ބާރު ސްޕީޑުގައި ދުއްވަމުންދިޔަ ކާރެއް ރޭގެ ވަގުތެއްގައި މައްކާގެ ހަރަމްފުޅުގެ ތެރެއަށް ވަދެގަނެ ގެފުޅުގެ ވަށައިގެންވާ ސަރަހައްދުތަކަށް ބައެއް ގެއްލުންތަކެއް ދީފިއެވެ.
ޚަބަރު ލިބިފައިވާ ގޮތުގައި މިހާދިސާ ހިގާފައިވަނީ މައްކާގެ ގަޑިން ރޭ 10 ޖަހަން އުޅެނިކޮށެވެ. އެހެންނަމަވެސް މިހާދިސާގައި އެވަގުތު ހަރަމްފުޅު ތެރޭގައި ނަމާދުކުރަންހުރި އެއްވެސް މީހަކަށް ގެއްލުމެއް ލިބިފައިނުވާ ކަމަށްވެއެވެ.
ޚަބަރުފަތުރާ ވަސީލަތްތަކުން މަޢުލޫމާތު ދޭގޮތުގައި ބާރު ސްޕީޑުގައި ދުވަމުންދިޔަ މިކާރު ދުއްވާފައިވަނީ ހަރަމްފުޅުގެ 89 ވަނަ ދޮރުކޮޅާއި ދިމާލަށެވެ. އަދި ދޮރުކޮޅުން ވަދެގެން ގޮސް ގެފުޅުގެ ވަށައިގެން ޖަހާފައިހުރި ބެރިކޭޑްތައް ފޫއަޅުވާލުމަށްފަހު، ކާރު ގޮސް ޖެހުނީ ގެފުޅުގެ ވަށައިގެންވާ ހުސްތަނުން ބޭރަށް ނިކުންނަން ހަދާފައި ހުންނަ ދޮރުކޮޅުތަކުގެ ތެރެއިން ދޮރޮކޮޅެއްގައެވެ.
މިކާރުގެ ހަރަމްފުޅުގެ ތެރެއަށް ބާރު ސްޕީޑުގައި ވަދެގެންދާ މަންޒަރު ފެންނަ ވީޑީއޯ މިހާރު ސޯޝަލް މީޑިއާގައި ދައުރުވަމުން ދާއިރު، މި ވީޑިއޯއިން ފެންނަ ގޮތުގައި ކާރު ހަރަމްފުޅުގެ ތެރެއަށް ވަނުމާއިއެކު ސެކިއުރިޓީ އޮފްޝަލުން ކާރުގެ ފަހަތުން ދުވެފައި ދާމަންޒަރު ފެނެއެވެ. އަދި ކާރު ދިޔަގޮތަށް ގޮސް ހަރަމްފުޅުގެ އެތެރޭގެ ދޮރުކޮޅަކަށް އުރި ހުޓުމާއިއެކު، ސެކިއުރިޓީ އޮފިޝަލުންވަނީ ސަރަޙައްދު ބަންދުކޮށްފައެވެ. އެއަށްފަހު، ސެކިއުރިޓީ އޮފިޝަލުން ކާރު ކޮށްޕާ ހަރަމްފުޅުގެ ތެރެއިން ނެރޭ މަންޒަރުވެސް މިވީޑިއޯއިން ފެނެއެވެ.
ސައުދީ އަރަބިއާގެ ނޫސްތަކުން މައުލޫމާތުދޭ ގޮތުގައި މިކާރު ދުއްވަން އިނީ ސައުދީގެ ރައްޔިތެކެވެ. އަދި މިމީހާ މިހާރުވަނީ ހައްޔަރުކުރެވި ސުވާލު ކުރުމަށްޓަކާ ޕަބްލިކް ޕްރޮސެކިއުޓަރާއި ހަވާލުކުރެވިފައެވެ.
މިހާދިސާ ހިގިއިރުވެސް، ހަރަމްފުޅުގެ ވީޑއޯތައް ލައިވް ކުރަމުންދާ ސައުދީ ޓީވީ ޗެނަލް ކަމުގައިވާ 'ސައުދީ ޤުރާން' އިން ދިޔައީ ހަރަމްފުޅުގެ މަންޒަރުތައް ވަގުތުން ދުރަށް ދައްކަމުންނެވެ.
ދުނިޔެއަށް ކުރިމަތިވި ކޯވިޑް19 ކާރިސާއާއި ގުޅިގެން 7 މަސްވަންދެން ހަރަމްފުޅު ބަންދު ކޮށްފައި ބޭއްވުމަށްފަހު އާންމުނަށް ހުޅުވާލާފައިވަނީ މިމަހުގެ ކުރީކޮޅުއެވެ. އަދި ސައުދީން މިހާރު ތައްޔާރުވަމުން ދަނީ އަންނަ އާދީއްތަ ދުވަހުން ފެށިގެން ގައުމުން ބޭރުގެ ބައެއް ފަރާތްތަކަށް އުމްރާގެ އަޅުކަމަށް މައްކާ މަދީނާ ހުޅުވާލުމަށެވެ.
