ޔޫގަންޑާގައި ޖެނެރަލުން ހައްޔަރުކުރުމާއެކު ވެރިކަމުގެ ވާދަވެރިކަން ހޫނުވެއްޖެ

ޔޫގަންޑާގެ ރައީސް ޔޮވެރީ މުސެވެނީގެ ދަރިކަލުން ކަމަށްވާ އަސްކަރިއްޔާގެ ވެރިޔާ ޖެނެރަލް މުހޫޒީ ކައިނޭރުގާބާ ނައިބު ރައީސާއަށް އިންޒާރު ދެއްވައިފި އެވެ. އޭގެ އިތުރުން އަސްކަރިއްޔާގެ އިސް ޖެނެރަލުން ވެސް ވަނީ ހައްޔަރުކޮށްފައެވެ. މި ކަންކަމާއެކު މުސެވެނީގެ ފަހުން ވެރިކަމާ ހަވާލުވާނީ ކާކުކަމާ މެދު ސިޔާސީ ވާދަވެރިކަން ވަނީ ހޫނުވެފައެވެ.

ނައިބު ރައީސާ ޖެސިކާ އަލޫޕޯ މަގާމުން ވަކިކޮށް ހައްޔަރުކުރާނެ ކަމަށް 52 އަހަރުގެ ކައިނޭރުގާބާ މި ހަފުތާގައި ވިދާޅުވި އެވެ. އެ މަގާމު ލިބެންޖެހޭނީ އަމިއްލައަށް ކަމަށް ވެސް އޭނާ ވިދާޅުވި އެވެ. ވޭތުވެދިޔަ 15 މަސްދުވަހުގެ ތެރޭގައި އަސްކަރިއްޔާގެ 12 އިސް އޮފިސަރަކު ހައްޔަރުކޮށްފައިވެ އެވެ. އެމީހުންގެ ތެރޭގައި އަސްކަރިއްޔާގެ ނައިބު ވެރިޔާ ލެފްޓިނެންޓް ޖެނެރަލް ޕީޓާ އެލްވެލޫ ވެސް ހިމެނެ އެވެ.

މިއީ ކޮރަޕްޝަނާ ދެކޮޅަށް ކުރާ މަސައްކަތެއް ކަމަށް އަސްކަރިއްޔާއިން ބުނެ އެވެ. ނަމަވެސް މިއީ ކައިނޭރުގާބާ އޭނާގެ ކުރިމަތީގައި ހުރި ހުރަސްތައް ނައްތާލުމަށް ކުރާ ކަމެއް ކަމަށް މުހައްލިލުން ދެކެ އެވެ. ހައްޔަރުކުރެވުނު ބައެއް އޮފިސަރުން ކައިނޭރުގާބާގެ ކިބައިން މާފަށް އެދުމުން ދޫކޮށްލާފައިވާކަމީ ސިޔާސީ މަގުސަދެއް ހުރިކަމުގެ ހެއްކެއް ކަމަށް ކެނެޑާގެ ޔޯކް ޔުނިވަރސިޓީގެ ޕްރޮފެސަރު ޑރ. ޖެރަލްޑް ބަރީބޭ ވިދާޅުވި އެވެ.

ވެރިކަން ކުރާ އެން.އާރު.އެމް ގެ ތެރޭގައި ވެސް ކައިނޭރުގާބާއަށް ފުރިހަމަ ތާއީދެއް ނެތެވެ. 1986 އިން ފެށިގެން ވެރިކަމުގައި ހުންނެވި 82 އަހަރުގެ މުސެވެނީ، ދަރިކަލުންނަށް ވެރިކަން ދޫކުރައްވަން މަސައްކަތް ކުރައްވާ ކަމަށް އިދިކޮޅު ފަރާތްތަކުން ތުހުމަތުކުރެ އެވެ. އަސްކަރިއްޔާގެ ތެރޭގައި ބައިބައިވުން އިތުރުވުމުން ގައުމުގެ ހަމަޖެހުމަށް ނުރައްކާ ކުރިމަތިވެދާނެ ކަމަށް މުހައްލިލުން އިންޒާރުދެ އެވެ.