މިއަހަރުގެ މެއި މަހުގެ 6 ވަނަ ދުވަހު ދިން ނުރައްކާތެރި ޓެރެރިސްޓް ހަމަލާއަށްފަހު ރައްޔިތުންގެ މަޖިލީހުގެ ރައީސް މުހައްމަދު ނަޝީދު މިއަދު ރާއްޖެ ވަޑައިގެންވުމަށް ހަމަޖެހިއްޖެއެވެ.

ރައީސް ނަޝީދު ރާއްޖެ ވަޑައި މިގަންނަވަނީ ފާއިތުވީ 6 މަސް ދުވަހު ބޭސްފަރުވާ ހޯއްދެވުމަށް ޖަރުމަނުގައާއި، އިނގިރޭސި ވިލާތުގައި އުޅުއްވުމަށްފަހުއެވެ. މައުލޫމާތު ލިބިފައިވާ ގޮތުގައި ދުބާއީގައި މިހާރު ހުންނެވި ނަޝީދު މިއަދު މެންދުރު ފަހު މާލެ ވަޑައިގަންނަވާނެއެވެ. އިނގިރޭސިވިލާތުން އެމަނިކުފާނު ދުބާއީއަށް ވަޑައިގަތީ އެ ގައުމުގައި އޮތް އެކްސްޕޯއަކަށެވެ.

ރައީސް ނަޝީދު ރާއްޖެ ވަޑައި ނުގަނެ މިހާ ދުވަހު މަޑު ކުރެއްވީ އެމަނިކުފާނުގެ އާއިލާއިންނާއި، އެކުރިންގެ އެދުމަށްކަމަށް ރައީސް ނަޝީދު ވަނީ ވިދާޅުވެފައެވެ. އަދި އެމަނިކުފާނުވަނީ މަޖިލިސްގެ ޗުއްޓީ އިތުރު ކުރައްވައި، ސަލާމަތީ ކަންކަން ހުރި ގޮތުން ރާއްޖެއަށް ވަޑައި ގެންނެވުމަށް އުޒުރުވެރިވާކަމަށް ވިދާޅުވެފައެވެ. ނަޝީދަށް ހަމަލާދިން ކަމަށް ތުހުމަތުކުރެވޭ މީހުން ހައްޔަރުކޮށް، އެ މީހުންގެ މައްޗަށް ދައުވާ އުފުލައި ޝަރީއަތް ވެސް ވަނީ ފަށައިފައެވެ. މި ހަމަލާގެ ފަހަތުގައި ވަނީ ހައްދުފަހަނާއެޅި ފިކުރުގެ ބައެއް ކަމަށް ތަހުގީގަށް އެނގިފައިވާ ކަމަށް ފުލުހުން ބުނެފައިވެއެވެ.

މޭއިމަހުގެ 6 ވަނަ ދުވަހުގެ ރޭ އެމަނިކުފާނު ދިރިއުޅުއްވާ ގ.ކެނެރީގެއިން ނިކުމެވަޑައިގެން ހިންގަވާފައި މަޖީދީމަގުގައި ޕާކުކޮށްފައިއޮތް ކާރުކޮޅަށް އަރާވަޑައިގަންނަވަނިކޮށް ބޮމެއް ގޮއްވާލައިގެން ދިން ޙަމަލާގައި އެމަނިކުފާނަށް ވަނީ ބޮޑެތި ޒަޚަމްތަކެއް ލިބިވަޑައިގެންފައެވެ. އެމަނިކުފާނަށް އެންމެ ފުރަތަމަ ފަރުވާދެއްވި އޭޑީކޭގެ ސްޕެޝަލިސްޓުންގެ ޓީމުންވެސް ވަނީ އެކަން ހާމަކުރައްވާފައެވެ.

ރައީސް ނަޝީދު މިއަދު ރާއްޖެ ވަޑައި ގަންނަވާއިރު، ނިމިދިޔަ އެމްޑީޕީގެ ޤައުމީ މަޖިލީހުގެ އިންތިޚާބުގައި އެމަނިކުފާނަށް ތާއީދު ކުރާ ކެނޑިޑޭންނަށް ވަނީ ނާކާމިޔާބުވެފައެވެ. އަދި ރައީސް ޞާލިހަށް ކާމިޔާބު ކުރާ ކެނޑިޑޭޓުން ވަނީ އިންތިޚާބު ކާމިޔާބު ކޮށްފައެވެ.