ރައްޔިތުންގެ މަޖިލީހުގެ ސަލާމަތީ ޚިިދުމަތްތަކުގެ ކޮމިޓީ (241) ކޮމިޓީއަށް، މަރުކޮމިޝަންގެ ކުރީގެ ރައީސް ހުސްނުއް ސުޢޫދު ދީފައިވާ މަޢުލޫމާތުން، މަރުކޮމިޝަނަށް ރައީސް ޔާމީން ޙާޒިރުކުރަންޖެހޭ އެއްވެސް ސަބަބެއް ނޯންނާނެކަމަށް ފަރެސްމާތޮޑާ ދާއިރާގެ މެންބަރު މުޙައްމަދު ޙުސައިން ލަޠީފް (ސެމްބެ) ވިދާޅުވެއްޖެއެވެ.
ނޫސްވެރިޔާ އަހުމަދު ރިޟުވާނު ޢަބުދުﷲ ގެއްލުވާލި މައްސަލާގައި ކުރީގެ ރައީސް އަބްދުﷲ ޔާމީން އަބްދުލް ޤައްޔޫމް ގެއްލިފައިވާ މީހުންނާއި މަރުތައް ބަލާ ކޮމިޝަނަށް ހާޒިރުވުމަށް ވަނީ އަންގާފައެވެ. މަރުކޮމިޝަންގެ މެމްބަރަކު ވިދާޅުވީ ރައީސް ޔާމީން ކޮމިޝަނަށް ހާޒިރުވުމަށް ދަންނަވާފައިވަނީ މ.ޝަނިންސްޓަރ އަހުމަދު ރިޞުވާން އަބްދުﷲ ގެއްލުވާލި މައްސަލާގައި ކޮމިޝަނުން ކުރަމުންދާ ތަހުގީގުގައި ސުވާލު ކުރުމަށްކަމަށެވެ. ރައީސް ޔާމީން ހާޒިރު ކުރުމަށް ހަމަޖެހިފައިވަނީ މާދަމާއެވެ.
މިކަމާއި ގުޅިގެން މެންބަރު މުޙައްމަދު ޙުސައިން ލަޠީފް ވިދާޅުވީ، މަރުކޮމިޝަންގެ ކުރީގެ ރައީސް ހުސްނުއް ސުޢޫދު، 241 ކޮމިޓީއަށް ރިޟްވާން މައްސަލާގައި ދީފައިވާ މަޢުލޫމާތަށް ބަލާއިރު، ރައީސް ޔާމީން މަރުކޮމިޝަނަށް ހާޒިރުކުރަންޖެހޭނެ އެއްވެސް ސަބަބެއް ނޯންނާނެކަމަށެވެ. ކުއްލިއަކަށް އެފަދަ ނިންމުމެއް އެކޮމިޝަނުން ނިންމާ ރައީސް ޔާމީން ޙާޒިރުކުރުމުން، އިތުރަށް ސަރުކާރުގެ ނާގާބިލުކަމާއި، މުއައްސަސާތަކަށް ނުފޫޒު ފޯރުވާ މިންވަރު ވަރަށް ބޮޑަށް ހާމަވެގެންދާކަމަށްވެސް އޭނާ ވިދާޅުވިއެވެ.
ރައީސް ޔާމީނަށް ދެވޭ އަނިޔާތަކަކީ މުޅި ޤައުމަށް ދެވޭ އަނިޔާތަކެއް. ޤައުމުގައި ސުލްހަމަސަލަސްކަން ޤާއިމްކުރުމަށް މިއަދުގެ ކޯލިޝަން ވެރިން ބޭނުންވަނަމަ އަނިޔާވެރިކަން ހުއްޓާލުމަށް ގޮވާލަން.
– މެންބަރު މުޙައްމަދު ޙުސައިން ލަޠީފް
— Hussain Mohamed Latheef (@HucenSembe) August 1, 2021
މަރުކޮމިޝަނަށް ރައްޔިތުން ކުރާ އިތުބާރު ގެއްލި، ކޮމިޝަނާއި މެދު ރައްޔިތުން ސުވާލު އުފެއްދުމުން އައްޑަނައަކާށް ރައީސް ޔާމީން ހައްދަވާފައިވާކަމަށް ރައީސް ޔާމީންގެ ޤާނޫނީ ވަކީލް އަދި ކުރީގެ ނާއިބް ރައީސް ޑރ.މުހައްމަދު ޖަމީލް އަހުމަދުވެސް ވަނީ ވިދާޅުވެފައެވެ.
ރައީސް ޞާލިހު އުފެއްދެވި ރިޔާސީ ކޮމިޝަންތަކުން މިހާތަނަށް މާބޮޑު ނަތީޖާއެއް ނެރެވިފައިނުވާއިރު، ކޮމިޝަން އުވާލުމަށް މަޖިލިސް ރައީސް މުހައްމަދު ނަޝީދާއި، މަޖިލީހުގެ އެމްޑީޕީއަށް ނިސްބަތްވާ މެމްބަރުންވަނީ ގޮވާލާފައެވެ. އަދި ކޮމިޝަނަކީ ހަމައެކަނި މުސާރަނަގާ ކޮމިޝަނެއްކަމަށް މެމްބަރުން ވަނީ ވިދާޅުވެފައެވެ.
މަރުކޮމިޝަންގެ ކުރީގެ ރައީސް ހުސްނުއް ސުޢޫދު ދީފައިވާ މަޢުލޫމާތުން، މަރުކޮމިޝަނަށް ރައީސް ޔާމީން ޙާޒިރުކުރަންޖެހޭ އެއްވެސް ސަބަބެއް ނޯންނާނެކަމަށް މެންބަރު މުޙައްމަދު ޙުސައިން ލަޠީފް ވިދާލުވެފައިވާއިރު، ހުސްނުއްސުުޢޫދު މިހާރު ވަނީ ސުޕްރީމް ކޯޓުގެ ފަނޑިޔާރުކަމަށް އައްޔަންކުރައްވާފައެވެ.
