ރައްޔިތުންގެ މަޖިލީހުގެ ރައީސް، މުހައްމަދު ނަޝީދަށް ދިން ނުރައްކާތެރި ޓެރަރިސްޓް ހަމަލާއަށްފަހު ހަމަލާދިން ރެއިން ފެށިގެން ރާއްޖޭގައި އޮންނަންޖެހޭނި ކުއްލި ނުރައްކަލުގެ ހާލަތު އިއުލާން ކުރެވިފައިކަމަށް ކުރީގެ ހޯމް މިނިސްޓަރ އަދި ރައްޔިތުންގެ މަޖިލީހުގެ ވިލިފުށި ދާއިރާގެ މެމްބަރު ޙަސަން އަފީފް ވިދާޅުވެއްޖެއެވެ.

އެމްޑީޕީން އުފައްދާފައިވާ "މެއި ހައެއް" ކޮމެޓީގެ ޗެއަރޕާސަންގެ މަޤާމުވެސް ފުރުއްވާ ހަސަން އަފީފް އެމްޑީޕީގެ ޤައުމީ މަޖިލީހުގައި ވާހަކަ ދައްކަވަމުން ވިދާޅުވެފައިވަނީ 2019 ވަނަ އަހަރުން ފެށިގެން 10 ފަހަރެއްގެ މަތީން ރައީސް ނަޝީދު މަރާލަން ހަރުކަށި ފިކުރަށް ނިސްބަތްވާ މީހުން އުޅެފައިވާކަން މަޖިލީހުން އެކުލަވާލި އިންކުއަރީން ހާމަވާކަމީ ނުހަނު ކަންބޮޑުވާ ކަމެއްކަމަށެވެ. ތަކުރާރުކޮށް އެތައް ފަހަރަކު މަރުގެ ހަމަލާގެ އިންޓަލިޖެންސް ލިބިފައިވާއިރުވެސް ކަމާއިބެހޭ ފަރާތްތަކުން އެކަށީގެންވާ ފިޔަވަޅު ނޭޅި އޮތްކަމީ މިއަދު ފެންނަން އޮތް ހަގީގަތްކަމަށް އަފީފް ވިދާޅުވިއެވެ.

އޭނާ ވިދާޅުވީ ހަރުކަށި ހައްދު ފަހަނަ އަޅާފައިވާ ފިކުރުގެ މީހުންނަކީ ދިވެހި ދައުލަތާއި، ދިވެހި ފައިސާއާއި، ދިވެހިންގެ މި މުޖުތަމައު ގަބޫލު ނުކުރާބަޔަކަށްވާއިރު އެމީހުން ރާއްޖޭގައި އުޅެންޖެހޭ އެއްވެސް ސަބަބެއް ނެތްކަމަށެވެ. އޭނާ ވިދާޅުވީ މިމީހުންގެ މަސައްކަތް މުޅި ރާއްޖޭގައި އިންތިހާއަށް ފުޅާކޮށްފައިވާއިރު، މިކަމާއި ދެކޮޅަށް ކުރަންޖެހޭ މަސައްކަތް ކުރުމަށް ފުލުހުންނަށް ފުރުސަތު ދޭންޖެހޭކަމަށެވެ.

މިކަން ހުއްޓުވެން ޖެހޭ. މިިކަމުގެ ނުރައްކާ އޮތީ މުޅި މުޖުތަމަށް. މިދައުލަތަކީ ނަހަލާލު ދައުލަތެއްކަމަށް އެމީހުންބުނޭ. އެމީހުން ކީއްކުރަން މިތާ މިއުޅެނީ، މިތަން ގަބޫލު ނުކުރަންޏާ މިތަނުންދޭ. މިއީ ދީން އެގިގެން އުޅޭބައެއްނޫން. އިސްލާމްދީނުގައި ނޯވޭ މީހުން މެރުމެއް، މަރަން ގޮވުމެއް. މިމީހުން ކުރާކަމަކީ ސައްހަ ކަމެއްކަން ދެއްކުމަށް ދީން މިބޭނުންކުރަނީ. މިމީހުން މިކުރަނީ ދީނަށް ފުރައްސާރަ.

– ހަސަން އަފީފް ވިދާޅުވިއެވެ.

ހަސަން އަފީފް ވިދާޅުވީ ހަރުކަށި ފިކުރުގެ މީހުން ހިންގަމުންދާ ޣައިރު ޤާނޫނީ އަމަލުތައް ހުއްޓުވެންޖެހޭކަމަށެވެ. މިފަދަ މީހުންގެ ކިބައިން މުޅި ރާއްޖެ ސަލާމަތް ކުރެވޭނީ އެކަށީގެންވާ ފިޔަވަޅު އެޅިގެން ކަމަށާއި، އެކަމަށް ސަރުކާރުން ޖާގަ ދޭންޖެހޭކަމަށެވެ. އަދި ރައީސް ނަޝީދު ހުށަހެޅުއްވި ގޮތަށް ރާއްޖޭގައި ކުއްލި ނުރައްކަލުގެ ހާލަތު އިއުލާންކޮށް މިފަދަ ފިކުރުގެ މީހުން ހިފާ ހައްޔަރު ކުރުމަށް ޖާގަ ދިނުމަށް އަފީފްވަނީ ރައީސް ޞާލިހުއަސް ގޮވާލާފައެވެ.

އޭނާ ވިދާނީ ހަރުކަށި ފިކުރުގެ މީހުން ރައީސް ނަޝީދަށް ހަމަލާދިން ރޭ ވަގުތުން ވަގުތަށް ކުއްލި ހާލަތު އިއުލާން ކުރެވެންޖެހޭކަމަށެވެ. އަދި އެރޭ ވަގުތުން ކުއްލި ހާލަތު އިއުލާންކޮށް ހަރުކަށި ފިޔަވަޅު އަޅުމަށް ފުލުހުންނަށް ޖާގަ ދޭންވެސް ޖެހޭކަމަށެވެ.

ރާއްޖޭގައި ކުއްލި ނުރައްކާ އިއުލާންކޮށް ހަރުކަށި ފިކުރައް ނިސްބަތްވާ މީހުން ހައްޔަރު ކުރުމަށް ސަރުކާރަށް ގޮވާލައި، އެމްޑީޕީގެ ޤައުމީ މަޖިލީހުގެ ބައްދަލުވުމަށް ޤަރާރު ހުށަހައްޅުއްވަމުން ރައީސް ނަޝިދު ވިދާޅުވީ މިއީ ދިވެހި ފުލުހުންނަށް ހަރުކަށި ފިކުރު މީހުން ހައްޔަރު ކުރަން ޖާގަދޭންވީ ވަގުތުކަމަށެވެ. ދުނިޔޭގެ ކުރިއަރާފައިވާ ޑިމޮކްރަސީގައާއި، އަދި ހައްދު ފަހަނައަޅާ ދިޔަ ޤައުމުތަކުގައިވެސް ކަންކަން ބޮއްސުން ލައިގެން ގޮސްފައިވަނީ މިގޮތަށް ފެށޭ ކަންކަން ހުއްޓުމަށް އެކަށީގެންވާ މަސައްކަތް ނުކުރުންކަމަށެވެ. ނަމަވެސް މިއަދު ދިވެހި ރާއްޖެ އޮތް ހާލަތު ދިވެހި ފުލުހުންނަށް ސާފުވެ، ހަރުކަށި މީހުންނަކީ ކޮބައިކަން އެނގޭއިރު، އެމީހުން ހިފާ ހައްޔަރު ކުރުމަކީ ރާއްޖޭގެ މުސްތަގުބަލަށްޓަކައިވެސް ކުރަންޖެހޭ ކަމެއްކަމަށް ރައީސް ނަޝީދު ވިދާޅުވިއެވެ.

ރައީސް ނަޝީދު ވިދާޅުވީ މިހާލަތުގައި، ހަރުކަށި ފިކުރާއި ދެކޮޅަށް އެކަށީގެންވާ މަސައްކަތް ނުކުރެވިއްޖެނަމަ، ހީވެސް ނުކުރާ ހާލަތަކަށް ރާއްޖެ ގޮސްދާނެކަމަށެވެ. އަދި ކުރިއަށް އޮތް ތަނުގައި ރާއްޖޭގެ މުސްތަގުބަލަށް މިކަމުން ނޭދޭވޭ ބޮޑެތި އަސަރުތައް ކުރާނެކަމަށް ރައީސް ނަޝީދު ވިދާޅުވިއެވެ.