މަނީ ލޯންޑްރިންގެ މައްސަލާގައި ކުށް ސާބިތުވެ އެކުށުގެ އުގޫބާތެއްގެ ގޮތުން ރައީސް ޔާމިންގެ މައްޗަށް އިއްވާފައިވާ 5 އަހަރުގެ މުއްދަތަށް ޖަލަށް ލުމާއެކު ޖޫރިމަނާގެ ގޮތުގައި ދައުލަތަށް ދައްކަން ކަޑައެޅި 5 މިލިއަން ޔޫއެސް ޑޮލަރު ކުރިމިނަލް ކޯޓުގެ ގަޒިއްޔާއާއި އެއްގޮތަށް ދައްކާފައި ނުވާތީ އެހުކުން ތަންފީޒު ކުރުމަށް ދައުލަތުން ސިވިލް ކޯޓަށް ހުށަހަޅާފައިވާ މައްސަލައިގެ ފުރަތަމަ އަޑުއެހުން ސިވިލް ކޯޓުގައި ތާވަލު ކޮށްފިއެވެ.
މި މައްސަލައިގެ ފުރަތަމަ އަޑުއެހުން ތާވަލް ކޮށްފައިވަނީ އަންނަ އޮކްޓޯބަރުމަހުގެ 6 ވަނަ ދުވަހުގެ 11:20 އަށެވެ.
ބަންޑާރަނައިބުގެ އޮފީހުން މިއަދު ނެރުއްވާފައި ބަޔާނެއްގައި ބުނެފައިވަނީ، ދައުލަތުގެ ފަރާތުން އޮގަސްޓުމަހުގެ 24 ވަނަ ދުވަހު ހުށަހެޅުއްވި މިމައްސަލައާއި ގުޅިގެން ސިވިލް ކޯޓުން އަންގަވާފައިވަނީ "ކޯޓުން އިސްނަގައިގެން ޙުކުމް ތަންފީޒު ކުރުމުގައި އަމަލް ކުރާނެ ގޮތުގެ އުސޫލު"ގެ ދަށުން ކުރިމިނަލް ކޯޓުގެ އެހުމް ތަންފީޒު ކުރުމުގެ މައްސަލަ ސިވިލް ކޯޓުގައި މިހާރު ރަޖިސްޓްރީކޮށް ކުރިޔަށް ގެންދާ ކަމުގައެވެ.
މަނީ ލޯންޑަރިންގެ މައްސަލާގައި ރައީސް ޔާމިންގެ މައްޗަށް ކުރިމިނަލް ކޯޓުން އިއްވާފައި ހުކުމްގެ އިސްތިއުނާފީ މަރުހަލާތައް މިހާރުވެސް ކޯޓުގައި ދަނީ ކުރިޔަށެވެ. އަދި މިހާރު މިމައްސަލާގައި ކުރިޔަށްދަނީ ސުޕްރީމް ކޯޓުގެ މަރުހަލާއެވެ. ބެލެވޭ ގޮތުގައި މިމައްސަލާގައި ވަރަށް އަވަހަށް ސުޕްރީމް ކޯޓުން ގޮތެއް ނިންމަވާނެއެވެ.
