އެމްޑީޕީގެ ތެރޭގައި މިހާރު އޮތް ބައިބައި ވުންތަކާއި ގުޅިގެން، އުފެދިފައިވާ ޚިޔާލު ތަފާތުވުންތަކުގައި ރައީސް ޞާލިހުއާއި އެހާބޮޑަށް ގުޅުން ގޯސްވެދާނެކަމަށް ނުބަލާ ކަމުގައި އެމްޑީޕީގެ ރައީސް މުހައްމަދު ނަޝީދު ވިދާޅުވެއްޖެއެވެ.

ނަޝީދު އަވަހަރާކޮށްލަން މެއި 6 ގައި ދިން ބޮމުގެ ހަމަލާގައި ލިބުނު ޒަހަމްތަކަށް ފަރުވާ ހޯއްދަވަން މިހާރު އިނގިރޭސިވިލާތުގައި ހުންނެވި ނަޝީދު އިންޑިއާގެ "ވިއޯން" ޓިވީ އަށް ދެއްވި އިންޓަވިއުއެއްގައި ވިދާޅުވީ ރައީސް އިބްރާހިމް މުހައްމަދު ސޯލިހާ މެދު އުޅެނީ ފިކުރީ ގޮތުން ހިޔާލު ތަފާތުވުމެއް ކަމަށާއި ހަރުކަށި ފިކުރުގެ މީހުން ރުއްސަން މަސައްކަތްކުރުން ރައީސް ހުއްޓާލަންޖެހޭ ކަމަށް ނަޝީދު ވިދާޅުވިއެވެ.

އަޅުގަނޑުމެންގެ ޕާޓީ އޮންނާނީ އެއްބައިވަންތަކަމުގައި. އަޅުގަނޑަކަށް ނުފެނޭ ރައީސްއާ ވެސް އެހާ ބޮޑަށް ގުޅުން ގޯސްވާނެ ކަމަކަށް.

– ނަޝީދު ވިދާޅުވިއެވެ.

ރައީސް ނަޝީދު ވިދާޅުވެފައި ވަނީ، ދީނީ ހަރުކަށި ފިކުރުގެ މީހުންގެ ރުހުން ހޯއްދަވަން ރައީސް މަސައްކަތް ކުރައްވާ ކަމަށެވެ. އެކަން ހުއްޓާލަން ޖެހޭ ކަމަށް ނަޝީދު ވިދާޅުވިއެވެ. ރައީސް ނަޝީދުގެ މި ތުހުމަތަކީ ވެރިކަން ކުރާ ކޯލިޝަންގައި ހިމެނޭ އަދާލަތު ޕާޓީން ބުނާ ބަސްތަކަށް ރައީސް ތާއީދު ކުރައްވާތީ ވިދާޅުވި ވިދާޅުވުމެއްކަމަށް ބެލެވެއެވެ.

ނަޝީދު ވިދާޅުވެފައި ވަނީ، ދީނީ ހަރުކަށި ފިކުރުގެ މީހުންގެ ރުހުން ހޯއްދަވަން ރައީސް މަސައްކަތް ކުރައްވާ ކަމަށެވެ. އެކަން ހުއްޓާލަން ޖެހޭ ކަމަށް ނަޝީދު ވިދާޅުވި އެވެ.

އަޅުގަނޑު ގަބޫލުކުރަނީ ރައީސް އަޅުގަނޑުމެން ގަބޫލުކުރާ އިސްލާމް ދީނުގެ މެދުމިނަށް އަނބުރާ ވަޑައިގެން ދީނީ ހަރުކަށި ފިކުރުގެ މީހުން ރުއްސަން އުޅުން ހުއްޓާލުން.

– ނަޝީދު ވިދާޅުވިއެވެ.

ސަރުކާރުގެ ފަރާތުން މަޖިލީހަށް ހުށަހަޅާފައިވާ ނަފްރަތުގެ ބިލަށް މިސަރުކާރުން ތާއީދު ނުކުރާނަމަ، މިސަރުކާރަށް ތާއީދު ނުކުރާނެ ކަމަށް ނަޝީދު ވަނީ ވިދާޅުވެފައެވެ. އަދި އިދިކޮޅު ޕީޕީއެމްއާއި އެކު ކޯލިޝަން ހަދައި ގުޅުން ގާއިމް ކުރުމަކީ އެމްޑީޕީއަށް އޮތް އެންމެ ރަނގަޅު ގޮތްކަމަށްވެސް ނަޝީދު ވަނީ ވިދާޅުވެފައެވެ.

ޕީޕީއެމް އާއެކު މަސައްކަތް ކުރައްވާނަންތޯ، އިންޓަވިއުގައި ސުވާލު ކުރުމުން ނަޝީދު ވިދާޅުވެފައި ވަނީ، އެ ޕާޓީއާ އެކު ވެސް މަސައްކަތްކުރައްވަން ތައްޔާރު ކަމަށާއި ނަމަވެސް އޭގެ މާނަ އަކީ ޕީޕީއެމްގެ ސީދާ ވަކި މީހަކާ އެކު މަސައްކަތް ކުރެއްވުން ނޫން ކަމަށެވެ. ބޭނުންފުޅު ވަނީ ގައުމާ މެދު އެއް ވިސްނުމެއް ތިބި މީހުންނާ އެކު މަސައްކަތްކުރައްވަން ކަމަށް ވިދާޅުވިއެވެ.

މުސްލިމަކާ ދިމާއަށް ކާފަރެކޭ ބުނުން ކުށަކަށް ހަދަން ސަރުކާރުގެ ފަރާތުން ތުޅާދޫ ދާއިރާގެ މެމްބަރު ހިސާން ހުސައިން ގާނޫނުލްއުގޫބާތަށް އިސްލާހު ގެނައުމަށް ހުށަހަޅާފައިވާ ހިސާން ބިލު މަޖިލީހުގެ ނިމިގެންދިޔަ ދައުރުގެ ތެރޭގައި ފާސްކުރުމަށް މަސައްކަތްކުރި ނަމަވެސް ސަރުކާރުން މިބިލް އަލުން ކޮމެޓީއަށް ފޮނުވައިގެން ގިނަ އިސްލާހުތަކެއް ގެނައުމަށް ބޭނުންވުމުން ބިލު ވަނީ އަލުން ކޮމެޓީއަކަށް ފޮނުވާފައެވެ. މިބިލުގެ މައްސަލާގައި އެމްޑީޕީގެ މެމްބަރުންގެ މެދުގައި ދަނީ ހޫނު ބަހުގެ ހަމަލާތައް ބަދަލުކުރަމުންނެވެ. އަދި މިބިލާއިކު މަޖިލީހުގައި ރައީސް ނަޝީދަށް ތާއީދު ކުރާ މެމްބަރުންނާއި، ރައީސް ޞާލިހަށް ތާއީދު ކުރާ މެމްބަރުން ވަނީ ވަރަށް ބޮޑަށް ސާފުވެފައެވެ.