ކިތަންމެ ބޮޑު ސެކިއުރިޓީއަކާއިއެކުވެސް ދެދަރިން ބޭނުންވަނީ ބައްޕަގެ ސެކިއުރިޓީ ކަށަވަރު ކުރަންކަމުގައި ރައްޔިތުންގެ މަޖިލީހުގެ ރަައީސް މުހައްމަދު ނަޝީދު ވިދާޅުވެއްޖެއެވެ.

މަޖިލީހުގައި ބޭއްވި ނޫސްވެރިންގެ ބައްދަލުވުމުގައި ރައީސް ނަޝީދު ވިދާޅުވީ އެމަނިކުފާނުގެ ސަލާމަތާއި ގުޅޭގޮތުން އެންމެ ބޮޑަށް ސުވާލު އުފައްދަވަނީ ދެ ދަރިންކަމަށެވެ. ދެ ދަރިންގެ މިހާރުވެސް ސަލާމަތީ ކަންކަމުގައި ކަންބޮޑުވުން އޮތްކަމަށާއި، އަދި ކޮންމެ ފަދަ ސެކިއުރިޓީއެއް ދެއްވައިގެންވެސް ސަލާމަތީ ކަންކަން ކަށަވަރު ކުރުމަކީ ދެކުދިންގެ އެންމެ ބޮޑަށް އެދޭކަމެއްކަމަށެވެ.

ސަލާމަތާއި ރައްކާތެރިކަމަށް ހިތްހަމަ ނުޖެހޭ ދެމީހުންނަކީ ދެދަރިން. އެކުދިން ދެކެނީ އެމަނިކުފާނަށް ނުރައްކާތެރިކަން ބޮޑުކަމަށް. ސަލާމަތްތެރިކަން ބޮޑުކަމަށް. ނޯތު ކޮރެއާގެ ވެރިއާ ތަންތަނަށް ގެންދާ ގޮތަށޭ ތަންތަނަށް ގެންދަނީ. ދެކުދިން ބޭނުންވަނީ ބައްޕަ ސަލާމަތުން ހުރުން. ކޮންމެ ކޮރެއާއެއް ބޭނުންކޮށްގެންވެސް ރައްކާތެރިކަން ކަށަވަރު ކުރުން.

– ރައީސް ނަޝީދު ވިދާޅުވިއެވެ.

ރައީސް ނަޝީދު ވިދާޅުވީ އެމަނިކުފާނު މިވަގުތު ހޮޓެލް ޖެންގައި ހުންނެވީ ސަރުކާރުން ކަނޑައަޅާފައިވާ ގެ ނުނިމިގެންކަމަށެވެ. އެތަން ނިމުމުން އެގެއަށް ބަދަލުވާނެކަމަށެވެ. އެމަނިކުފާނު ބޭނުންވަނީ ގެކޮޅުގައި ހުންނެވުމަށް ކަމަށާއި، ނަމަވެސް ސަލާމަތީ ބާރުތަކުން އެކަމަށް ހުއްދަ ނުދެއްވާކަމަށް މަޖިލިސް ރައީސް މުހައްމަދު ނަޝީދު ވިދާޅުވިއެވެ.

ރައީސް ނަޝީދު ވިދާޅުވީ އެމަނިކުފާނު އެނބުރި ރާޢްޖެއިން ވަޑައިގަންނަވާނެ ދުވަހެއް ދަންނަވަން ދަތިކަމަށެވެ. އެއީ ސަލާމަތީ ކަންކަން ހުރި ގޮތުން އެމައުލޫމާތު ހާމަކުރަން އެބޭފުޅުން ދެކޮޅު ހަދާކަމަށް މަޖިލިސް ރައީސް ވިދާޅުވިއެވެ.

ރައީސް ނަޝީދު ރާއްޖެ ވަޑައިގެންފައިވަނީ 5 މަސްދުވަހަށްވުރެ ގިނަ ދުވަހު ބޭސް ފަރުވާ ކުރައްވަން ރާއްޖެއިން ބޭރުގައި އުޅުއްވުމަށްފަހުއެވެ. ރައީސް ނަޝީދަށް މަރުޙަބާ ދެންނެވުމަށްޓަކައި، ދައުލަތުގެ އިސްވެރިންނާއި ރައްޔިތުންގެ މަޖިލީހުގެ މެމްބަރުންވެސް އެއަރޕޯޓަށް ވަޑައިގެންނެވިއެވެ. ރައީސް މުޙައްމަދު ނަޝީދު އަވަހާރަކޮށްލަން ދިން ޓެރަރިސްޓް ހަމަލާއާ ގުޅިގެން، މަޖިލީހުން ވަނީ ޕާލަމެންޓްރީ އިންކުއެރީއެއްވެސް ހަދާފައެވެ. މިއިންކުއަރީގެ ރިޕޯޓްގައި ފާހަގަކޮށްފައިވާ ގިނަ ކަންކަން އިސްލާހުކޮށް ދައުލަތުގެ ތިން ބާރުގެ ވެރިންގެ ސަލާމަތީ ކަންކަން ވަނީ ވަރުގަދަކޮށްފައެވެ. އެގޮތުން ތިންބާރުގެ ވެރިންނަށް ޚާއްސަ ގެކޮޅުވެސް ވަނީ ކަނަޑައަޅާފައެވެ.

ރައީސް ނަޝީދު އަވަހާރަކޮށްލަން އެއްޗެއް ގޮއްވާލައި ދިން ހަމަލާގައި އެމަނިކުފާނަށް ސީރިއަސް ޒަހަމްތަކެއް ލިބިވަޑައިގެން ގިނަ އޮޕަރޭޝަންތަކެއް ވަނީ ކޮށްފައެވެ. ރައީސް ނަޝީދަށް ހަމަލާދިނުމަށް ބޭނުންކުރި ބޮން ހަދާފައިވަނީ އެއިން ގިނަ ޢަދަދެއްގެ ރޭޒާފުކާއި ގެއްލުންދެނިވި އެހެނިހެން ތަކެތި ހިމަނައިގެންނެވެ. ބޮން ގޮއްވާލުމާއެކު އެތަކެތިވަނީ ރައީސް ނަޝީދުގެ ހަށިކޮޅުގެ ތެރެއަށް ވަދެފައެވެ. މިތަކެތި ނެގުމަށް ޑޮކްޓަރުންގެ ޓީމަކުންވަނީ 16 ގަޑިރުވަންދެން ސީރިއަސް އޮޕަރޭޝަންތަކެއް ކޮށްފައެވެ.

ޑޮކްޓަރުންގެ ޓީމުން ވިދާޅުވީ، ގޮއްވާލި ބޮމުން ބުރައިގެންދިޔަ ތޫނު ދަގަނޑު އެތިކޮޅުތަކުގެ ތެރެއިން އެތިކޮޅެއް، އެމަނިކުފާނުގެ ސީދާ ހިތަށް ނުވަދެ ހުރީ އެންމެ ސެންޓިމީޓަރެއްގެ ދުރުމިންކަމަށެވެ. މި އެތިކޮޅު ރައީސް ނަޝީދުގެ ހިތަށް ނުވަދެ ސަލާމަތްވީ އެމަނިކުފާނުގެ މޭކަށިގަނޑުގައި ޖެހި ކަށިގަނޑު ފުނޑުފުނޑުވުމުގެ ސަބަބުން އެ އެތިކޮޅު އެތެރެއަށް ދިޔުން މަތަވެގެންކަމަށްވެސް ޑޮކްޓަރުން ވަނީ ވިދާޅުވެފައެވެ.

ރައީސް ނަޝީދަށް ހަމަލާދިން މީހުންގެ ޝަރީއަތް ފަށާފައިވަނީ މިދިޔަ އޮގަސްޓް މަހުގެ 21ވަނަ ދުވަހުއެވެ. ރައީސް ނަޝީދަށް ދިން ޓެރަރިސްޓް ހަމަލާއާ ގުޅިގެން ދައުވާ އުފުލާފައިވަނީ ބޮން ގޮއްވާލުމުގައި އަމަލީ ގޮތުން ބައިވެރިވި، ވ.ތިނަދޫ ލަކީ އަދުހަމް އަހްމަދު (25)އާއި މއ.ފޭރުގެ މުޖާޒް އަހުމަދު (21)އާއި، ގއ. ކޮނޑޭ ފޮޅޭމާ ތަހުމީން އަހްމަދު (32) އަދި ނ. މަނަދޫ ނޫރީގެ އަލީ ހައިޝަމް (27)ގެ މައްޗަށެވެ.