ކުޑަކުއްޖަކަށް ޖިންސީ ގޯނާކުރި ކަމުގެ ތުހުމަތުގައި ހައްޔަރުކޮށްފައިވާ ކުރީގެ ފޮރިން މިނިސްޓަރު އަބްދުﷲ ޝާހިދު 30 ދުވަހަށް ބަންދުކުރުމަށް ނިންމި ނިންމުމާ ދެކޮޅަށް ކުރި އިސްތިއުނާފުގެ ޝަރީއަތް، މިއަދު މެންދުރުފަހު ހައިކޯޓުގައި ފެށުމަށް ތާވަލުކޮށްފިއެވެ.
ޝާހިދުގެ ފަރާތުން މި މައްސަލަ ހައިކޯޓަށް ހުށަހެޅީ ހަފްތާއެއްހާ ކުރިންނެވެ. ކުޑަކުދިންނާ ގުޅޭ ޖިންސީ ކުށުގެ މައްސަލަތައް އާންމުކޮށް ބަލަނީ ހުޅުވާލުމެއް ނެތި ކަމުން، މައްސަލައިގެ އިތުރު ތަފްސީލެއް ހާމަވެފައެއް ނުވެއެވެ.
64 އަހަރުގެ ޝާހިދު ހައްޔަރުކުރީ މި މަހުގެ ފެށުމުގައި، ކޯޓު އަމުރަކާއެކުއެވެ. ފުލުހުން ބުނާ ގޮތުގައި އޭނާގެ މައްޗަށް އޮތް ތުހުމަތަކީ 18 އަހަރުން ދަށުގެ ކުއްޖަކަށް ޖިންސީ ގޯނާކުރުމެވެ.
ހައްޔަރުކުރުމުގެ ކުރިން ސޯޝަލް މީޑިއާގައި ޝާހިދު ވިދާޅުވީ، މިއީ ސިޔާސީ ބޭނުމެއްގައި އޭނާގެ ނަން ބަދުނާމުކުރަން ފަތުރާ، ހަގީގަތެއް ނެތް ވާހަކަތަކެއް ކަމަށެވެ. ނަމަވެސް ރައީސް ޑރ. މުހައްމަދު މުއިއްޒު ވިދާޅުވެފައިވަނީ މި ހައްޔަރުގެ ފަހަތުގައި ސިޔާސީ އެއްވެސް މަގްސަދެއް ނެތް ކަމަށެވެ.
އދ.ގެ އާންމު މަޖިލީހުގެ ރައީސްކަން ކުރައްވާފައިވާ، ނިޝާން އިއްޒުއްދީނުގެ އިއްޒަތުގެ ވެރިޔާގެ ލަގަބު ލިބިފައިވާ ޝާހިދުގެ މައްޗަށް މި ތުހުމަތު ކުރެވުނީ، 2028 ވަނަ އަހަރުގެ ރިޔާސީ އިންތިހާބަށް އެމްޑީޕީގެ ޓިކެޓް ހޯދުމުގެ މަސައްކަތް އޭނާ ފައްޓަވާފައިވާ ދުވަސްވަރުގައެވެ.
ކޮމެންޓު ފޮނުވާ