އދ. ދަނގެތީގެ ވިޔަފާރިވެރިއެއްކަމަށްވާ މަޙުމޫދު އަބޫބަކުރު މަރާލުމަށްފަހު މަރާލާފައި އެއްލާލާފައޮތް ވަޅާއި ހަމައަށް މަހުމޫދު ގެންދިޔައީ އެ ރަށުގައި އުޅުނު ބިދޭސީއެއް ކަމަށްވާ ޝާ އަލޮމް މިއާ (ސާލިމް)ކަމަށް ތަހުގީގުން އެގިއްޖެއެވެ.
ފުލުހުންގެ ތަހުގީގުގައި މިހާތަނަށް މިމަރުގެ ގިނަ ހޯދުންތަކެއް ވަނީ ހޯދާފައެވެ. ފުލުހުންގެ ހޯދުންތަކާއި ގުޅޭ ތަހުގީގަށް ހުރަސް ނޭޅޭ ވަރުގެ މައުލޫމާތުތަކެއް ވަނީ ދަނގެތި ކައުންސިލާއި، އާއިލާއަށް ހިއްސާ ކޮށްފައެވެ. މިތަހުގީގުގައި ފުލުހުން ވަނީ މަހުމޫދު މަރާލުމުގައި ސާލިމް އަމަލުކޮށްފައިވާ ގޮތާއި، މަރާލުމާއި ހަމައަށް ދިޔަގޮތްވެސް ހޯދާފައެވެ.
މީގެ އިތުރުން އެރަށުގައި ހުރި ސީސީޓީވީ ފުޓޭޖްތަކާއި، މަހުމޫދު މަރާލިކަމަށް ބުނާ ގަނޑީގައި ބިދޭސީ މީހާ އުޅޭގެ ނެދުންގޭގެ ބޭރުން ދިޔަ އަންހެން މީހާއާގެ ބަސްވެސް ހޯދާފައެވެ. ސާލިމް ބުނެގެން މަހްމޫދު ގެއިން ނުކުމެގެން ދިޔައީ އެ ރޭ ސާފް ޗެމްޕިއަންޝިޕްގައި ރާއްޖެ އާއި އިންޑިއާ ކުޅުނު މެޗު ނިންމާފައި ކަމަށް އާއިލާގެ ބައެއް މީހުން ބުންޏަސް އެއީ އޮޅުމެކެވެ. މެޗު ފެށި ގަޑީގައި މަހްމޫދު ދަނީ ސާލިމާ އެކު ނެދުންގެއަށެވެ.
ސާލިމް ވަނީ މަހުމޫދު އެގެއަށް ވެއްދުމަށްފަހު އޭނާގެ މަންމަ ބަލިވެ އެޅޫކަމަށާއި، ފައިސާ ބޭނުންވާކަމަށް ބުނެފައެވެ. ގިނަ އަދަދެއްގެ ފައިސާ އަބަދުވެސް އަތުގައި ގެންގުޅޭ މަހުމޫދު ފަިއސާ ދޭން ދެކޮޅު ހެދުމުން، ދެމީހުންގެ ދެމެދުގައި ހިނގި ހަމަނުޖެހުމެއްގައި މަހުމޫދަށް ވަނީ އެކި ވަރުގެ އަނިޔާވެފައެވެ. މިހަނުޖެހުމުގައި ބޮލަށް ލިބުނު އަނިޔާއާއިއެކު ސާލިމްވަނީ މަހުމޫމަށް ވަޅިން ހަމަލާދީފައެވެ. އަދި ހަމަލާ ދިނުމަށްފަހު ހަށިގަނޑު މަހުމޫދު ފެނުނު ވަޅާއި ހަމައަށް ކޮޑުގައި ގެންދިޔައީ ސާލިމްއެވެ. މިކަމުގައި އިތުރު އެއްވެސް މީހެއްގެ އެހީ ހޯދާފައި ނުވާކަން ފުލުހުންގެ ތަހުގީގަށް ވަނީ އެނގިފައެވެ.
ސާލިމް ތަހުގީގަށް ކިޔައިދިން ގޮތުގައި އެންމެ ފުރަތަމަ ދިން ހަމަލާތަކަށް ފަހު މަހްމޫދު މަރެއް ނުވެއެވެ. މަރުވީ ފަހުން އެހެން ވަޅިއަކުން ހަމަލާތެއް ދިނުމުންނެވެ. މަހްމޫދުގެ ހަށިގަނޑުގައި ހުރި ޒަހަމްތައް ރަނގަޅަށް ފެނުނު މީހުންގެ ވާހަކަތަކާ މި ވާހަކަ ދިމާވެއެވެ. އެއީ ތޫނު އެއްޗަކުން ހަމަލާ ދީފައި ހުރި އިރު ދެ ސައިޒެއްގެ ވަޅިއަކުން ދީފައި ހުރި ހަމަލާތައް ހުރުމެވެ. މީގެ އިތުރުން ދަމާފައި ގެންދިޔަ ކަމަށް ބުނާ ބުނުމާ ބުރަކަށީގައި ހުރި، މަށައިގެން ގޮސްފައި ހުރި ޒަހަމާ ދިމާވެއެވެ. މަހްމޫދު ވެއްޓި ބޮލަށް އަނިޔާވި ކަމަށް ބުނާ ވާހަކައާ، ބޮލުގެ ނުފުށުގައި ހުރި ޒަހަމާ ދިމާވެއެވެ.
މި މައްސަލަގައި ފުލުހުން މިހާތަނަށް ހިންގާފައިވާ ތަޙުގީގަށް ބަލާއިރު، ސާލިމް މަޙުމޫދު މަރާލާފައިވަނީ އޭނާގެ އަތުން ފައިސާ ހޯދަން އުޅުމުގެ ތެރޭގައިކަމަށް ފުލުހުންގެ ތަޙުގީގަށް ވަނީ އެނގިފައެވެ. ނަމަވެސް މި ތަޙުގީގާ ގުޅޭގޮތުން ފުލުހުން ހަމައެކަނި ބުނެފައިވަނީ މިކަމުގައި ބިދޭސީ މީހާ ފިޔަވައި އިތުރު މީހަކު ޝާމިލުނުވާކަމަށެވެ.
މި ތަހުޤީގުގެ ތެރެއިން ފުލުހުން ވަނީ ހާދިސާ ހިނގި ސަރަޙައްދަށް ސާލިމް ގެންގޮސް، އޭނާ ކަން ކުރި ގޮތް ކުޅުވާފައެވެ. މަޙުމޫދު މަރާލާފައިވަނީ ސާލިމް ދިރިއުޅުނު ގޭގައެވެ. އަދި މަރާލުމަށްފަހު ބޮލާ ފައިކޮޅަށް ގޯންޏެއް ލުމަށްފަހު އެއްލާލާފައިވަނީ ސާލިމް ދިރިއުޅޭގެ ކައިރީ ހުރި ފަޅުގެއަކަށެވެ. މި މައްސަލައިގައި ފުލުުން ވަނީ ގިނަ ހެކިތަކެއް ހޯދާފައެވެ. މަޢުލޫމާތު ލިބޭގޮތުގައި މަޙުމޫދުގެ ފޯނާ ވޮލެޓުފަދަ ތަކެތިވެސް ވަނީ ހޯދާފައެވެ. އަދި މަޙުމޫދަށް ޙަމަލާދިނުމަށް ބޭނުންކުރިކަމަށް ޝައްކުކުރެވޭ ތަކެތިވެސް ހޯދާފައިވާކަމަށް ފުލުހުން ވިދާޅުވެއެވެ.
