މިހާރު ހައްޔަރު ކޮށްފައިވާ މިޔަންމާގެ މަދަނީ ލީޑަރު، އަން ސަން އޫކީގެ ގާތް އެކުވެރިޔަކު، ދައުލަތަށް ޚިޔާނާތްތެރި ވުމުގެ ކުށުގައި، 20 އަހަރަށް ޖަލަށް ލާން، މިޔަންމާގެ މިލިޓަރީ ޖުންޓާއިން ހުކުރު ދުވަހު ހުކުމް ކޮށްފައިވާ ކަމަށް އޭނާގެ ގާނޫނީ ވަކީލުން މައުލުމާތު ދީފއެވެ.
މިއަހަރުގެ ފެބްރުއަރީ މަހުގެ 1 ވަނަ ދުވަހި، މިޔަންމާގައި އޮތް މަދަނީ ސަރުކާރު ވައްޓާލާ އެގައުމުގެ އަސްކަރިއްޔަގެ ބާރުގެ ދަށަށް މިޔަންމާ ގެނައިފަހުން، އެގައަމުގައި ސިޔާސީ ހަމަނުޖެހުންތައް ހިނގާ އަދި މުޒާހިރާތަށް ކޮންޓޮރޯލުކުރުމަށް އަސްކަރިޔާއިން ދިން ހަމަލާތަލަކުގައި އާންމުން 1100 މީހަކު މާހަތަނަށް އައިއިރު ވަނީ މަރުވެފައވެ.
"ޔޫ ވިން ހެއިން 20 އަހަރަށް ޖަލަށް ލާން ހުކުމު ކޮށްފައިވަނީ، ސްޕެޝަލް ކޯޓުގެ އަރޓިކަލްގެ 124a އަށް ރިއާޔަތްކޮށް،" އޭނާގެ ގާނޫނީ ވަކޫލު، ނިންޓްތު ތުވިން އޭއެފްޕީ ނޫސް އޭޖެންސީއަށް މައުލޫމާތު ދެމުން ބުނެފައި ވެއެވެ. އަދި އޭނާ ބުނެފައިވަނީ މަތީ ކޯޓުތަކުުގައި މި ނިންމުން އިސްތިއުނާފް ކުރައްވާނެ ކަމުގައެވެ.
މިޔަންމާގެ ގަނޫނުހަދާ މަޖިލިހުގެ ކުރީގެ މެމްބަރެއް ކަމުގައިވާ ޔޫ ވިން ހެއިންއަކީ ޝަރީއަތް ކުރުމަށްފަހު، މިލިޓަރީ ޖުންޓާއިން ޖަލަށް ލާން ހުކުމް ކުރި، އަންގ ސަން ސޫކީގެ ޕާޓީ ކަމުގައިވާ ނޭޝަނަލް ލީގު ފޯރ ޑިމޮކްރަސީއަށް ނިސްބަތްވާ އެންމެ އިސް ފަރާތެވެ.
އުމުރުން މިހާރު 80 އަހަރުވެފައިވާ ޔޫ ވިން ހެއިންއަކީ، މިޔަންމާގެ އަސްކަރިއްޔާއާއި ދެކޮޅަށް ކެމްޕޭން ކޮށްގެން އޭނާގެ ހަޔާތުގެ ބޮޑުބައި ޖަލުގައި ހޭދަ ކުރައްވާފައިވާ ފަރާތެކެވެ. އެތައް ފަހަރެއްގެ މަތިން އޭނާވަނީ ޖަލަށްލެވި އަދި ޖަލުން މިނިވަން ވެސް ކޮށްއެވެ.
އަންގ ސަން ސޫކީގެ އެންމެ ގާތް ފަރާތުގެ ހައިސިއްޔަތުން، ސޫކީގެ އަސްލު ވިސްނުން އެންމެ ފުރިހަމަޔަށް ގިނަ ކަންކަމުގައި އެގޭނެ އެއް ބޭފުޅެއްގެ ގޮތުގައި، ދުނިޔޭގެ މީޑިއާއިންވެސް އަދި މިޔަންމާގެ ކޯކަލް މީޑިއާތަކުންވެސް ދެކޭ އެއްފަރާތަކީ ޔޫ ވިން ހެއިންއެވެ.
