ނިމިދިޔަ ލޯކަލް ކައުންސިލް އިންތިޚާބުގައި، ވެރިކަން ކުރާ މައިޕާޓީ އެމްޑީޕީއަށް ނާކާމިޔާބީއާއި ކުރިމަތިވީ ސަރުކާރުގެ ސަބަބުން ކަމުގައި އެމްޑީޕީގެ ރައީސް މުހައްމަދު ނަޝީދު ވިދާޅުވެއްޖެއެވެ.
އިންޑިއާގެ "ވިއޯން ނިއުސް"އަށް ދެއްވި އިންޓަވިއުގައި މާލެސިޓީ ކައުންސިލް އިންތިހާބު ނާކާމިޔާބުވުމާ ގުޅޭގޮތުން ސުވާލު ކުރުމުންނެވެ. ރައީސް ނަޝީދު އިތުރަށް ވިދާޅުވީ، މާލެސިޓީ ކައުންސިން އިންތިހާބު އެމްޑީޕީއަށް ނާކާމިޔާބުވީ އެމްޑީޕީގެ ސަޕޯޓަރުން ވޯޓުލާން ނުނިކުތުމުން ކަމަށާއި، އަދި އެ ރައްޔިތުން ވޯޓުލާން ނުނިކުތީ އެ ރައްޔިތުން ގަބޫލުކުރާ ގޮތްތަކާއި އެ ރައްޔިތުންގެ ވިސްނުންތަކާ ދުރަށް ސަރުކާރުން ޖެހުމުން ކަމަށެވެ.
ސަރުކާރުން އަމަލުކުރަމުން އަންނަގޮތް ބަދަލުކޮށް އެމްޑީޕީގެ ސިޔާސަތުތައް އަދި ޤަބޫލުކުރާ ހަމަތަކަށް ރުޖޫއަވާންޖެހޭކަމަށް ވެސް އެމަނިކުފާނު ވިދާޅުވިއެވެ. މާލެސިޓީ ކައުންސިލް އެމްޑީޕީއަށް ގެއްލުނީ ސަރުކާރުގެ އިހުމާލުންކަމަށް ރައީސް ނަޝީދު ސީދާ ތުހުމަތުކުރެއްވި މިއީ ފުރަތަމަ ފަހަރުކަން ވެސް ފާހަގަ ކޮށްލެވެއެވެ. އެމްޑީޕީން ސުޕަ މެޖޯރިޓީ ނަގަމުން އައި މާލެސިޓީ ކައުންސިލްގެ ސުޕަ މެޖޯރިޓީ މިފަހަރު މުޅިން އަލަށް ނަގާފައިވަނީ އިދިކޮޅު ޕީޕީއެމުންނެވެ.
ލޯކަލް ކައުންސިލް އިންތިޚާބާއި އަންހެނުންގެ ތަރައްޤީއަށް މަސައްކަތްކުރާ ކޮމިޓީތަކުގެ އިންތިޚާބުގައި 3،814 ކެނޑިޑޭޓުން ވާދަކުރިއެވެ. އޭގެ ތެރޭގައި ހިމެނެނީ ލޯކަލް ކައުންސިލް އިންތިޚާބުގައި ވާދަކުރި 2234 ކެނޑިޑޭޓުންނާއި އަންހެނުންގެ ތަރައްޤީއަށް މަސައްކަތްކުރާ ކޮމިޓީތަކުގެ އިންތިޚާބުގައި ވާދަކުރި 1580 ކެނޑިޑޭޓުންނެވެ. ދެ އިންތިޚާބުގައި 1912 މަޤާމަށް ބޭފުޅުން ވަނީ އިންތިޚާބުކޮށްފައެވެ.
ލޯކަލް ކައުންސިލް އިންތިޚާބުން އެންމެ ގިނަ ގޮނޑި ކާމިޔާބުކުރީ ވެރިކަން ކުރާ މައި ޕާޓީ އެމްޑީޕީންނެވެ. އެގޮތުން އެމްޑީީޕީން 400 ގޮނޑި ކާމިޔާބުކޮށްފައިވާއިރު، އިދިކޮޅު ޕްރޮގްރެސިވް ކޯލިޝަނުން ކާމިޔާބު ކުރީ 325 ގޮނޑިއެވެ.
