އިނގިރޭސި ޕްރިމިއާ ލީގުގައި ހުކުރު ދުވަހުގެރޭ އަމިއްލަ ދަނޑުގައި އެސްޓަންވިލާ ބަލިކޮށް އާސެނަލް ލީގު ތާވަލުގެ ނުވަވަނަ އަށް ޖެހިލައިފިއެވެ.
އަމިއްލަ ދަނޑުގައި ކުޅުނު މެޗުން އާސެނަލް މޮޅުވީ 3-1 ގެ ނަތީޖާއަކުންނެވެ. މި މެޗުން އާސެނަލް މޮޅުވިއިރު، ލީގުގައި އެންމެ ފަހުން ކުޅު ހަ މެޗުންވެސް އެ ޓީމު ބަލިވެފައެއް ނުވެއެވެ.
އާސެނަލްގެ ފަރާތުން މޮޅު ކުޅުމެއް ފެނިގެންދިޔަ މި މެޗުގައި އެ ޓީމުން ލީޑު ނަގާފައިވަނީ ފުރަތަމަ ހާފުގެ 23 ވަނަ މިނެޓުގެ ތެރޭގައެވެ. މި ލަނޑު ތޯމާސް ޕާޓޭ ކާމިޔާބުކޮށްފައިވަނީ އެމިލް ސްމިތް ރޯވް ނަގައިދިން ހުރަހަކުންނެވެ. މިއީ ޕާޓޭ އާސެނަލްއަށް ކާމިޔާބުކޮށްދިން ފުރަތަމަ ލަނޑެވެ. އޭނާ އެ ޓީމާއި ގުޅުނީ މިދިޔަ ސީޒަނުގައެވެ.
ފުރަތަމަ ހާފު ނިމުމުގެ ކުރިން ކެޕްޓަން ޕިއޭ-އެމެރިކް އޮބާމަޔަން ވަނީ އެ ޓީމުގެ ލީޑު ފުޅާކޮށްފައެވެ. ފުރަތަމަ ހާފުގެ އިތުރު ވަގުތުގައި އޭރިއާ ތެރެއިން އާސެނަލުގެ އަލެކްސަންޑަ ލަކަޒޭޓަށް ވިލާގެ މެޓް ޓާގެޓް ކުރި ފައުލަކާ ގުޅިގެން ވީޑިއޯ އެސިސްޓަންޓް ރެފުރީ (ވީއޭއާރް) ބެލުމަށްފަހު އާސެނަލަށް ޕެނަލްޓީއެއް ދިންއިރު، އޮބާމަޔަން ފޮނުވާލި ޕެނަލްޓީ ވިލާގެ ގޯލްކީޕަރު އެމިލިއާނޯ މާޓީނޭޒް ވަނީ މަތަކޮށްފައެވެ. އެކަމަކު އޮބާމަޔަން ވަނީ ކީޕަރުގެ އަތުގައި ޖެހިފައި ނުކުތް ބޯޅަ ގޯލުގެ ތެރެއަށް ފޮނުވާލާފައެވެ.
މި މެޗުގައި އާސެނަލުން ތިންވަނަ ލަނޑު ކާމިޔާބުކޮށްފައިވަނީ ދެވަނަ ހާފު ފަށައިގެން 11 ވަނަ މިނެޓުގައެވެ. ކައުންޓަ އެޓޭކެއްގައި މި ލަނޑު އެ ޓީމަށް ކާމިޔާބުކޮށްދިނީ ސްމިތު ރޯވްއެވެ. އެކަމަކު މެޗު ނިމެން އަށް މިނެޓަށް ވެފައި ވަނިކޮށް ޖޭކޮބް ރަމްސީ ވަނީ ލަނޑެއް ޖަހައި، ވިލާއަށް ފަރަގު ކުޑަކޮށްދީފައެވެ.
މި މޮޅާއެކު އާސެނަލް ވަނީ ތާވަލުގެ ނުވަވަނައަށް ޖެހިލާފައެވެ. އެ ޓީމު ކުޅުނު ނުވަ މެޗުން 14 ޕޮއިންޓް ހޯދައިގެންނެވެ. އާސެނަލް އާއި އެއް އަދަދަކަށް ތާވަލުގެ ހަވަނަ ޔުނައިޓެޑް، ހަތްވަނަ ވެސްޓް ހޭމް، އަދި އަށްވަނަ އެވަޓަންއަށް ލިބޭއިރު އާސެނަލް ނުވަވަނައިގައި އޮތީ ފައިދާ ގޯލުގެ ތަފާތުންނެވެ.
