އަދާލަތު ޕާޓީން ސަރުކާރު ހިސޯރުކޮށް ޑިމޮކްރަސީގެ ބާރު ކަނޑުވާލައިފައިވާ ކަމަށް ވިދާޅުވެ ރައްޔިތުންގެ މަޖިލީހުގެ ރައީސް، އަދި އެމްޑީޕީގެ ރައީސް މުހައްމަދު ނަޝީދު ދައްކަވާފައިވާ ވާހަކަތައް އަދާލަތު ޕާޓީން ދޮގުކޮށްފި އެވެ.
ރައީސް ނަޝީދު އިއްޔެ އިނގިރޭސި ބަހުން ނެރުއްވި ބަޔާނުގައި ވިދާޅުވީ ސަރުކާރު ހިންގެވުމުގައި، އެންމެ ބޮޑު ނުފޫޒެއް މިއަދު އޮތްތަން ފެންނަނީ ކޯލިޝަންގެ އެންމެ ކުޑަ ޕާޓީ އަދާލަތު ޕާޓީއަށް ކަމުގައެވެ. ރާއްޖޭގެ ރައްޔިތުންގެ ސާފު އައުލަބިއްޔަތު ރައީސް ޞާލިހު ވެރިކަމަށް ގެނައީ ޚިޔާލު ފާޅު ކުރުމުގެ މިނިވަންކަމާއި، އިޤްތިޞާދީ ހަމަޖެހުމާއި، ދީނީ ގޮތުން މެދު މިނުގެ ސިޔާސަތުގައި ދެމިތިބުމަށް ކަމަށް ރައީސް ނަޝީދު ވިދާޅުވިއެވެ. ނަމަވެސް މިއަދު ފެނިގެންދަނީ މިކަންކަން ނެތި، ޑިމޮކްރަސީގެ އަސާސްތައް މުގުރިގެންދާ މަންޒަރުކަމަށް ރައީސް ނަޝީދުގެ ބަޔާނުގައި ވިދާޅުވިއެވެ.
ރައީސް ނަޝީދުގެ މި ބަޔާނާ ގުޅިގެން އަދާލަތުން ރޭ ވަނީ އިނގިރޭސި ބަހުން ބަޔާނެއް ނެރެފަ އެވެ. އަދާލަތުން މިކަންތައް ބައިނަލްއަގުވާމީ ސަމާލުކަމަށް ގެނައުމަށް ނެރުނު ބަޔާނުގައި، ރައީސް ނަޝީދުގެ ވާހަކަތައް ސިފަކުރީ ގާނޫނީ ގޮތުންނާއި ޑިމޮކްރަސީގެ ތެރެއިން އެކުލަވާލައިފައި އޮތް ސަރުކާރެއްގެ ބާރު ކަނޑުވާލުމަށް ދެއްކެވި ވާހަކަތަކެއްގެ ގޮތުގަ އެވެ.
އެގޮތުން އެޕާޓިން ބުނީ ރައީސް ނަޝީދު މަސައްކަތް ކުރައްވަނީ ސިޔާސީ މަގުސަދުތަކެއް ހާސިލު ކުރުމަށް ކަމަށެވެ. އަދި އެކަން ހާސިލުކުރަށް ބައެއް މައްސަލަތަކަކީ ގައުމީ މައްސަލަތަކެއްގެ ގޮތުގައި ނަގައި ނިވާފަތްގަނޑަކަށް ހަދައިފައިވާ ކަމަށެވެ.
އަދާލަތު ޕާޓީއަކީ ހަރުކަށި ފިކުރަށް ތާއީދުކުރާ ޕާޓީއެއް ކަމަށް ދެކެވޭ ވާހަކަތަކަށް ރައްދުދީ އެ ޕާޓީން ބުނީ ރައީސް އިބްރާހީމް މުޙައްމަދު ޞާލިހް ހަރުކަށި ފިކުރާ ދެކޮޅަށް ކުރައްވަމުން ގެންދަވާ މަސައްކަތަކަށް އަބަދުވެސް އެއްބާރުލުން ދޭނެ ކަމަށާއި އަދުގެ ސަރުކާރަކީ ހަރުކަށި ފިކުރު ނައްތާލުމަކީ އެންމެ މުހިންމު ކަންތައް ކަމަށް ދެކިގަތް ފުރަތަމަ ސަރުކާރު ކަަމަށެެވެ.
މީގެ އިތުރުން ދީނީ ހަރުކަށިފިކުރެކޭ އެއްގޮތަށް ސިޔާސީ ހަރުކަށި ފިކުރާ ދެކޮޅަށް ކުރާ މަސައްކަތުގައިވެސް ރައްޔިތުން ސާބިތުވެ ތިބުމަށް އަދާލަތު ޕާޓިން ވަނީ އިލްތިމާސްކޮށްފަ އެވެ.
"ޕާޓީ އުފެއްދި މަގުސަދުތައް ހާސިލުކުރަން މަސައްކަތް ކުރުމުގައި ދެމިތިބޭނަން. އަދި މަދު ބަޔަކު ކުރާ ފުރައްސާރަޔާ ބިރަކަށް ނުސިހޭނެ"
– އަދާލަތު ޕާޓީ
އަދާލަތު ޕާޓީގެ ބަޔާނުގައި ބުނެފައި ވަނީ އަދުގެ ސަރުކާރު ގެނައުމަށް ދިވެހީން ވޯޓު ދިނީ އިންސާފާއި ސުލްހައަށާއި އަދި ކޮަރަޕްޝަނާ ދެކޮޅަށް ކަމަށެވެ. އަދި ދިވެހިންނަކީ ހަރުކަށި ފިކުރުގެ މީހުންކަމަށް ސިފަކުރައްވަން ރައީސް ނަޝީދުގެ ބަޔާނުގައި މަސައްކަތްކުރައްވާފައި ވާކަމަށާއި އެކަން ހަރުކަށި އިބާރާތުން ކުއްވެރިކުރާ ކަމަށް އަދާލަތު ޕާޓީގެ ބަޔާނުގައި ވަނީ ބުނެފަ އެވެ.
ސަރުކާރުން މަޖިލީހަށް ހުށަހެޅުއްވި ނަފްރަތު ބިލާއި އެންމެ ބޮޑަށް ދެކޮޅުހަދާ ޕާޓީއަކީ ވެރިކަން ކުރާ ކޯލިޝަންގެ އަދާލު ޕާޓީއެވެ. ނަޝީދުގެ ބަޔާނުގައި މައިގަނޑުގޮތެއްގައި ވަނީ މި ބިލާއި ދެކޮޅަށް އަދާލަތުން ކުރިއަށްގެންދާ މަސައްކަތްތަކުގެ ސަބަބުން ސަރުކާރުން ހުށަހެޅި ސަރުކާރުގެ އަމިއްލަ ބިލަކަށް ސަރުކާރުން ތާޢީދު ނުކުރާ ދަރަޖައަށް ގޮސްފައިވާކަމަށް ބުނެ އަދާލަތު ޕާޓީއަށް ވަރަށްބޮޑަށް ފާޑުވިދާޅުވެފަ އެވެ.
