އުންސުރު ހަމަނުވާ ސިޔާސީ ކޮންމެ ދަޢުވާޔަކީ މުޖްތަމަޢު ޤަބޫލުކުރާނެ ދަޢުވާއެއް ނޫން ކަމުގައި ކުރީގެ އުއްތަމަ ފަނޑިޔާރު ޑރ.އަހުމަދު އަބްދުﷲ ދީދީ ވިދާޅުވެއްޖެއެވެ.
ކުރީގެ އުއްތަމަ ފަނޑިޔާރު މިފަދަ ގޮތަކަށް ވިދާޅުވީ ކުރީގެ ޖެންޑަރ މިނިސްޓަރ ޒެނީޝާ ޝަހީދު ޒަކީއަށް ކުރާ ދައުވާ އަނބުރާ ގެންދެވުމަކީ އެންމެ ބުއްދިވެރި ގޮތް ކަމުގައި ރައްޔިތުންގެ މަޖިލީހުގެ ރައީސް، މުހައްމަދު ނަޝީދު ވިދާޅުވެ ކުރެއްވި ޓުވީޓާއި ގުޅިގެންނެވެ. ކުރީގެ އުއްތަމަ ފަނޑިޔާރު އަހުމަދު އަބްދުﷲ ދީދީ ވިދާޅުވީ ޤާނޫނުގެ ކުރިމަތީގައި ކޮންމެ މީހަކީވެސް ހަމަހަމަ މީހަކަށް ވަންޖެހޭކަމަށެވެ. އެއްވެސް މީހަކަށް ޤާނޫނުން ބޭރުން ފްރޭމްކޮށް، ދަޢުވާ އުފައްދައިގެން އުންސުރު ހަަމަނުވަ ސިޔާސީ ދައުވާ ކުރި ނަމަވެސް އެކަން މުޖުތަމައު ބަލައި ނުގަންނާކަމަށެވެ.
ވަކި މީހަކަށް ވީތީ ނޫން؛ ޤާނޫނުގެ ކުރިމަތީގައި އެންމެން ހަމަހަމަ ވެގެންވާއިރު، މީހުން ފްރޭމްކޮށް، ދަޢުވާ އުފައްދައިގެން ކުރާ، ޢުންޞުރު ހަމަނުވާ ސިޔާސީ ކޮންމެ ދަޢުވާޔަކީ މުޖްތަމަޢު ޤަބޫލުކުރާނެ ދަޢުވާއެއް ނޫން.
– ކުރީގެ އުއްތަމަ ފަނޑިޔާރު ވިދާޅުވިއެވެ.
އިދިކޮޅު ފަރާތްތަކުން ތުހުމަތުކުރާ ގޮތުގައި ސަރުކާރުން ދަނީ ކުރީގެ ވެރިކަމުގައި ވަޒީރުކަން ކުރެއްވި ބޭފުޅުންނާއި، ސިޔާސީ ބައެއް މަޤާމުތައް ފުރުއްވި ބޭފުޅުންނާއި ގުޅޭ އެކި މައްސަލަތައް ތަހުގީގްކޮށް ދައުވާ ކުރަމުންނެވެ. މިކަމުގައި ގިނަ ފާޑުކިޔުންތަކެއް ވަނީ ސަރުކާރަށް އަމާޒުވެފައެވެ.
ކުރީގެ ޖެންޑާ މިނިސްޓަރ ޒެނީޝާއަށް ދައުވާ ކުރި މައްސަލާގައި ރައީސް ނަޝީދު ވިދާޅުވެފައިވަނީ
ޒެނީޝާއަށް ދައުވާކޮށްގެން ދިވެހި މުޖުތަމައަށް ލިބޭނެ އިތުރު ރަނގަޅެއް ނުފެންކަމަށެވެ. މިކަމުގައި އެންމެ ބުއްދިވެރި ގޮތަކީ ޒެނީޝާއަށް ކުރާ ދައުވާ އެޗްއާރުސީއެމްއިން އަނބުރާ ގެންދިއުންކަމަށް ރައީސް ނަޝީދު ވިދާޅުވިއެވެ.
ކުރީގެ ޖެންޑަރ މިނިސްޓަރ ޒެނީޝާ އަށް ކުރާ ދައުވާގެ ސަބަބުން ދިވެހި މުޖުތަމައަށް ލިބޭނެ އިތުރު ރަނގަޅެއް ނުފެނޭ. ދައުވާ އަނބުރާ ގެންދެވުމަކީ ބުއްދިވެރި ގޮތް ކަމުގައި އަޅުގަނޑު ދެކެން.
– ރައީސް ނަޝީދު ވިދާޅުވިއެވެ.
މައުލޫމާތު ލިބިފައިވާ ގޮތުގައި ޒެނީޝާއަށާއި، އިތުރު އެހެން ބަޔަކަށް ދައުވާ ކުރުމަށް ފޮނުވާފައިވަނީ ކުރީގެ ރައީސް އަބްދުﷲ ޔާމީންގެ ވެރިކަމުގައި ކުޑަކުދިންގެ ހިޔާގައި ހިނގި ހަމަނުޖެހުމާ ގުޅިގެން ހަމަނުޖެހުން ކޮންޓްރޯލް ކުރުމަށް ބައެއް ކުދިން ފުލުހުންގެ ބެލުމުގެ ދަށަށް ގެންދިއުމުގައި ޤާނޫނާ ޚިލާފް ކަންތައްތަކެއް ކުރުމުންނެވެ. ކުދިން ގެންދިއުމަށްފަހު ދިމާވި އެކި މައްސަލަތައްވެސް ތަހުގީގުން ވަނީ ފާހަގަކޮށްފައެވެ.
މިމައްސަލާހައި ޕީޖީ އޮފީހުން ވިދާޅުވީ އެޗްއާރުސީއެމްއިން ފޮނުވާފައިވާ މައްސަލަ އެއޮފީހުން ދިރާސާ ކުރަމުންދާކަމަށެވެ. އަދި އަންނަ ހަފްތާގައި މިމައްސަލާގައި ގޮތެއް ނިންމާނެކަމަށެވެ. ޕީޖީ އޮފީހުންވެސް މިމައްސަލާގައި ދައުވާ ކުރަން ފޮނުވި މީހުންގެ މައުލޫމާތެއް ހާމަކޮށްފައި ނުވެއެވެ.
