ފ. ނިލަންދޫ ކައުންސިލް މެމްބަރު އަޙްމަދު ޝިޔާމް ޖުމްހޫރީ ޕާޓީ (ޖޭޕީ)އާއި ގުޅިވަޑައިގެންފިއެވެ.
ޝިޔާމް އަކީ މިނިވަން މެންބަރެއްގެ ގޮތުގައި ކައުންސިލަށް އިންތިޚާބުވެވަޑައިގެންނެވި މެންބަރެކެވެ. އޭނާ އަކީ ކުރިން އެމްޑީޕީގެ މެންބަރެއްވެސް މެއެވެ. ޝިޔާމް ޖޭޕީއާއި ގުޅިވަޑައިގެން ވަނީ ފޯމް ޖުމްހޫރީ ޕާޓިގެ ލީޑަރު ޤާސިމް އިބްރާހިމާއި ހަވާލުކުރައްވާފައެވެ. އޭނާއާއެކު އެރަށުގެ ގިނަ ބަޔަކުވެސް ޖޭޕީއާއި ގުޅިފައިވެއެވެ.
ނިލަންދޫ ކައުންސިލަކީ ޕީޕީއެމްއަށް މެޖޯރިޓީ އޮންނަ ކައުންސިލެކެވެ.
Meege ithurun ves F.Nilandhoo ge ginabayaku miadhu vanee JP ah soi kurahvaafa pic.twitter.com/eb0ubvx9gV
— JP Secretariat (@JPSecretariat) September 18, 2021
ޖޭޕީއާއި ދާދިފަހުންވެސް ގިނަ ބަޔަކު ގުޅިފައިވެއެވެ. ނަމަވެސް ޖޭޕީގައި އިސްކޮށް އުޅުއްވި ދަނގެތި ދާއިރާގެ މެންބަރު މުޙައްމަދު ނާޒިމާއި، ތިމަރަފުށީ ދާއިރާގެ މެންބަރު ޢަބްދުﷲ ރިޔާޒް ވަނީ އެޕާޓިން ވަކިވެވަޑައިގެން އައު ސިޔާސީ ޕާޓީއެއް އުފައްދަވާފައެވެ.
ދާދިފަހުން ޖޭޕީން ބޭއްވި ނޫސްވެރިންގެ ބައްދަލުވުމުގައި ޖޭޕީގެ ލީޑަރު ގާސިމް އިބްރާހީމް ވިދާޅުވީ، ޖުމްހޫރީ ޕާޓީއަށް ވުރެ ޑިމޮކްރަޓިކްކޮށް ހުޅުވާލައިގެ ހިންގޭ ޕާޓީއެއް ނޯންނާނެކަމަށެވެ. ޖުމްހޫރީ ޕާޓީއަކީ އަބަދުވެސް ސިޔާސީ ބޭފުޅުންނަށް ފުރުސަތު އޮތް އަދި ސިޔާސީ މަސައްކަތް ކުރެވޭނެ ޕާޓީއެއްކަމަށެވެ.
ޖުމްހޫރީ ޕާޓީއާއި ގުޅޭގޮތުން ޕާޓީން ވަކިވި ބޭފުޅުންނާއި އެހެން ބޭފުޅުން ދައްކަވާ ވާހަތަކަކީ، އެއްވެސް ސަމާލުކަމެއް ދޭ ކަމެއް ނޫންކަމަށެވެ. އަދި މިހާތަނަށް ޖޭޕީން މަސައްކަތްކުރި ހުރިހާ ކޯލިޝަނެއްގައިވެސް ކޯލިޝަނުން ވަކިވެފައިވަނީ ޖޭޕީގެ މައްސަލައަކުން ނޫންކަމަށް ޤާސިމް ވިދާޅުވިއެވެ. އޭނާ ވިދާޅުވީ ޕާޓީ ނިކަމެތިކޮށް ކުރެވޭ މަސައްކަތްތަކަކީ ދުވަހަކުވެސް ކާމިޔާބު ވާނެ މަސައްކަތްތަކެއް ނޫންކަމަށެވެ.
