ސައުދީ ރަސްގެފާނު ސަލްމާން ބިން އަބުދުލް އަޒީޒް އަލް ސައުދު އެގައުމުގެ ރަސްކަމުގެ ތަޚުތަށް އިސްވެވަޑައިގަތްތާ 7 އަަހަރު ފުރުން ސައުދީ އަރަބިއާގައި ފާހަގަ ކޮށްފިއެވެ.
ބައިޢަރ ގެ ނަމުގައި ސައުދީގައި ކޮންމެ އަހަރުކުވެސް ފާހަގަ ކުރާ މިދުވަހަކީ، ސައުދީ ރައްޔިތުން ކިންގ ސަލްމާންގެ ރަސްކަން ގަބޫލުކޮށް، ރަސްގެފާނާ ބައިޢަތު ހިފި ދުވަހުގެ ގޮތުގައި އެގައުމުގައި ފާހަގަ ކުރާ ދުވަހެވެ.
ކިންގ ސަލްމާން ސައުދީ ރަސްކަމަށް އިސްވެވަޑައިގަތީ 2015ވަނަ އަހަރުގެ ޖެނުއަރީ މަހުގެ 23ވަނަ ދުވަހުއެވެ. ހިޖުރީ ސަނަތުން އެދުވަހަކީ، 1436 ވަނަ އަހަރުގެ ރަބީޢުލް އާޚިރު މަހުގެ 3 ވަނަ ދުވަހެވެ. މި އަހަރުގެ ހިޖުރީ ސަނަތުން ރަބީއުލް އާޚިރު މަހުގެ 3 ވަނަ ދުވަސްވަނީ މިހަފްތާގެ އަންގާރަ ދުވަހަށެވެ.
މިއަދުގެ މުނާސަބަތުގައި ސައުދީގެ ގިނަ ރައްޔިތުންވަނީ ސޯޝަލް މީޑިއާގައި މިދުވަސް ފާހަގަކޮށް ރަސްގެފާނަސް ބައިއަތު ހިފާކަމުގެ ޝުޢޫރުތައް ފާޅު ކޮށްފައެވެ.
It’s the 7th anniversary of HM @KingSalman’s accession to the throne. Long live the King ???????? #ذكري_البيعه_السابعه #الملك_سلمان https://t.co/Q0FvxEWrqn
— Fadila Al Jaffal (@FadilaAlJaffal) November 8, 2021
ސައުދީ އަރަބިއާގެ ރަސްކަން ވާރުތަވަމުން އަންނަނީ އެގައުމުގެ ބާނީ އިބުނި ސައުދުގެ ދަރިފަސްކޮޅުންނެވެ. އޭނާގެ އަސްލު ނަންފުޅަކީ، އަބުދުލް އަޒީޒު އަބުދުއްރަހުމާން އަލް ސައުދުއެވެ. ދުނިޔޭގެ އަލިކަން ދެކެވަޑައިގަތީ 1875ވަނަ އަހަރުގެ ޖެނުއަރީމަހުގެ 15ވަނަ ދުވަހުއެވެ. އަވަހާރަވީ 1953ވަނަ އަހަރުގެ ނޮވެމްބަރު މަހުގެ 9 ވަނަ ދުވަހުއެވެ.
އިބުނި ސައުދު ސައުދީ އަރަބިއާ އެއްގައުމެއްގެ ގޮތުގައި އުފެއްދުމުގެ ކުރިން އޭނާއަކީ ސައުދީ އަރަބިއާގެ އަވަށެއްގެ ވެރިއެކެވެ. އަދި ކަމުވޮށިގެންވާ ބޭފުޅެއްވެސް މެއެވެ. އަދި އޭނާ ސައުދީ ރަސްކަމަށް 1902ވަނަ އަހަރު އިސްވެ ވަޑައިގަތުމުގެ ކުރިންވަނީ، އޭރުގެ ނަޖުދު ކަރައިގެ އަމީރުކަމާއި، ރަސްކަމުގެ އިތުރުން ހިޖާޒް ކަރައިގެ ރަސްކަންވެސް ކުރައްވާފައެވެ.
އަބުދުލް އަޒީޒުއަކީ (އިބުނި ސައުދު)، ނަޖުދު ކަރައިގެ އަމީރު އަބުދުއްރަހުމާން ބިން ފައިސަލް ދަރިކަލުންނެވެ. 1890 ވަނަ އަހަރު މި އާއިލާ ސައުދީގެ މިހާރުގެ ވެރިރަށް ރިޔާދުން ބޭރު ކުރެވުނެވެ. އެހެންނަމަވެސް އަބުދުލް އަޒީރު 1902 ވަނަ އަހަރު ރިޔާދު އަލުން ހިފިއެވެ. އެއަށްފަހު 30 އަހަރުވަންދެން އޭނާ ރިޔާދުގެ ވެރިކަން ކުރެއްވިއެވެ. އެމުއްދަތުގައި އޭނާ މެދުތެރޭ އަދި އުތުރު އަރަބިއާގެ ސަރަހައްދުތަކަށް އޭނާގެ ބާރުތައް ފުޅާކުރެއްވިއެވެ. އަދި 1922 ވަނަ އަހަރު މުޅި ނަޖުދު ކަރައަށް އޭނާގެ ބާރުތައް ފަތުރުއްވާ 1925ވަނަ އަހަރު ހިޖާޒްކަރަވެސް އޭނާގެ ބާރގެދަށް ގެންނެވިއެވެ.
މިގޮތުން އޭނާ ބާރުތައް ފުޅާ ކުރައްވާ، ބާރުގެ ދަށުގައިވާ ސަރަހައްދުތަކަކީ ސައުދީ އަރަބިއާގެ ގޮތުގައި ކަނޑައަޅުއްވާ އޭނާ މިހާރުގެ ސައުދީ އަރަބިއާ އުފެއްދެވިއެވެ.
