ހުޅުމާލެ ޖަލުގައި 3 (ތިން) އަހަރުގެެ ޖަލު ޙުކުމެއް ތަންފީޒު ކުރަމުންދިޔަ ގދ. ވާދޫ/ ޖަނަވަރީގެ މުޙައްމަދު އަސްލަމް (40 އަހަރު) ގެ މަރުގެ ހާދިސާ ދެފުށްފެންނަ ގޮތަށް ތަހުގީގު ކުރުމަށާއި، އަދި ޖަލު ބަންދުގައި ތިބޭ މީހުންނާމެދު ހިނގަމުންދާކަމަށް ތުހުމަތު ކުރެވެމުންދާ ލާއިންސާނީ އަނިޔާ ދެފުށް ފެންނަށް ގޮތަށް ފުރިހަމަޔަށް ތަހުގީގު ކުރުމަށް އެމްނެސްޓީ އިންޓަރނޭޝަނަލްއިން ގޮވާލާއިފިއެވެ.

އެމްނެސްޓީ އިންޓަރނޭޝަނަލްއިން މިއަދު ބުނެފައިވަނީ، ހުޅުމާލެ ޖަލުގައި 3 (ތިން) އަހަރުގެެ ޖަލު ޙުކުމެއް ތަންފީޒު ކުރަމުންދިޔަ ގދ. ވާދޫ/ ޖަނަވަރީގެ މުޙައްމަދު އަސްލަމް، މިމަހުގެ 13 ވަނަ ދުވަހު މަރުވި ހާދިސާގައި މޯލްޑިވްސް ކަރެކްޝަނަލް ސާވިސްގެވެސް އަދި ޖަލުގެ އެއްވެސް މުވައްޒަފެއްގެވެސް އިހުމާލެއް ނުވާނެކަމަށް އެ ސާވިސްއިން ބުނެފައިވާ ކަމަށާއި، އެހެންނަމަވެސް، މުހައްމަދު އަސްލަމްގެ މަރު ސާބިތުކޮށް، މަރުގެ ސެޓެފިކެޓްގައި ލިޔެފައިވަނީ، މަރުވި ވަކި ސަބަބެއް ނޭގޭ ކަމަށް ކަމުގައެވެ.

"އެއްވެސް ސަބަބެއް އެގުމެއްނެތި ޖަލުގައި މަރުވާ ކުށްވެރިޔާގެ މަރާ ގުޅިގެން، ޖަލުގައި ބަންދުކޮށްފައި ތިބޭ ކުށްވެރިންނާމެދު، ދިވެހިރާއްޖޭގެ ކަމާގުޅޭ މުވައްސަސާތަކުން ހިގާފައި ވެދާނެ އިންސާނީ ހައްގުތަކާ ޚިލާފު އެތަކެއް އަމަލަތަކަކާއި ގުޅޭގޮތުން ގިނަ ކަންބޮޑުވުންތަކެއް އެބަހުރި،" އެމްނެސްޓީ އިންޓަރނޭޝަނަލްގެ ދެކުނު އޭޝިއާ ކެމްޕޭނަރ ސާދިއު ހައްމާދީއާއި ހަވާލާދީ، އެމްނެސްޓީ އިންޓަރނޭޝަނަލްގެ ރަސްމީ ވެބްސައިޓުގައި ބަޔާން ކޮށްފައި ވެއެވެ.

މި ޖަމިއްޔާގެ ރަސްމީ ވެބްސައިޓިގައި އިތުރަށް ބުނެފައިވަނީ، އުމުރުން 40 އަހަރުގެ މުހައްމަދު އަސްލަމްއަކީ ގދ. ވާދޫގެ ރައްޔިތެއް ކަމަށާއި، އޭނާ ޖަލުގައި ހައްޔަރު ކޮށްފައިހުރިއިރު، އޭނާ ދިޔައީ މަސްތުވާތަކެތި ބޭނުން ކުރުމުގެ ކުށުގައި 3 އަހަރުގެޖަލު ހުކުމެއް ތަންފީޒު ކުރަމުން ކަމުގައެވެ. އަދި އޭނާ މަރުވެފައިވަނީ، މިހިގާ ސެޕްޓެމްބަރު މަހުގެ 13 ވަނަ ދުވަހުގައި ކަމަށެވެ.

އަދި އަސްލަމް ޖަލުގައި ހުއްޓާ ވެއްޓުމާއި ގުޅިގެން ހޮސްޕިޓަލަށް ގެންދެވުނުކަމަށާއި އަދި ހޮސްޕިޓަލުގައި އޭނާ މަރުވެފައިވާ ކަމަށް ކަރެކްޝަންސްއިން މައުލޫމާތު ދީފައިވާކަމަށްވެސް އެމްނެސްޓީން ބުނެފައި ވެއެވެ. އަދި އޭނާ މަރުގެ ޚަބަރު އާއިލާގެ މެމްބަރުންނަށްވެސް އަންގާފައި ނުވާއިރު، އެކަމުގެ މައުލޫމާތު އާއިލާއާއި ހިއްސާކޮށްފައިވަނީ، އޭނާގެ އާއިލާގެ މެމްބަރުންނަށް އަސްލަމް މަރުވެފައިވާކަން އެހެން ފަރާތުން އެގި، އާއިލާއިން ކަރެކްޝަންސްއަށް ގުޅައިގެން އެމައުލޫމާތު ސާފުކުރުމުން ކަމުގައިވެސް އެމްނެސްޓީ އިންޓަރނޭޝަނަލްގެ ވެބްސައިޓުގައި އެ ޖަމިއްޔާއިން ބަޔާން ކޮށްފައި ވެއެވެ.

މީގެއިތުން، ރާއްޖޭގެ ޖަލުތަކުގައި ހިގާ ލާއިންސާނީ އަނިޔާތަކާއި ގުޅޭ އެހެން ބައެއް ހާދިސާތަކަށް އަލި އަޅުވާ، އެމްނެސްޓީ އިންޓަރނޭޝަނަލްއިން ބުނެފައިވަނީ، އަހުމަދު ސިރާޖު ހައްޔަރު ކުރުމަށްފަހު، އޭނާއަށް އަނިޔާ ކޮށްފައިވާ ފުލުހަކާއިމެދު ޖިނާއީ ތަހުގީގެއް ހިންގުމަށް ގައުމީ ސަލާމަތީ ކަންކަކާ ގުޅޭ ރައްޔިތުންގެ މަޖިލިހުގެ ކޮމިޓީއިން ސެޕްޓެމްބަރުމަހު 13ވަނަ ދުވަހު އަންގާފައިވާ ކަމަށެވެ.

ވައްކަމުގެ ތުހުމަތުގައި، ސެޕްޓެމްބަރު މަހުގެ 6 ވަނަ ދުވަހު ހައްޔަރު ކުރެވުނު އަހުމަދު ސިރާޖު ހައްޔަރު ކުރުމަށްފަހު، ކުށަށް އިއުތިރާފް ވުމަށް މަޖުބޫރު ކުރުވުމުގެ ގޮތުން އޭނާއަށް އަނިޔާ ކޮށްފައިވަނީ ފޮލިސް ސްޓޭޝަންގެ ކޮޓަރިއަކަށް ގެންގޮސްގެން ކަމަށް އޭނާ ބުނާކަމަށްވެސް އެމްނެސްޓީން ބުނެފައިވެއެވެ.

"އަހަރެއް ވެގެންގޮސްފައިވާ މިމައްސަލާއިގެ ޖިނާއީ ތަހުގީގެއް ކުރުމަށް މަޖިލިހުގެ ކޮމިޓީން އަންގަން ޖެހުނު ޖެހުމުން ދޭހަވަނީ، މުވައްސަސާތަކުން ވަގުތާއި ހާލަތުގައި ޒިންމާ އަދާ ނުކުރާކަން. ޖަލުގައި މަރުވެދިޔަ މުހައްމަދު އަސްލަމްގެ މަރުގެ ހާދިސާއާއި، އަނިޔާ ކޮށްފައިވާކަމަށް ތުހުމަތު ކުރެވޭ އަހުމަދު ސިރާޖުގެ މައްސަލަ، މިނިވަންކަމާއެކު، އަދި އަވަސް މުއްދަތެއްގެ ތެރޭގައި، މި މިހާދިސާތަކުގައި އިހުމާލްވެފައިވާ ކަމަށްތުހުމަތު ކުރެވޭ މުވައްސަސާތަކުގެ އެއްވެސް ބައިވެރިވުމަކާ ނުލާ ތަހުގީގު ކުރެވެންޖެހޭނެ،" ސާއިދު ހައްމާދީ ވިދާޅުވިކަމަށް އެމްނެސްޓީން ރިޕޯޓު ކޮށްފައި ވެއެވެ.

މީގެއިތުރުން އެމްނެސްޓީން ބުނެފައިވަނީ، މި ސެޕްޓެމްބަރު މަހުގެ 17ވަނަ ދުވަހު، މާފުށީ ޖަލުގައި ބަންދު ކޮށްފައިހުރި ކުށްވެރިއެއް ކަމުގައިވާ އަހުމަދު އިބުރާހިމްގެ ގަޔަށް އެހެން ކުވެރިޔަކު ހޫނުފެން ޖެހުމުގެ ސަބަބުން އޭނާގެ ގައިން ބައެއް ތަންތަން ފިހިފައިވާ ކަމުގައެވެ. އަދި މި ހާދިސާއަކީ، ޖަލުގައި އެއްގޮޅިއެއްގައި ބަންދު ކޮށްފައި ތިބި ކުށްވެރިންގެ މެދުގައި ހިގައިދިޔަ ހަމަނުޖެހުމެއްގައި ހިގައިދިޔަ ހާދިސާތަކެއް ކަމަށާއި އަދި މިހާރު މި ކުށްވެރިން ވަކި ކުރެވިފައިވާކަމަށް ކަރެކްޝަންސްއިން ބުނާ ކަމަށްވެސް އެމްނެސްޓީން ބުނެފައި ވެއެވެ.

"ޖަލުތަކަކީ، ހަމަނުޖެހުން ހިގާ ތަނަކަށް ވެގެން ދިޔަ ނުދިނުމަށްޓަކާ، މި ހަމަލާ ތަހުގީގުކުރުމަށް މުވައްސަސާތަކަށް އަހަރެމެން ގޮވާލަން، އަދި ކުށްވެރިންނަށް ޚިދުމަތްތައް ރަގަޅު ކުރުމަށްވެސް ގޮވާލަން. ރާޖޭގެ ޖަލުތަކަކީ، ކުށްވެރިންނަށް ލާއިންސާނީ އަނިޔާ ކުރުމުގެ ތާރީޚެއް އޮތް އަދި، ދަށް ފެންވަރުގެ ސިއްޙީ އެހީތެރިކަން ފޯރުކޮށްދިނުމާއި، އަދި ތޮށްޖެހުމުގެ މައްސަލަތަކުގެ ތާރީޚެއްވެސް އޮތް ތަންތަން،" ސާއިދުއާއި ހައްމާދީ ހަވާލާދީ އެމްނެސްޓީން ބުނެފައިވެއެވެ.