އިންޑިއާގެ ބާރުގެ ދަށުގައިވާ ކަޝްމީރުގެ ޖައްމު ސިޓީގައި ހުންނަ އެގައުމުގެ ވައިގެ ދިފާއީ ވައިގެ މަރުކަޒަކަށް ޑްރޯންގެ ދެ ހަމަލާއެއް ދިނުމާއި ގުޅިގެން އިންޑިއާގެ ސަލާމަތީ އިދާރާތަކުން މި ހަމަލާ ތަހުގީގު ކުރަން ފަށައިފިއެވެ.
"މަދަނީ މުވައްސަސާތަކުގެ އެހީތެރިކަމާއެކު، މިހަމަލާގެ ތަހުގީގުތައް މިހާރު ދަނީ ކުރިޔަށް،" އިންޑިއާގެ އެއަރފޯސްއިން އާދީއްތަ ދުވަހު ޓުވީޓު ކޮށްފައި ވެއެވެ.
އަދި އެއަރފޯރސްއިން ބުނެފައިވަނީ، ދީފައިވާ ޑްރޯންގެ ދެ ހަމަލާއިން އެއް ހަމަލާ އަމާޒުވެފައިވަނީ، ވައިގެ މަރުކަޒުގައި ހުރި އިމާރާތެއްގެ ފުރާޅަށް ކަމަށާއި އަދި އަނެއް ޑްރޯން ވެއްޓިފައިވަނީ، ހުސްކޮށް އޮތް ސަރަހައްދަކަށް ކަމަށެވެ.
"އެއްވެސް އެއްޗަކަށް ގެއްލުމެއް ލިބިފައެއް ނުވޭ،" އިންޑިއާ އެއަރފޯރސްގެ ޓުވީޓުގައި ބުނެފައި ވެއެވެ.
ހޮނިހިރު ދުވަހުގެ ރޭ މެންދަމު 1:30އާއި 2:00 އާއި ދެމެދު ދީފައިވާ މި ޑްރޯން ހަމަލާތަކުގެ ސަބަބުން ދެމީހަކަށް އަނިޔާވެ، އަދި އިމާރާތަށް ބައެއް ގެއްލުންތައް ލިބިފައިވާ ކަމަށް ބައެއް އޮފިޝަލުން ރޮއިޓާސްއަށް މައުލޫމާތު ދީފައި ވެއެވެ.
އަދި އޮފިޝަލުން ބުނެފައިވަނީ، މި ޑްރޯންތައް ގޮއްވާލާފައިވަނީ، އިންޑިއާ ޕާކިސްތާންގެ ކަޝްމީރު ބޯޑަރުގެ އެންމެ 14 ކިލޯ މީޓަރު ދުރުގައި ކަމަށް ވުމާއެކު، އަދި މިއީ އިންޑިއާގެ އަމާޒަކަށް ހަމަލާ ދިނުމަށް ޑްރޯންއެއްގެ ބޭނުން ކޮށްފައިވާ ފުރަތަމަ ފަހަރު ކަމަށް ވުމާއެކު، މި ސަރަހައްދުގެ ސަލާމަތީ ހާލަތާއި ގުޅޭގޮތުން ވަނީ ބޮޑެތި ކަންބޮޑުވުންތަކެއް މިހާރު އުފެދިފައެވެ.
މި ސަރަހައްދުން ފަހުން، ކުރޫޑް ބޮމެއްވެސް ފެނިފައިވާ ކަމަށް، އިންޑިއާގެ ބާރުގެ ދަށުގައިވާ ކަޝްމީރު ސަރަހައްދުގެ ޕޮލިސް ޗީފް ދިލްބާހު ސިންގ ވިދާޅުވެފައި ވެއެވެ.
އޭނާ ތުހުމަތު ކުރިގޮތުގައި، މި ހަމަލާތަކަކީ، ކަޝްމީރު ސަރަހައްދު މިނިވަން ކުރުމަށް، ނުވަތަ ޕާކިސްތާނުގެ ބާރުގެ ދަށަށް މިސަރަހައްދު ގެންދިއުމަށް ހަގުރާމަކުރާ ހަގުރާމަވެރި ޖަމާއަތްތަކުގެ ހަމަލާތަކެކެވެ.
ޖައްމޫ ކަޝްމީރުގެ ސަރަހައްދަކީ، އިންޑިއާ އަދި ޕާކިސްތާނުންވެސް ދެގައުމަށް ނިސްބަތްވާކަމަށް ދައުވާ ކުރާ ސަރަހައްދެކެވެ. އެހެންނަމަވެސް، މި ސަރަހައްދު އޮންނަނީ ދެގައުމުގެ ދެމެދުގައި ބެހިފައެވެ.
