ސިވިލްސަރވަންޓުންނަކީ އެމީހުން ގަބޫލުކުރާ ސިޔާސީ ފިކުރެއްގައި ދެމި ތިބެވޭނެ މިނިވަން ބައެއް ކަމުގައި ރައީސުލްޖުމްހޫރިއްޔާ އިބުރާހިމް މުހައްމަދު ސާލިހު ވިދާޅުވެއްޖެއެވެ.
ރައީސުލްޖުމްހޫރިއްޔާ މިފަދައިން ވިދާޅުވީ ދިވެހިރާއްޖޭގެ 54 ވަނަ ޖުމްހޫރީ ދުވަހުގެ މުނާސަބަތުގައި ބާއްވާ ރަސްމީ ޖަލްސާގައި ގައުމާ މުޚާތަބު ކުރައްވާ މިރޭ ވާހަކަފުޅު ދައްކަވަމުންނެވެ.
ޖުމުހޫރީ ދުވަހުގެ ރަސްމީ ޖަލްސާގައި ވާހަކަފުު ދައްކަވަމުން ރައީސް ވިދާޅުވީ، ވަކި ސިޔާސީ ފިކުރަކުން މަޖުބޫރު ކުރެވޭ ސިވިލް ސަރވެންޓެއް ރާއްޖޭގައި އޮންނާކަށް އެމަކިންފާނު އެދިވަޑައި ނުގަންނަވާ ކަމުގައެވެ. އަދި، ސިޔާސީ ވަކިކަމެއްގައި ނޫޅެގެން ފިޔަވަޅު އެޅި، އެކަހެރި ކުރެވި، މަގާމުން ވަކި ކުރުމުގެ ފުރުޞަތު އޮވެގެން ނުވާނެ ކަމަށް ވިދާޅުވަމުން، ރައީސް ވިދާޅުވީ، ސިވިލް ސާވިސްގެ މުވައްޒަފުންނަކީ، ސިޔާސީ މަސައްކަތުގައި ވަކި ބަޔަކަށް ގުލާނުކޮއްދިނުން މަޖުބޫރު ސިޔާސީ ބައެއް ނޫން ކަމުގައެވެ.
އަދި ސިވިލްސާރވަންޓުން ދެއްވާ ޚިދުމަތުގައި ސިޔާސީ ފިކުރެއް ، ކުލައެއް ، ވަހެއް އަދި ރަހައެއް އޮވެގެން ނުވާނެ ކަމުގައިވެސް، މިޖަލްސާގައި ގައުމާ މުޚާތަބްކުރައްވާ ވާހަކަފުޅު ދައްކަވަމުން ރައީސުލްޖުމްހޫރިއްޔާ ވިދާޅުވެފައި ވެއެވެ.
ސިވިލް ސާވިސް މުވައްޒިފުންގެ ދައުރާ ބެހޭގޮތުން އިތުރަށް ވާހަކަ ދައްކަވަމުން ރައީސް ވިދާޅުވެފައިވަނީ، ސިވިލް ސާވިސްގައި މަސައްކަތް ކުރާ ހުރިހާ މުވައްޒިފުންވެސް ވާންޖެހޭނީ، އަދި މުވައްޒަފުން ކުރައްވަންޖެހޭނެހާވެސް ކަމަކީ ސަރުކާރުގެ ސިޔާސަތާއި ވަޢުދުތައް އޭގެ ގޮތުގައި ތަންފީޛު ކުރެއްވުން ކަމުގައެވެ. އެއީ ދިވެހި ރައްޔިތުންނަށް ޚިދުމަތް ކުރަން ތިބި ގައުމީ ޚިދުމަތުގެ ފައުޖު ކަމުގައި ރައީސް ވިދާޅުވިއެވެ.
ޖުމްހޫރީ ދުވަހުގެ ރަސްމީ ޖަލްސާގައި، ސިވިލް ސާވިސް މުވައްޒިފުންނަށް އެމުވައްޒިފަކު ބޭނުންވާ ސިޔާސީ ވިސްނުމަކަށް ނިސްބަތްވުމުގެ ފުރުސަތު އޮންނަން ޖެހޭނެ ކަމަށް ރައީސް ވިދާޅުވެފައިވާއިރު، ސިވިލް ސާރވިސް މުވައްޒަފުންނަށް ސިޔާސީ ހަރަކާތުގައި ނޫޅެވޭނެގޮތަށް ސިވިލް ސާވިސް ޤަވާއިދަށް ސިވިލް ސާވިސް ކޮމިޝަނުން ދާދިފަހުން ގެނައި އިޞްލާހާއި ގުޅިގެން ސަރުކާރަށް ގިނަ ބައެއްގެ ފާޑިކުއުންވަނީ އަމާޒުވެގެން ގޮސްފައެވެ.
ސިވިލް ސާރވިސް ޤަވާއިދަށް އަލަށް ގެނައި އިޞްލާހުގައި ބުނެފައިވާގޮތުން، މަސައްކަތުގެ ރަސްމީ ނުވަތަ ނުރަސްމީ ގަޑީގައިވެސް މަސައްކަތުގައި އުޅޭ އެއްވެސް ވަގުތެއްގައި، އެއްވެސް ސިޔާސީ ހަރަކާތެއްގައި ބައިވެރިވުން ވަނީ ކުށެއްގެ ގޮތުގައިކަމަށް ކަނޑައަޅައި، އެއީ ވަޒީފާއިން ވަކިކުރެވޭފަދަ ކުށެއްގެ ގޮތުގައި ބަޔާންކޮށްފައެވެ.
ކޮމެންޓު ފޮނުވާ