އދ. ދަނގެތީގައި އަނިޔާވެރިކަމާއެކު މީހަކު މަރާލާފައިވާ މައްސަލައިގެ ކަންބޮޑުވުން ފާޅުކޮށް، އެ ޢަމަލު ހިންގުމުގައި ބައިވެރިވެފައިވާ ފަރާތްތައް ހޯދާ އިންސާފުގެ ކުރިމައްޗަށް ގެނައުމަށް އިދިކޮޅު ޕްރޮގްރެސިވް ކޯލިޝަނުން ގޮވާލައިފިއެވެ.
އިދިކޮޅު ކޯލިޝަނުން ނެރުނ ބަޔާނެއްގައި ބުނެފައިވަނީ ދަނގެތީގައި ވަރަށް ރަހުމު ކުޑަ ގޮތަކަށް އެރަށުގެ ވިޔަފާރި ވެރިޔެއް ކަމަށްވާ މަޙަމުދު އަބޫބަކުރު މަރާލާ ފަޅު ގެއެއްގެ ވަޅަކަށް އެއްލާލާފައިވާ މައްސަލައިގެ ކަންބޮޑުވުން ފާޅު ކުރަނީ އެހާމެ ބިރުވެރިކަމާއެކުގައި ކަމަށެވެ.
މަރްޙޫމް މަޙަމޫދު އަބޫބަކުރު އަނިޔާވެރި ގޮތަކަށް މަރާލުމުގެ ފަހަތުގައިވާ ސަބަބުތައް ހޯދުމަށާއި، މިޢަމަލު ހިންގުމުގައި އެކި ގޮތްގޮތުން ބައިވެރިވެފައިވާ ހުރިހާ ފަރާތްތަކެއް އިންސާފުގެ ކުރިމައްޗަށް ގެނައުމަށް ކުރެވޭ މަސައްކަތް އަވަސް ސްޕީޑެއްގައި ކޮށް، އެފަރާތްތައް އިންސާފުގެ ކުރިމައްޗަށް ގެނެސް ޤާނޫނުތަކުން ކަނޑައަޅާފައިވާ އެންމެ ހަރުކަށި އަދަބު ދިނުމަށް ކަމާ ބެހޭ އެންމެހާ މުއައްސަސާތަކަށް އިދިކޮޅުން ވަނީ ގޮވާލާފައެވެ. އަދި އދ. ދަނގެއްޗަށް ކުރިމަތިވެފައިވާ ބިރުވެރިކަމުން އެ ރަށުގެ ރައްޔިތުން ސަލާމަތް ކުރުމަށްޓަކައި އަޅަން ޖެހޭ އެންމެހާ ފިޔަވަޅުތައް އަވަސް ކުރުމަށްވެސް ވަނީ ގޮވާލާފައެވެ.
އދ. ދަނގެތީ މޮނަލާޒު އަލްމަރްހޫމް މަޙަމޫދު އަބޫބަކުރުގެ ފުރާނަފުޅަށް މާތް ﷲ ސުބުޙާނަހޫ ވަތަޢާލާ ރަޙްމަތް ލައްވާ، ފާފަ ފުއްސަވާ، ސުވަރުގޭގެ މަތިވެރި ނިޢުމަތް މިންވަރު ކުރައްވާށި، އާމީން. އަދި އަލްމަރްޙޫމް މަޙަމޫދު އަބޫބަކުރުގެ ޢާއިލާ އަށާއި ދަނގެތީ ރައްޔިތުންނަށް ކުރިމަތިވެފައިވާ ފުން ހިތާމައިގައި ކޯލިޝަންގެ އެންމެހާ މެންބަރުން ބައިވެރިވެ، މަރްޙޫމްގެ ޢާއިލާއާއި ދަނގެތީ ރައްޔިތުންނަށް ރައީސް ޢަބްދުﷲ ޔާމީން ޢަބްދުލްޤައްޔޫމާއި ކޯލިޝަންގެ ލީޑާރޝިޕާއި، ކައުންސިލް މެންބަރުންނާއި، ޕާލަމަންޓްރީ ގްރޫޕްގެ މެންބަރުންނާއި ސްޓިއަރިންގ ކޮމިޓީތަކާއި އަދި މިކޯލިޝަނަށް ނިސްބަތްވާ ދެ ޕާޓީގެ އެންމެހާ މެންބަރުންގެ ނަމުގައި ތަޢުޒިޔާ ދަންނަވާ، މަރްޙޫމްގެ ޢާއިލާއަށް ކެތްތެރިކަން މިންވަރު ކުރެއްވުމަށާއި މި އަނިޔާވެރި ޢަމަލު ހިންގި ފަރާތްތައް އިންސާފުގެ ކުރިމައްޗަށް ގެނައުމަށް ކުރެވޭ މަސައްކަތުގައި ކާމިޔާބީ މިންވަރު ކުރެއްވުން އެދި ދުޢާ ކުރަން.
– އިދިކޮޅު ބަޔާނުގައި ވެއެވެ.
އަނިޔާވެރި ގޮތަކަށް މަރާލާފައި އޮއްވައި އިއްޔެ ފެނުނު އދ.ދަނގެތީ މޮނަލާޒް، މަހްމޫދު އަބޫބަކުރުގެ ޖަނާޒާ ބާއްވައިފައިވަނީ މިއަދު އަސްރު ނަމާދަށް ފަހުއެވެ. ދަނގެތީގައި މަރާލާފައި ފަޅުވަޅަކަށް އެއްލާލާފައި އޮއްވައި މަޙުމޫދުގެ ހަށިގަނޑު ފެނުނީ ގެއްލިގެން ހޯދަމުންދަނިކޮށް އިއްޔެ މެންދުރުފަހުގެ ވަގުތެއްގައެވެ. މަޙުމޫދުގެ މަރާ ގުޅިގެން އިތުރަށް ބަލަންޖެހޭކަންކަން ބެލުމަށް ދަނގެއްޗަށް ފުލުހުންގެ ފޮރެންސިކް ޓީމް ދިޔައީ ރޭ 08:30ހާއިރުއެވެ.
މަންޒަރު ދުށް ފަރާތްތަކުން ބުނާގޮތުގައި މަހްމޫދުގެ ހަށިގަނޑުގައި، ވަޅިން ހަލަމާދީފައިވާ ނިޝާންތައް ހުއްޓެވެ. އަދި ވަޅުން ނެގިއިރުވެސް ލޭގެ އަސަރު ވަރަށްބޮޑަށް ހުއްޓެވެ. މަޙުމޫދަށް ޙަމަލާދޭން ބޭނުންކުރިކަމަށް ޝައްކުކުރެވޭ ބައެއް ތަކެތިވެސް، އޭނާ އެއްލާލާފައޮތް ވަޅުން ފެނިފައިވާކަމަށްވެއެވެ. މަޙުމޫދު މަރާލިކަމަށް، ރަށުގެ ރައްޔިތުން ޝައްކުކުރާ 3 މީހަކު ވަނީ ފުލުހުންނާ ހަވާލުކޮށްފައެވެ. މީގެތެރޭގައި ހިމެނެނީ 2 ފިރިހެނުންނާ އަންހެނެކެވެ. މި 3 މީހުން އަދިވެސް ތިބީ ދަނގެތީ ފުލުހުންގެ ބެލުމުގެދަށުގައެވެ.
