ރާއްޖޭގެ ހިންގުމަށް ބަދަލުތަކެއް ގެނައި ނަމަވެސް މިހާރުވެސް ކުދި އާބާދީތައް ހިމެނޭ ރަށްރަށުން ޖެހެނީ، އެރަށެއްގެ އަތޮޅު ވެރިކަން ކުރާ ރަށެއްގެ ހޮސްޕިޓަލުގައި ސަލާންޖަހައިގެން ކަންކަން ކުރަން ކަމުގައި ރައްޔިތުންގެ މަޖިލީޙުގެ ކެލާ ދާއިރާގެ މެމްބަރު އިބްރާހިމް ޝަރީފް ވިދާޅުވެއްޖެއެވެ.
ނޮޅިވަރަމްގެ ކޯވިޑް ހާލަތު ގޯސްވެ، ރަށުގައި އެންބިއުލާންސެއް ނެތް މައްސަލާގައި މަޖިލީހަށް ހުށަހެޅި ކުއްލި މައްސަލައަށް ވާހަކަ ދައްކަވަމުން ޝަރީފް ވިދާޅުވީ، މިއަދުވެސް ރާއްޖޭގެ ގިނަ ރަށްތަކެއްގައި ޞިއްޚީ ހިދުމަތް އެކަށީގެންވާ މިންވަރާއި ގާތަށްވެސް ނުދެވޭކަމަށެވެ. ޞިއްޚީ މަރުކަޒުތަކުގައު އެކަށީގެންވާ ވަސީލަތް ނެތުމާއި، މީހުން ނެތުމަކީވެސް އޮތް ބޮޑު ތަކުލީފެއްކަމަށެވެ.
އޭނާ ވިދާޅުވީ ސަރުކާރުން މިހާރުވެސް ރާއްޖޭގެ އެކި ރަށްރަށުގައި ތަރައްޤީގެ ގިނަ މަޝްރޫޢުތަކެއް ހިންގަމުންދާއިރު، ރަށަކަށް ބޭނުންވާ އެމްބިއުލާންސާއި، ޞިއްޚި ވަސީލަތް ފޯރުކޮށް ނުދެވެންޖެހޭ ސަބަބެއް ނެތްކަމަށެވެ. މިލިޔަން ރުފިޔާގެ މަޝްރޫޢު ރަށްރަށުގައި ހިންގަމުންދާއިރު އެމްބިއުލާންސް ނުލިބި އޮތުމަކީ ސަރުކާރަށް ނުވެގެން، ނުވެ އޮތްކަމެއްކަމަށް ގަބޫލު ނުކުރެވޭނެކަމަށް ޝަރީފް ވިދާޅުވިއެވެ.
އޭނާ ވިދާޅުވީ މީގެ ކުރިން ރަށްރަށުން މައި ސަރުކާރުގައި ސަލާނަޖަހަން ޖެހުނު ޖެހުން އޮތީ އަތޮޅު ވެރިކަން ކުރާ ރަށްތަކަށް ސަލާންޖަހަން ޖެހޭ ގޮތަށް ބަދަލުވެފައިވަކަމަށެވެ. ނަމަވެސް މިއީ ރަނގަޅު ގޮތެއް ނޫންކަމަށާއި، ކޮންމެ ރަށަކަށްވެސް ދޭންޖެހޭ ބަޖެޓްދީގެން އެރަށެއްގެ ރަށްޔިތުންގެ ކަންކަން އެރަށަކުން ކުރެވޭނެ އިންތިޒާމު ހަމަޖެއްސުމަށް ޝަރީފް ވަނީ ގޮވާލާފައެވެ.
