މާލެ ސަރަހައްދުގެ ކަރަންޓު ޚިދުމަތް ފޯރުކޮށް ދިނުމުގައި ރެއާއި ދުވާލު އެއްވެސް ވަރުބަލިކަމެއްނެތި، މަސައްކަތް ކުރަމުންދަނީ ސްޓެލްކޯގެ މުވައްޒިފުންނެވެ. ސްޓެލްކޯގެ އެންމެ މުހިންމު އަމާޒަކީ ކަރަންޓުގެ ޚިދުމަތް މެދު ކެނޑުމެއްނެތި ރައްޔިތުންނަށް ލިބޭނެ މަގު ފަހިކުރުމެވެ. ސްޓެލްކޯގެ މިއަމާޒު ހާސިލްކުރުމަށް މިހާރުގެ މެނޭޖްމަންޓުން ރަނގަޅު ޕްލޭނެއްގެ ތެރެއިން ކުރަމުންދިޔަ މަސައްކަތްތަކުގެ ނަތީޖާއާއި ހަމައަށް ދަނީ ވާސިލް ވަމުންނެވެ.
ގްރޭޓަރ މާލެ ގްރިޑް މެދުވެރިކޮށް މާލެއިން ހުޅުމާލެއަށް މިހާރު ކަރަންޓު ފޯރުކޮށްދެވޭނެ:
ގްރޭޓަރ މާލެ ގްރިޑާއެކު ހަކަތައިގެ ސިނާއަތުގެ މުޅިން އައު ހަރުފަތެއް އެކުންފުނިން ވަނީ ގިރާކޮށްފައެވެ. އަދި މި ގްރިޑާއެކު އެކުންފުނިން ދެމުންގެންދާ ޚިދުމަތުގެ ފެންވަރު އިތުރަށް ރަނގަޅުވެ، އެކަމުގެ ފައިދާތައް ރައްޔިތުންނަށް ލިބެމުންދާނެކަމަށް ކުންފުނިން ވަނީ ބުނެފައެވެ.
ގްރިޑް އެނަރޖައިޒްކުރުމުގެ މަސައްކަތުގައި އިސްކޮށް ހަރަކާތްތެރިވެފައިވަނީ ސްޓެލްކޯގެ ޒުވާން ޓެކްނީޝަނުންނާއި އިންޖީނިއަރުންގެ ޓީމެވެ. ސްޓެލްކޯއިން ވަނީ މިފަދަ މަލްޓި މިލިއަން ޑޮލަރުގެ މަޝްރޫއުތަކުގައި އިސްކޮށްތިބެ އެކުންފުނީގެ ޒުވާން ޓީމުން ކުރަމުންދަނީ ފަޚުރުވެރިވާފަދަ ބުރަ މަސައްކަތެއްކަން ފާހަގަކޮށް، ކޯވިޑްގެ ދަތި ހާލަތުގައިވެސް މި މަސައްކަތް ކާމިޔާބުކަމާއެކު، ނިންމާލުމަށްޓަކައި ރެއާއި ދުވާލު މަސައްކަތް ކުރަމުންގެންދާ އެކުންފުނީގެ މުވައްޒަފުންނަށް ޝުކުރު އަދާކޮށްފައެވެ.
ގްރޭޓަރ މާލޭ ގްރިޑް ކަނެކްޝަނަކީ މާލެއާއި، ހުޅުމާލެ އަދި ހުޅުލޭގެ ކަރަންޓު ވިއުގަ 132 ކޭވީ ގެ 7 ކިލޯމީޓަރުގެ ދެ ސާރކިޓްއިން ގުޅާލެވޭ މަޝްރޫޢެކެވެ. އަދި މި މަޝްރޫޢުގައި ހުޅުމާލެ އަދި މާލޭގައި 95 އެމްވީއޭގެ ޖުމްލަ 4 ޓްރާންސްފޯމަރާއި، އަދި ހުޅުލޭގައި 8 އެމްވީއޭގެ 2 ޓްރާންސްފޯމަރު ވަނީ ބަހައްޓާފައެވެ. މި ކަރަންޓު ވިއުގައިން ކޮންމެ ސާރކިޓަކުން 100 މެގަވޮޓްގެ ހަކަތަ ފޮނުވުމުގެ ގާބިލްކަން ލިބިގެންވެއެވެ.
މިގޮތަށް ކަރަންޓު ދިނުމަށް ބޭނުންވާ މައި ކޭބަލް އަޅާފައިވަނީ ސިނަމާލޭ ބްރިޖު ދަށުންނެވެ. ޖުމްލަ 6 ކޭބަލް މެދުވެރިކޮށް މިތިން ސަރަޙައްދުގެ ކަރަންޓު ގުޅާލަން އަޅާފައިވާ އިންޓަރކަނެކްޝަން ކޭބަލަކީ 100 މެގަވޮޓްގެ ކަރަންޓު ފޯރުކޮށްދެވޭނެ ނެޓްވޯކް ކޭބަލެކެވެ.
ކަރަންޓުގެ ޚިދުމަތާއިއެކު، ސްޓެލްކޯއިން އިންޓަނޭޝަނަލް އޮގަނައިޒޭޝަން ފޯ ސްޓެންޑަޑައިޒޭޝަން (އައިއެސްއޯ) ގެ ސްޓޭންޑެޑަށް ދިއުމަށް ކުރި މަސައްކަތުގެ ނަތީޖާއާއި ހަމަވެސް ވަނީ މިދިޔަ މަދު ދުވަސްތަކުގައި ވާސިލްވެފައެވެ.
އައިއެސްއޯ ސަރޓިފިކޭޝަނާއެކު ސްޓެލްކޯ ތާރީހުގެ ތެރެއަށް:
އައި.އެސް.އޯ މިންގަނޑުތަކަކީ ކުންފުނިތަކުން ފޯރުކޮށްދޭ ޚިދުމަތްތަކަކީ، ރަނގަޅު އަދި އެއް ފެންވަރެއްގައި ހިފެހެއްޓިފައިވާ ޙިދުމަތްތަކެއްތޯ ބަލާނެގޮތް ކަނޑައެޅުމުގެގޮތުން އެކުލަވާލާފައިވާ ބައިނަލްއަޤްވާމީ މިންގަނޑުތަކެކެވެ. އައިއެސްއޯ ސްޓެންޑެޑަށް ސަރޓިފައިކޮށްދެނީ އެ ކުންފުންޏަކީ ކޮލިޓީ މެނޭޖްމަންޓް ސިސްޓަމްގައި ފުރިހަމަވާންޖެހޭ ހުރިހާ މިންގަނޑަކަށް ތަބާވެ، އެ މިންގަނޑުތަކަށް އަމަލު ކުރަމުންދާކަން ޔަގީންކޮށްދެވޭ ކުންފުންޏަކަށް ވުމުންނެވެ.
ސްޓެލްކޯގެ ކޮލިޓީ މެނޭޖްމަންޓް ސިސްޓަމްގެ ދަށުން ކަރަންޓު އުފެއްދުމާއި، ކަރަންޓު ފޯރުކޮށްދިނުމުގެ ޙިދުމަތާއި، ކަރަންޓުގެ ޙިދުމަތް ދިނުމަށް ހިންގާ ޕްރޮޖެކްޓްތަކާއި، ފެން އުފެއްދުމާއި، ފުޅީގައި ފެން ބަންދުކުރުމާއި، ނަރުދަމާއާއި، ސްޓެލްކޯ ސޭލްސް ސެންޓަރުން ފޯރުކޮށްދޭ ޙިދުމަތްތަކާއި، ސޯލާ ޕެނަލް ހަރުކުރުމާއި، ވިއްކުން ވަނީ އައިއެސްއޯގެ 9001:2015 މިންގަނޑަށް ސަރޓިފައިކޮށްދީފައެވެ. މިއާއެކު ސްޓެލްކޯވެފައިވަނީ މި ސިނާއަތުގައި ހަރަކާތްތެރިވާ ކުންފުނިތަކުގެ ތެރެއިން މުޅި ކުންފުނީގެ ހުރިހާ ޑިޕާޓްމަންޓްތަކާއި، ޕްރޮސެސްތައް އަދި ޙިދުމަތްތައް ސަރޓިފައިވި ފުރަތަމަ ދިވެހި ކުންފުންޏަށެވެ. މި ސިސްޓަމަށް ސްޓެލްކޯ ސަރޓިފައިކޮށްދީފައިވަނީ އިނގިރޭސިވިލާތުގެ އައިއެސްއޯ ކުއަލިޓީ ސާވިސަސް ލިމިޓެޑުންނެވެ. މިއީ ދުނިޔޭގެ އެންމެ މަޝްހޫރު ކޮލިޓީ މެނޭޖްމަންޓް ސިސްޓަމް ސްޓޭންޑެޑްކަން ފާހަގަކޮށްލެވެއެވެ.
ސްޓެލްކޯ އައިއެސްއޯ ސްޓެންޑެޑަށް ސަރޓިފައި ކުރެވިފައިވާއިރު، އެކުންފުނިން ވަނީ ފާއިތުވެދިޔަ ދެއަހަރުތެރޭ ފާހަގަކޮށްލެވޭ ގިނަ އެވޯޑްތަކެއްވެސް ހޯދާފައެވެ. އެގޮތުން 2019 ވަނަ އަހަރު ސީޖީ އެފޯޓްސް އެވޯޑާއި، ޕަބްލިކް އެންޓަޕްރައިޒް އޮފް ދި އިޔަރގެ އެވޯޑް ލިބިފައިވާއިރު، 2020 ވަނަ އަހަރު ބައިނަލް އަގުވާމީ ދެ އެވޯޑް ކަމަށްވާ، އޭޝިއާސް ބެސްޓް އެމްޕްލޯޔަރ ބްރޭންޑް އެވޯޑްސްގެ ޑުރީމް ކޮމްޕެނީސް ޓު ވޯކްފޯއާއި، ބެސްޓް އެމްޕްލޯޔަރ ބްރޭންޑް އެވޯޑްވެސް ސްޓެލްކޯއަށް ވަނީ ލިބިފައެވެ.
ކުންފުނީގެ ކާމިޔާބު މަސައްކަތްތަކާއިއެކު، މިހާރުގެ މެނޭޖުމަންޓުން ކުރަމުންދިޔަ މަސައްކަތުގެ ނަތީޖާވެސް ބައިނަލް އަގުވާމީ ދުނިޔެއިން ދަނީ ފާހަގަކުރަމުންނެވެ.
އޭޝިޔާގެ ކުންފުނިތަކުގެ އެންމެ ފާހަގަކޮށްލެވޭ ލީޑަރަކަށް ސްޓެލްކޯގެ އެމްޑީ މުޣުނީ:
މުޣްނީއަށް ލިބިފައި ވަނީ 19 ވަނަ އޭޝިޔަން އެޗްއާރް ލީޑަރޝިޕް އެވޯޑްސްގެ "އެގްޒަމްޕްލަރީ ލީޑަރ އޮފް ދަ އިޔަރ" އެވޯޑެވެ. މިއެވޯޑް ސްޓެލްކޯގެ މެނޭޖިންގ ޑިރެކްޓަރަށް ލިބިފައިވަނީ އޭޝިޔާ ސަރަހައްދުގެ ގިނަ ޤައުމުތަކެއްގެ ކުންފުނިތަކުގެ އިސްވެރިންނާއި ތެރެއިން ރޯލް މޮޑެލްއެއްގެ ގޮތުގައި ފާހަގަކުރެވިގެންނެވެ.
މިއެވޯޑަށް މުޣްނީ ހޮވުނީ ސްޓެލްކޯގެ މެނޭޖިންގ ޑިރެކްޓަރުކަމާ ހަވާލުވިފަހުން ކުންފުނީގެ މާލީ ހާލަތު ރަނގަޅުވެ ޕީސީބީން ސަރުކާރު ހިއްސާވާ ކުންފުނިތައް ރޭންކް ކުރާ މިންގަނޑުގެ "އޭ" ކެޓަގަރީއަށް ސްޓެލްކޯ ބަދަލުކުރެވުމާއި، ހަކަތަ އުފެއްދުމަށްޓަކައި ތެލަށް ބަރޯސާވާ މިންވަރު ކުޑަކުރުމަށް އިޔާދަކުރަނިވި ހަކަތައާ ދިމާލަށް ކުންފުނި ގެންދިއުމަށް މުޣުނީގެ ލީޑަރޝިޕްގެ ދަށުން ކޮށްފައިވާ މަސައްކަތްތަކުގެ ސަބަބުންނެވެ. 19 ވަނަ އޭޝިޔަން އެޗްއާރް ލީޑަރޝިޕް އެވޯޑްސްގެ "އެގްޒަމްޕްލަރީ ލީޑަރ އޮފް ދަ އިޔަރ"އަށް މުޣްނީ ހޮވިފައިވާއިރު މިދިޔަ އަހަރު އޭޝިޔާސް ބެސްޓް އެމްޕްލޯޔަރ ބްރޭންޑް އެވޯޑްސްގެ އިމަރޖިން ލީޑަރ އޮފް ދަ އިޔަރ އެވޯޑްވެސް މުޣްނީއަށް ވަނީ ލިބިފައެވެ.
ސްޓެލްކޯއިން މިވީ ދެއަހަރާއި ބައިގެ ތެރޭގައި ބޮޑު ކާމިޔާބީތަކަކާިއ ހަމައަށް ވާސިލް ވެފައިވަނީ ކުރެވިދިޔަ މުހިންމު އަދި ކާމިޔާބް މަސައްކަތްތަކުގެ ތެރެއިންނެވެ. ކުންފުނީގެ މެނޭޖްމަންޓާއި، ޒުވާން ޓީމުން ކުރި މަސައްކަތަކީ މިއަދު ސްޓެލްކޯ ހޯދަމުންދާ ކާމިޔާބުތަކުގެ އެއްސިއްރު ކަމުގައި ކުންފުނީގެ އެމްޑީ މުޢުނީ ފާހަގަކުރައްވައެވެ.
ސަރުކާރުގެ އަސާސީ ޚިދުމަތްތައް ފޯރުކޮށްދޭ މުހިންމު ކުންފުނިތައް، އިދަނުޖެހި، އަދި ދިވެހި މުވައްޒިފުންގެ ފުރިހަމަ ހިއްސާއާއެކު ހިންގުމަކީ މިސަރުކާރުގެވެސް ވަރަށް މުހިންމު އަމާޒެކެވެ. މިއަމާޒަށް ވާސިލް، އާންމު ރައްޔިތުންނަށް ކަރަންޓު ފޯރުކޮށްދިނުންފަދަ މުހިންމު މަސައްކަތެއް ކާމިޔާބު ކަމާއެކު ހިންގުން ވެގެންދާނީ، ރާއްޖޭގެ އެންމެ އާބާދީ ބޮޑު ސަރަހައްދު ކަމުގައިވާ، މާލެ، ހުޅުމާލެ އަދި ވިލިމާލޭގައި ދިއިއުޅެމުންދާ އެތައްހާސް ރައްޔިތުންނަށް ލިބިގެންދާނެ ވަރަށް ހިންހަމަޖެހުމަކަށްކަން ޔަގީނެވެ.
ހަމައެއާއެކު، ކޯވިޑް ކާރިސާގެ ތެރޭގައިވެސް، ކަރަންޓު ބިލް ދެއްކުމުގައި ރައްޔިތުންނަށް ކުރިމަތިވެގެން ދިޔަ ބޮޑެތި ދަތިތަކަށް ލުއި ހޯދާ ދިނުމުގައި ސްޓެލްކޯގެ މެނޭޖްމަންޓުން ގިނަގުނަ ލުއިތަކެއް ހޯދާދީ، މި މުހިންމު އަސާސީ ޚިދުމަތް ފޯރުކޮށްދިނުމުގައި ރައްޔިތުންގެ އިތުބާރު ގާއިމް ކުރުމަށް ކުރަމުންދާ މަސައްކަތްތައް ފާހަގަ ކޮށްލެވެ.
އެހެންކަމުން، ވަކީ ޚާއްސަކޮށް އަސާސީ ޚިދުމަތްތައް ފޯރުކޮށް ދިނުމުގައި، ދައުލަތުގެ އެސްއޯއީތައް، ދިވެހިން ފުރިހަމަ ހިއްސާގައި، ފައިދާވެސް ވާ، އަދި ޚިދުމަތްވެސް ކާމިޔާބު ކަމާއެކޮ ފޯރުކޮށް ދިނުމުގެ މޮޑެލްގައި ސްޓެލްކޯއިން ފާއިތުވެދިޔަ ތަނުގައި ސްޓެލްކޯގެ މެނޭޖްމަންޓާއި، އެކުންފުނީގެ އެމްޑީ އަދި މުވައްޒަފުން ދައްކުވައިދީފައިވަނީ ދައުލަތުގެ އެހެން ކުންފުނިތަކުންވެސް ބަލައިގަތުން ރަގަޅު ނަމޫނާއެކެވެ.
