ދުވަސްކޮޅަކަށްފަހު އަނެއްކާވެސް މުސްތަފާބޭގެ މަތިން އަހަރެން ހަދާންވެއްޖެއެވެ. މާބޮޑަށް ހަދާންވާންފެށީ، ގައުމުގެ ކަންތައްތައް މިހާތަނަށް ބޮއްސުންލައި، ކަންކަން އިންތިހާއަށް ގޯސްވީމައެވެ.

އަހަރެންނަކީ އަބަދުވެސް މުސްތަފާބޭގެ ފޭނެކެވެ. މުސްތަފާބޭ މަޖިލީހުގައިވެސް ދެއްކެވީ އާދަޔާ ޚިލާފު ހިއްވަރެކެވެ. ގައުމު އެންމެ ބޮޑަށް ހަލަބޮލި ވާއިރުވެސް މުސްތަފާބޭ ގެންދެވީ ކަންކަން ޙައްލު ކުރައްވަމުންނެވެ. މުސްތަފާބޭއަކީ އަބަދުވެސް ދިވެހީންގެ ކަންކަން
ޙައްލުކުރާނީ ދިވެހިންކަމަށް ވިދާޅުވާ ފަހުލަވާނެކެވެ. ރާއްޖެއަކީ ފަގީރު ގައުމެއްނޫންކަމާ، އަވަށްޓެރިންގެ ގާތަށް ނާށިގަނޑު ހިފައިގެން ސަލާންޖަހަން ދާން ޖެހޭ ބައެއް ނޫންކަމަށް ތަކުރާރުކޮށް ވިދާޅުވާ ބޭފުޅެކެވެ. މިކަމާހެދި އަވަށްޓެރި ބައެއް ގައުމުތަކުން މުސްތަފާބޭއާއި ޖައްސާލާފައި ހުންނަކަންވެސް އަހަރުމެންނަށް އެގެއެވެ.

އަދި ރާއްޖޭގައި އޮންނަންޖެހޭނީ އިސްލާމްދީންކަމަށް ހަރުއަޑުން ވިދާޅުވާތީ، ބޭރުގެ ޖަމްޢިއްޔާތަކުން މުސްތަފާބޭ ދެކެ އަންނަނީ އަމަށަކު ރުޅިއެއް ނޫންކަންވެސް އަހަރެން ދަންނަމެވެ. މިފަދަ ކަމެއްގެ ތެރޭގައި، އެފަދަ ޖަމްޢިއްޔާއަކާ ގުޅުންވެސް މުސްތަފާބޭ ކަނޑުއްވާ ލެއްވިކަންވެސް އެގެއެވެ.

މުސްތަފާބޭގެ އަބަދުގެވެސް ވިސްނުމަކީ ރާއްޖެ ތަރައްގީކުރުންކަން، މުސްތަފާބޭގެ ގާތުގައި މަސައްކަތްކުރާ މީހުންނަށް އެގޭނެއެވެ. މިޒަމާނުގައި ކަންކަން ކުރެވޭނީ ކުޑަކޮށް ސައި ދީގެންކަމަށް ވިޔަސް، މުސްތަފާބޭއަކީ ކެފޭ، ރެސްޓޯރަންޓް އަދި ސައިހޮޓާތަކަށް ނުވަންނަވާ ބޭފުޅަކަށްވާތީ، ގާތުގައި އުޅޭ މީހުންނަށް ސައިކޮޅެއް ނުލިބޭ ވާހަކަވެސް އެވެރިން ނިކަން ދައްކައެވެ.

މުސްތަފާބޭއެވެ. ގާތުގައި އުޅުނު މީހުންނަށް ސައިކޮޅު ނުދިނަސް، ކަންކަން ކުރެވޭނެކަން މުސްތަފާބޭ ވަނީ ސާބިތު ކޮށްދެއްވާފައެވެ. ފެރީ ޓިކެޓެއް ނުދިނަސް، ފެރީ ނޫންގޮތެއް ހޯދައި، ބްރިޖުގައި މިހާރު ހުޅުލެއަށާއި ހުޅުމާލެއަށް އެބަ ބުރުޖަހާ ލެވޭތާއެވެ. ކުލި ނުދެއްކި ބޯގޮވާ، ދުނިޔެއިން މޮޔަވެ، މާޔޫސްވާ ފަރާތްތަކަށް، ސިޓީ އުރައެއް ނުދެއްވި ނަމަވެސް، ބޯހިޔާވަހިކަން ބޭނުންވާ ހުރިހާ ފަރާތްތަކަށްވެސް 25 ބުރީގެ ޓަވަރުން ލިބުނު ބޯހިޔާވަހިކަމުން އެމީހުން އެތިބީ އުފަލުން ފޮޅިފައިކަން މުސްތަފާބެއަށް އެގޭނެއެވެ.

ބޭސްފަރުވާއަށް ސަލާންޖަހަން ޖެހުނު ކޮންމެ މީހަކަށް 300 ޑޮލަރު މުސްތަފާބޭ ނުދެއްވި ނަމަވެސް، 25 ބުރީގެ ދަރުމަވަންތަ ހޮސްޕިޓަލުން ދުނިޔޭގެ ފެންވަރުގެ ޚިދުމަތް ލިބެން ހުރިކަން މުސްތަފާބެއަށް އެގޭނެއެވެ. އެމްއާރުއައި މެޝިނަކަށް ސަލާން ޖަހާތާ 10 އަހަރުފަހުން، ވަގުތުން ވަގުތަށް ރާއްޖޭގެ އެކި ކަންކޮޅުތަކުގައި އެމްއާރުއައި މެޝިންތައް ބަހައްޓާ، ދުނިޔޭގެ ބޮޑު ބާރެއް ލަނދު ގަންނަވާލީވެސް ހަމަ މުސްތަފާބޭކަން އަހަރުމެން ދެނަހުރީމެވެ.

ހުޅުމާލޭގެ 2 ވަނަ ފޭސް ހިއްކާ، އެތަނުގައި މާސިންގާ ޓަވަރުތައް އަޅާ، މަގު ހަދައި، މީހުން އާބާދު ކުރުވާވަރަށް މަސައްކަތް ކުރެއްވި އިރުވެސް، އަރިހުގައި ހުންނެވި ބޭފުޅަކަށް އެއްޗެއްކަޅެއް، ސައިތައްޓެއްވެސް މުސްތަފާބޭ ނުދެއްވައިގެން، އެފަކީރުންތައް ކީރިތި ކުރެއްވި އޯޑިއޯވެސް ދާދިފަހުން ވަނީ ލީކުވެފައެވެ. އަހަރެން އުއްމީދުކުރަނީ މުސްތަފާބޭ އެ އޯޑިއޯ އަޑު އެއްސެވިކަމަށެވެ.

ދުނިޔޭގެ ބޮޑެތި މަތިންދާބޯޓު ޖައްސާ ފެންވަރުގެ ރަންވޭއެއް ހަދައި، އެއަރޕޯޓުގައި، ދުނިޔޭގެ ފެންވަރުގެ ފްރެންޗައިސް އައުޓްލެޓްތައް ކަމަށްވާ، ކޭއެފްސީއާއި، ޕިއްޒާހަޓް ފަދަ އައުޓްލެޓްތައް ހެއްދެވި އިރުވެސް އެއިން ތަނަކުންވެސް މީހަކަށް ސައިތަށްޓެއްހާ މިންވަރުވެސް މުސްތަފާބޭ ނުދެއްވީމު ނޫންތާއެވެ.

ހާބަރު ކަނޑަތައް ޒަމާނީ ފުޑްކޯޓަތަކަށް ބަދަލުވެ، އެއީ އާއިލާއާއި ރައްޓެހިން ހިތްހަމަ ޖައްސާލާ ތަނަކަށްވެސް ހެއްދެވީ ހަމަ މުސްތަފާބޭ ނޫންހެއްޔެވެ. ސަލްޓަންޕާކުވެސް އާ ކުރައްވާ، އެތަނަށް ސްނޯ ފައިބާގޮތް ހެއްދެވިއިރުވެސް، މީހަކަށް ޖޫސްޕެޓީއެއްހާ ހިސާބުވެސް މުސްތަފާބޭ ނުދެއްވިޔަސް އެއީވެސް ހަމަ މުސްތަފާބޭގެ މިންނެތް މަސައްކަތްކަން އަހަރެން ދެނަހުރީމެވެ.

މުސްތަފާބޭއެވެ. މީހުން ތޮއްޖެހި، މި މާލެއަކީ މީސްތަކުންނަށް ބޮޑު ގިލަންވެރިކަމަކަށް ވެފައިވަނިކޮށް، މާލޭގެ ބައެއް ސަރަހައްދުތަކަށް ދުއްވާ އެއްޗިއްސަށް ނުވަދެވޭގޮތަށް ހައްދަވާ، ޕާކުތައް ހައްދަވާ އެތަންތަނަށް މީހުންނަށް ވަދެވޭނެގޮތް ހެއްދެވިއިރު، މުސްތަފާބޭ ހަނދާނުން ކައްސާލި އެއްކަމެއް އެބައޮތެވެ. އެއީ ދިވެހިން ހުރިހާކަމެއް ކުރަން ބޭނުންވާނީ ކަޅުސައި ތައްޓަކުންކަން މުސްތަފާބޭގެ ހަނދާނުން ކައްސާލިކަމެވެ.

އެހެންމަވެސް މުސްތަފާބެއަށް ނޭގުނަސް މުސްތަފާބެއަކީ ވަރަށް ހިތްވަރުގަދަ ބޭފުޅެކެވެ. ގޮޑި ދަށުން ބޮންގޮވައި، އަލިފާން ރޯވުމުންވެސް މުސްތަފާބޭ ދެއްކެވީ ހިއްވަރުގަދަ ކަމެވެ. އެންމެ މަތީ ކޯޓުން ނެރުއްވި އަމުރާއި، އަޒުލުކުރަން ކުރެވުނު މަސައްކަތުން ހުޝިޔާރުކަމާއެކު ރެކިވަޑައިގަތީ، މުސްތަފާބޭގެ އަތުން ލަވާޒާމިލްކެއްހާ މިންވަރުވެސް ހޭދަ ނުކުރައްވައެވެ. އެއީ ހަމަ މުސްތަފާބޭގެ ހުށިޔާރުކަން ނޫން ދެވެނަ ކޮންކަމެއްތޯއެވެ.

މުސްތަފާބޭއެވެ. ރާއްޖެމިވަނީ، ފާއިތުވި 100 އަހަރުވެސް ނުހޯދާވަރުގެ ކާމިޔާބީއާއި ކުރިއެރުން ހޯދާފަ ނޫންހެއްޔެވެ. މިވަރުގެ ބުރަ މަސައްކަތެއް، ޖެހިލުންކުޑަ ވިސްނުންތޫނު، ކަންކަން ކުރާނެގޮތް އެގޭ، ވަރުގަދަ ސިކުނޑިއަކަށް މެނުވީ ނުކުރެވޭނޭކަން މުސްތަފާބޭވެސް ގަބޫލުކުރާނެއެވެ. މިހާ ބުރަ މަސައްކަތްކުރާއިރު، މުސްތަފާބޭއަށް މީހުން ދަސްނުވުމަކީ، އެއީ މުސްތަފާބޭގެ މައްސަލައެއް ނޫނެވެ. އެއީ އެމީހުންގެ މަސަލައެކެވެ.

މުސްތަފާބޭވަރުގެ، އެކަހަލަ ޚިދުމަތްތެރިއަކަށް ކެހިވެރިވުމަކީ އެއީ ދިވެހިންގެ އާދައެއްކަން މުސްތަފާބޭއަށް ނުވިސްނުނީ ކީއްވެހެއްޔެވެ. މުސްތަފާބޭ ވިދާޅުވީ ރަގަޅަށެވެ. ދިވެހިން ކުލަ ބަދަލުކުރަނީ މާ އަވަހަކަށެވެ.

އެހެންނަމަވެސް، މުސްތަފާބޭވެސް ދޭތެރެ ދޭތެރެއިން ކުލަބަދަލުކުރާ ލިސްޓަށް އަރާތީ އަހަރެން ދެރަވެއެވެ. އެކަމާ ހައިރާންވެސް ވަމުއެވެ. އެކަމަކުވެސް ތިޔައީ އަހަރެންގެ މުސްތަފާބޭއެވެ. ދިވެހިންގެ މުސްތަފާބޭއެވެ.

މުސްތަފާބޭވެސް ގަބޫލުކުރަންވީ ހަގީގަތަކީ، މީހުން ދަސްކުރާނެ ކޮލެޖެއް ރާއްޖޭގައިވެސް އަދި ދުނިޔޭގައިވެސް ނެތްކަމެވެ. ކެހިވެރިކަމެއްގެ ތެރެއިން މުސްތަފާބޭވެސް މިވަގުތު ތިޔަ ހުންނެވީ ގޭގައި ނޫންހެއްޔެވެ. އަހަރެންގެ ނަސޭހަތަކީ، މިދުވަސްކޮޅު ވަފާތެރިން ދަސްކުރެއްވުމެވެ. މިއީ މިދުވަސްކޮޅު ކޮށްލައްވަން ރަގަޅުކަމެއް ނޫންތޯއެވެ. އަޅުފަހެ މިއީ ދޮގެއްތޯ އެވެ.!