައް ނިންމުމުގައި ޒުވާނުންގެ ދައުރު ފުޅާ ކުރުމަކީ ވަރަށް މުހިންމު ކަމެއް ގޮތުގައި އަޅުގަނޑު ގަބޫލުކުރާ ކަމެއް. މަލްޓިލިޓްރަލިޒަމްގެ ކުރިމަގަށް ކުރާ ހޭދައެއް ގޮތުގައި ޒުވާނުން އދ ގެ މަސައްކަތާއި ގާތްކުރުމަކީ ބޭނުންތެރިކަމެއް.
– އދ ގެ މެމްބަރު ގައުމުތަކަށް ފޮނުއްވި ސިޓީފުޅުގައި ރައީސް ޝާހިދު ބަޔާން ކުރެއްވިއެވެ.
މި ފެލޯޝިޕްގައި ބައިވެރިވާ ޒުވާނުންނަށް ޖެނެރަލް އެސަމްބްލީގެ އެންމެ ބޮޑެތި އިވެންޓްތަކުގައި ބައިވެރިވުމުގެ ފުރުޞަތު ލިބިގެންދާނެއެވެ. މީގެ އިތުރުން ނެގޯޒިއޭޝަން ތަކުގައި އާއި، މެނޭޖްމަންޓަށް އެހީތެރިވުމުގައި އާއި، އިސް ނަގައިގެން ހިންގޭ ހަރަކާތްތަކާއި އަދި އަމަލީ ގޮތުން ނިންމާ ނިމުންތައް ފައިސަލާ ކުރުމުގައި ބައިވެރި ވުމުގެ ފުރުޞަތު ލިބިގެން ދާނެއެވެ. ހަމައެހެންމެ ރަސްމީ ދަތުރުތަކުގައި ބައިވެރިވުމަށް ޖެހޭ ހާލަތްތަކުގައި އެފުރުޞަތުވެސް ލިބިގެން ދާނެއެވެ.
އދ ގެ އިންސްޓިޓިޔުޓް އޮފް ޓްރެއިނިންގ އެންޑް ރިސާރޗް އާއި ގުޅިގެން ހިންގާ މި ފެލޯޝިޕް އިން، އދ ސިސްޓަމް އާއި، އޭގެ ގުނަވަންތަކާއި، އަދި އެކި ބައިތަކުގެ އިތުރަށް މިހާރު ދުނިޔޭއަށް ދިމާވެފައިވާ މައްސަލަތަކާއި ބެހޭ ގޮތުން ޓްރެއިނިންގައި ދެވޭ މައުލޫމާތުން މިކަންތައްތައް ދަސްވެގެންދާނެއެވެ. މި ގޮތުން މުސުމީ ބަދަލުތަކުން ފެށިގެން ކޮވިޑް 19 އާއި، އަމާން ކަމާއި ރައްކާތެރިކަމުގެ މައުޟޫތަކުން ފެށިގެން އިންސާނީ ހައްޤުތަކާއި، ޖިންސުގެ ހަމަހަމަކަމާއި ގުޅޭގޮތުން ޓްރެއިނިންގައި ކިޔަވައިދެވޭނެއެވެ.
މި ފެލޯޝިޕްގެ ބައިވެރިންނަށް ރޮޓޭޝަން ބޭސިސްގައި އެކި ފަރާތްތަކާއި އެކު މަސައްކަތް ކުރުމަށް ފުރުޞަތު ލިބިގެން ދާނެއެވެ. މިގޮތުން ޕްރެޒިޑެންޓް އޮފް ޖެނެރަލް އެސެމްބްލީގެ އޮފީހުގައި އާއި، ޕީސް އެންޑް ސެކިޔުރިޓީ، އިންސާނީ ހައްޤުތަކާއި ގުޅޭ ބައިގައި އާއި، އިންސާނިއްޔަތާއި ގުޅޭ ދާއިރާތަކުގައި އާއި، ސަސްޓައިނަބަލް ތަރައްޤީ އާއި، ރިފޯމް، އަދި ބަޖެޓާއި، ޤާނޫނީ ދާއިރާގައި އާއި، ކޮމިޔުނިކޭޝަންގައި މަސައްކަތް ކުރުމަށް ފުރުޞަތު ލިބިގެން ދާނެއެވެ. މި ގޮތުން ޕްރެޒިޑެންޓް އޮފް ޖެނެރަލް އެސެމްބްލީގެ އޮފީހުގައި މަސައްކަތް ކުރުމުން، އދ ސިސްޓްމް ދަސްވެ، ފަންޑިންގ ޕްރޮގްރާމްތަކާއި، އެޖެންސީސްތަކާއި، އދގެ ގުނަވަންތަކުގެ މަސައްކަތް ދަސްވެގެން ދާނެއެވެ.
މި ފެލޯޝިޕަށް ހޮވުމަށްޓަކައި މެމްބަރު ޤައުމުތަކަށް ވަނީ ކޮންމެ ޤައުމަކުންވެސް ޒުވާނެއް ނޮމިނޭޓްކުރުމަށް ދަތުވަތު އަރުވާފައެވެ. ކެނޑިޑޭޓުން ހޮވާނީ ތަޖުރިބާކާރު މިނިވަން ޕެނަލްއަކުންނެވެ. މިގޮތުން ހޮވާއިރު ޖިންސީ ހަމަހަމަ ކަމަށާއި، ސަރަހައްދީ ބައިވެރިވުން އޮންނަ މިންވަރަށް ބެލޭނެއެވެ.
މި ކަމަށް ހިނގާ ހުރުމާއި، ބަދަލުވުންފަދަ ޚަރަދުތައް ކުރާނީ ފެލޯޝިޕް ޕްރޮގްރާމަށް ފަންޑުކޮށްފައިވާ މެމްބަރު ޤައުމުތަކުންނެވެ.
ކުދި ޖަޒީރާ ޤައުމުގެއް ހައިސިއްޔަތުން ވަރަށް ގިނަ ޤައުމުތަކުން ބައިނަލްއަޤުވާމީ ހަރަކާތްތަކުގައި، ޔޫއެން ނުވަތަ ކޮޕް26 ކަމުގައިވިޔަސް، އެފަދަ ހަރަކާތްތަކުގައި ބައިވެރިވުމަށް އުފުލަންޖެހޭ ބުރަ އިހްސާސްކުރެވޭ. އެހެންކަމުން އެކަންކަން ހައްލުކޮށް، ފެންވަރު ރަނގަޅުކުރުމަށް އަޅުގަނޑުމެން އަދާ ކުރަންޖެހޭ ދައުރު އަދާ ކުރެވޭނެ ކަމަށް އުންމީދު ކުރަން
– ޝާހިދު ވިދާޅުވިއެވެ.
ފެލޯޝިޕަށް ޒުވާނުން ނޮމިނޭޓްކުރުމަށް ދެއްވާފައިވާ އެންމެ ފަހު ތާރީޚަކީ 30 ނޮވެމްބަރުގެ ނިޔަލަށެވެ. އަދި ޖެނުއަރީގައި ކެނޑިޑޭޓުން ނިވްޔޯކަށް ވަޑައިގަންނަވާނޭކަމަށް ބެލެވެއެވެ.
