ތާރީޚުގައިވެސް ފުރަތަމަ ފަހަރަަށް، މަސްޖިދުއްނަބަވީ އާއި އަދި މަސްޖިދުލް ޙަރަމްގެ އިސް ދެމަގާމަކަށް ދެ އަންހެން ބޭފުޅަކު އައްޔަން ކޮށްފިއެވެ.

ސައުދީ އަރަބިއާގެ ޖެނެރަލް ޕްރެޒިޑެންޒީ ފޮރ ދަ އެފެއާޒް އޮފް ޓޫ ހޯލީ މޮސްކްސް (ދެ ޙަރަމްގެ ހުރިހާ ކަންކަމެއް ބެލެއްޓުމާއި ހަވާލުވެފައިވާ އިދާރާ) އިން ހާމަ ކޮށްފައިވާ ގޮތުގައި އެއިދާރާއިންވަނީ، ފުރަތަމަ ފަހަރަށް އެ އިދާރާގެ އެންމެ އިސް މަގާމުގެ ތެރެއިން ދެ މަގާމަކަށް ދެ އަންހެން ބޭފުޅަކު އައްޔަން ކޮށްފައެވެ.

މިހަފްތާގެ އަދީއްތަ ދުވަހު، ޑރ. އަބުއްރަހުމާން އަލް-ސޫދައިސް އިއުލާން ކުރައްވާފައިވާ ގޮތުގައި، އޭނާގެ ނާއިބުންގެ ގޮތުގައި އައްޔަން ކޮށްފައިވާ ދެ އަންހެން ބޭފުޅުންނަކީ ޑރ. އަލް-އަނައުދު އަލް-އަބައުދު އާޢީ ޑރ. ފާތިމާ އަލް-ރަޝޫދު އެވެ. އަދި މީގެ އިތުރުންވެސް އޭނާވަނީ އިސް އެހެން ބައެއް މަގާމްތަކަށްވެސް އިތުރު އަންހެން ބޭފުޅުން ހަމަޖައްސާފައެވެ.

ދެހަރަމްގެ އެންމެ އިސް ބައެއް މަގާމްތަކުގެ ތެރެއިން މިހާރު އަންހެން ބޭފުޅުން ހަމަޖައްސަވާފައިވާ މަގާމްތަކުގެ ތެރޭގައި ޖެނެރަލް ޕްރެޒިޑެންޓްގެ ނާއިބުންގެ މަގާމްގެ އިތުރުން ތަރައްގީއާއި ގުޅުންހުރި އެހެން ދާއިރާތަކުން އެސިސްޓެންޓް އޭޖެންޓުންގެ މަގާމްތައްވެސް ހިމެނެއެވެ.

ޑރ. އަލް-ރަޝޫދު ހަމަޖައްސަވާފައިވަނީ، ޕްރެޒިޑެންޓް ފޯރ ވިމެންސް އެފެއާޒްގެ ނާއިބުގެ މަގާމްގެ އިތުރުން ޖެނެރަލް ޕްރެޒިޑެންޓްގެ އެޑްވައިޒަރުގެ މަގާމަށެވެ. ޑރ. އަލް-އަބޫދު ހަމަޖައްސަވާފައިވަނީ، ޖެނެރަލް ޕްރެޒިޑެންޓް ފޯރ ވިމެންސް ޑިވެލޮޕްމަންޓް އެފެއާރޒްގެ ނާއިބުގެ މަގާމަށެވެ.

ދެޙަރަމްގެ ޕްރެޒިޑެންސީއިން ވަނީ ކުރިޔަށް އޮތްތަނުގައި އެކިއެކި މަގާތަކުގައި މަސައްކަތް ކުރާނެ ސައުދީގެ 320 އަންހެން ބޭފުޅުން ތަމްރީނު ކުރުމަށްޓަކާ "ހައްޔާކު"ގެ ނަމުގައި ޚާއްސަ ތަމްރީން ޕްރޮގްރާމެއްވެސް ލޯންޗު ކުރައްވާފައެވެ. މި ތަމްރީނު ޕްރޮގްރާމްގެ ބޭނުމަކީ، މާތްވެގެންވާ ދެ މިސްކިތުގައި މަސައްކަތްކުރާ އަންހެން މުވައްޒަފުންގެ ފެންވަރު މަތިކުރުމެވެ.

ފާއިތުވި އޮގަސްޓުމަހު، ދެހަރަމްގެ ކަންކަން ބެލެހެއްޓުމާ ހަވާލުވެ ހުންނަވާ ޖެނެރަލް ޕްރެޒިޑެންސީއިން ވަނީ، އިސް މަގާމްތަކުގައި ހިމެނޭ 10 މަގާމަކަށްވެސް އަންހެން ބޭފުޅުން ހަމަޖައްސަވާފައެވެ. އޭރު ޕްރެޒިޑެންސީން ހާމަ ކޮށްފައިވަނީ، އަންހެން ލީޑަރުން އިސްމަގާމްތަކަށް އައްޔަން ކޮށްފައިވަނީ އަލް-ސައުދީގެ އެންގެވުމެގެ މަތިން، "ދެ މިސްކިތުގެ މަސައްކަތްތަކަށް އިތުރު ކުރިއެރުން ގެނައުމާއި އަދި ގާބިލް މީހުން އުފެއްދުމަށް" ކަމަށެވެ.

މައްކާ އަދި މަދީނާގައި ހުންނަ މާތްވެގެންވާ ދެމިސްކިތުގެ ކަންކަން ބެލެހެއްޓުމުގެ ޒިންމާ ހަވާލުވެފައިވާ މުވައްސަސާއިން ހާމަ ކޮށްފައިވާ ގޮތުގައި، އެ އޮފީހުގެ، އެޑްވައިޒަރީ، ޑިވެލޮޕްމެންޓަލް، އެޑްމިނިސްޓްރޭޓިވް، ލިންގުއިސްޓިކްސް، އިންޖިނިއަރިންގ، ސުޕަރވައިސަރީ އަދި ދުވަހުން ދުވަހަށް ފޯރުކޮށްދެންޖެހޭ ޚިދުމަތްތަކާ ގުޅުންހުރި ގިނަ މަގާމްތަކަށްވެސް ވަނީ މުވައްޒަފުން ހަމަޖައްސާފައެވެ.