ކައިވެނީގެ ހާދިޔާއެއްގެ ގޮތުގައި ދޭ ބައެއް ތަކެތި ހަނދާނުގައި ހުންނާނެއެވެ. ހާއްސަކޮށް ދޭ އެންމެ އަގުބޮޑު އެއްޗެއްސެވެ. މިއީވެސް އެފަދަ އަގުބޮޑު ހަދިޔާއެއް ލިބުނު ދެމަފިރިއެކެވެ. އިންޑިއާގެ ޓަމިލް ނެޑޫއަށް ނިސްބަތްވާ މި ދެމަފިރިންނަށް ކައިވެނީގެ ހަދިޔާއަށް ލިބުނީ ފިޔާތަކެކެވެ.
މި ހާދިޔާ އެ މީހުންނަށް ލިބުނު މި ދުވަސްވަރަކީ ޓަމިލް ނެޑޫގައި ފިޔާ ވަރަށް ބޮޑަށް އަގުބޮޑުވެފައިވާ ދުވަސްވަރެކެވެ. ޝީބާ ސުވިތާ އާއި ސެންތިލް ކުމާރްގެ ކައިވެނީގެ ހަފްލާގައި އެ މީހުންގެ ރަހުމަތްތެރިންގެ ފަރާތުން އެ މީހުންނަށް ލިބުނީ ފިޔާ ބޮކޭ އެކެވެ. އެ ބޮކޭއަށް ބަލާފައި އޭގައި ހުރީ ފިޔާހެންވެސް ހީނުވާނެއެވެ. އެހާވެސް ރަނގަޅަށް މާބޮޑިއެއްހެން އޮތީ އެ ޕެކްކޮށްފައެވެ.
އެ ބޮކޭ އެ މީހުންނަށް ދީފައި ވަނީ އެ ކައިވެނީގެ ހަފްލާގެ ކަންކަން ކުރިއަށްގެންދަން ރޭވި އެ މީހުންގެ ރަހުމަތްތެރިންނެވެ. ޝީބާގެ ރަހުމަތްތެރިއަކު ދަ ހިންދޫއަށް ބުނީ، އެ މީހުން ގަތީ ތިން ކިލޯގެ ފިޔާއެއް ކަމަށާއި، ކޮންމެ ކިލޯއެއްގެ އަގު 125 ރުޕީސްއަށް އަރާ ކަމަށެވެ.
އަހަރުމެން ފިޔާ ގަތީ ފިހާރައަކުން، ގަނެފައި ޕެކްކޮށްފައި ގޮސް ހަދިޔާ ކުރީ.
– އޭނާ ބުނެފައި ވެއެވެ.
އެ ހަދިޔާ ފުރަތަމަ ފެނުމުން ދެމަފިރިންނަށް ހީވީ އެއީ މާބޮޑިއެއް ކަމަށެވެ. ނަމަވެސް ފަހުން އެ މީހުންނަށްވެސް އެއީ ފިޔާކަން އެނގުނެވެ. އަދި އެކަމާއި ވަރަށް މަޖާ ކުރި ކަމަށް ވެއެވެ. ދެމަފިރިން ވަނީ އެ ހަދިޔާއަކީ އެ މީހުންގެ ކައިވެނީގެ ހަފްލާގައި ލިބުނު ރަނގަޅު ހަދިޔާއެއް ކަމަށް ބުނެފައެވެ.
