އުތުރު ތިލަފަޅުގައި ޑޮކްޔާޑަކާއި ބަނދަރެއް ހަދަން ސަރުކާރުން އިންޑިއާއާ އެކު ވެފައިވާ އެއްބަސްވުން ހަތް ދުވަހުތެ ތެރޭގައި ހާމަކުރުމަށް އިންފޮމޭޝަން ކޮމިޝަނަރުގެ އޮފީހުން ޑިފެންސް މިނިސްޓްރީއަށް މިއަދު އަންގައިފިއެވެ.
މި މައްސަލައާ ގުޅިގެން މިއަދު އިންފޮމޭޝަން ކޮމިޝަނަރުގެ އޮފީހުގައި އޮތް އަޑުއެހުމުގައި އިންފޮމޭޝަން ކޮމިޝަނަރު އާހިދު ރަޝީދު ވިދާޅުވީ މި މައްސަލާގައި ޑިފެންސް މިނިސްޓްރީން ބުނި ގޮތަށް އުތުރުތިލަފަޅު އެއްބަސްވުމާ ގުޅޭ މައުލޫމާތަކީ ޤައުމީ ސަލާމަތަށް ނުރައްކާވާނެ ފަދަ މައުލޫމާތު ކަމުގައި ޤަބޫލުނުކުރެވޭ ކަމަށެވެ. ދިޔަރެސް ނޫގުގެ ފަރާތުން އަޒާން އެދުނީ އުތުރުތިލަފަޅު އެއްބަސްވުމުގައި ހިމެނޭ ކަންކަމުގެ ތެރެއިން މައިގަނޑު ހަކަމެއްގެ މައުލޫމާތު ހާމަކޮށްދިނުމަށެވެ.
ދިޔަރެސް އިން ހޯދަން އެދުނު މައުލޫމާތު ތައް:
1. އެއްބަސްވުމުގެ ދަށުން ދިވެހިރާއްޖޭގައި އިންޑިއާގެ "ޓެކްނިކަލް" ފަރާތްތަކެއް ތިބޭނެ ކަމަށް ބުނެފައިވާއިރު އެ މީހުން ނިސްބަތްވާ މުއައްސަސާ.
2. އެއްބަސްވުމުގެ ދަށުން އިންޑިއާ މީހުންނަށް ރާއްޖޭގައި ތިބެވޭނެ މުއްދަތު.
3. އެއްބަސްވުމުގެ ދަށުން "ޓެކްނިކަލް" މީހުންގެ ގޮތުގައި ތިބޭނޭ އިންޑިއާގެ ކިތައް މީހުންކަން.
4. އެއްބަސްވުމުގެ ދަށުން ދީފައިވާ 50 މިލިއަން ޑޮލަރުގެ ލޯނުގެ އިންޓަރެސްޓް ރޭޓާއި އަނބުރާ ދައްކަން ޖެހޭ މުއްދަތު އަދި އެފަދަ އެހެނިހެން ތަފްސީލު.
5. އެއްބަސްވުމުގެ ދަށުން އަންނަ "ޓެކްނިކަލް" ފަރާތްތަކަށް ޑިޕްލޮމެޓިކް އިމުނިޓީ ލިބޭނެނަމަ އެކަމުގެ ތަފްސީލު.
6. އެއްބަސްވުމުގެ ދަށުން އަންނަ "ޓެކްނިކަލް" ފަރާތްތަކުގެ އެކޮމޮޑޭޝަން، ކެއުމުގެ ހަރަދު، އަދި އެހެނިހެން ހަރަދުތައް ދިވެހި ސަރުކާރުން ބަލަހައްޓާނަމަ އެކަމުގެ ތަފްސީލު.
އެ ހަ ނުކުތާގެ ތެރެއިން އުތުރުތިލަފަޅު މަސައްކަތަށް އިންޑިޔާގެ އެގްޒިމް ބޭންކުން ނެގި ލޯނުގެ އެއްބަސްވުމަކީ ޑިފެންސް މިނިސްޓްރީން ވެފައިވާ އެއްބަސްވުމެއް ކަމުގައިނުވާތީ އެ ލޯނާ ގުޅޭ މައުލޫމާތު ނެތްކަމަށް ޑިފެންސުން ބުނެފައިވެއެވެ.
ހޯދަން އެދުނު މައުލޫމާތުތަކުގެ ތެރެއިން ލޯނާއި ގުޅޭ އެއްބަސްވުމެއްގައި ޑިފެންސް މިނިސްޓްރީން ސޮއި ކޮށްފައި ނުވާތީ އެމައުލޫމާތު ދެވެން ނެތް ކަމަށް ޑިފެންސް މިނިސްޓްރީން އެންގިކަން އިންފޮމޭޝަން ކޮމިޝަނަރު ފާހަގަ ކުރެއްވެވިއެވެ. ކޮމިޝަނަރު ވިދާޅުވީ އެކަމާއި ގުޅޭ މައުލޫމާތު ހުރި އިދާރާއަކަށް ބަދަލުކުރުމަކީ ގާނޫނު އޮތް ގޮތުން ޑިފެންސް މިނިސްޓްރީގެ ޒިންމާއެއް ކަމަށެވެ. އެމައުލޫމާތު ހޯދުމަށް ފަހު މައުލޫމާތު ހޯދަން އެދުނު ފަރާތައް މައުލޫމާތު ފޯރުކޮށްދޭން އިންފޮމޭޝަން ކޮމިޝަނަރު އެންގެވިއެވެ.
