އިންޑިއާގެ އޮޑިޝާގައި އުމުރުން 42 އަހަރުގެ މީހަކު ސައިކަލް އެއްޗެހި ވިއްކަ ޝޯވރޫމަކަށް ގޮސް ސްޕޯޓްސް ސައިކަލެއް ގަތުމަށް، ގެއިން ތައްޔާރުކޮށްގެން ގެންދިޔަ ފައިސާ ނޫޓްތައް ދިނީ ނޭނގިދާނެ ކަމަށް ނިންމާފައެވެ. ނަމަވެސް ކަންވީ އެހެނެއް ނޫނެވެ. އެތަނުގައި މަސައްކަތް ކުރާ ސްޓާފުންނަށް އެކަން ފަޅާ އެރިއެވެ. ވަގުތުން ފުލުހުންނަށް ގޫޅާ އޭނާ ހައްޔަރު ކުރިއެވެ.
މީޑިއާ ރިޕޯޓްތައް ބުނާގޮތުގައި، ދިބްޔަރަންޖަން ހޮޓާ ނަމަކަށް ކިޔާ އެ މީހާ ސައިކަލު ޝޯވރޫމަށް ގޮސް ނަގަން ބޭނުންވީވެސް މޮޅު ސްޕޯޓްސް ބައިކް އެކެވެ. އޭގެ އަގު 130،000 ރުޕީސްއަށް އަރައެވެ. އޭނާ އެ ސައިކަލު ނަގާކަން ކަށަވަރުކޮށްދިނުމުން، އެކަމުގައި ކުރަން ޖެހޭ ހުރިހާ މަސައްކަތް ނިންމާލިއެވެ. އަދި ސައިކަލު އޭނާއާ ހަވާލު ކުރާ ހިސާބަށް ސޭލްސްގެ މަސައްކަތް ދިޔައެވެ.
އަދި އެތަނުގެ ސްޓާފަކު އޭނާ ކައިރީގައި ފައިސާ ދައްކާނީ ކޮން ގޮތަކަށްތޯ އެހުމުން "ކޭޝް"ކޮށް ކަމަށްވެސް ބުންޏެވެ. މީޑިއާތަކަށް މައުލޫމާތު ދެމުން ފުލުހުންގެ އޮފިޝަލަކު ބުނީ، އެ މީހާ އެތަނުގެ ސްޓާފުންގެ އަތަށް ދިޔައީ ގެއިން ހަދައިގެން ގެންދިޔަ 130،000 ރުޕީސް ކަމަށެވެ. އަދި އޭގައި ވަގު ނޫޓޫގެ ގޮތުގައި ފާހަގަވެފައި ވަނީ 500 ރުޕީސްގެ ނޫޓްތައް ކަމަށްވެސް ބުންޏެވެ.
އެ ފައިސާތައް ސްޓާފާއި ހަވާލު ކުރުމުން، އެއީ ސައްހަ ފައިސާއެއް ނޫންކަން އޭނާއަށް ކަށަވަރުވިއެވެ. އަދި ވަގުތުން އެކަން ފުލުހުންގެ ސަމާލު ކަމަށް ގެނައެވެ. ފުލުހުން ބުނީ، އެ ފައިސާގެ ތެރެއިން ރަނގަޅު ނޫޓްތަކެއްގެ ގޮތުގައި ފާހަގަކުރެވުނީ 5000 ރުޕީސް ކަމަށެވެ. އަދި ފުލުހުންނަށް ލިބުނު އެ މައުލޫމާތާއެކު ހޮޓާ ކުއްޔަށް ހިފައިގެން އުޅޭ ގެއަށް ގޮސް ބެލުމުން އެ ގެއިން ފުލުހުން ވަނީ ކޮމްޕިޔުޓަރަކާއި ޕްރިންޓަރަކާއި، ޕްރިންޓްކޮށްފައި ހުރި ނޫޓްތައް ފެނިފައެވެ. އަދި ފައިސާ ތައްޔާރު ކުރުމަށް ބޭނުންވާ އެހެނިހެން ސާމާނާވެސް ފެނިފައި ވެއެވެ.
އޭނާ އެ މައްސަލާފައި ހައްޔަރުކޮށްފައިވާއިރު، އެފަދަ މައްސަލައެއްގައި ހައްޔަރު ކުރާ މީހެއްގެ މައްޗަށް ކުށް ސާބިތުވެއްޖެ ނަމަ 14 އަހަރުގެ ޖަލު ހުކުމެއް އަންނާނެ ކަމަށް އިންޑިއާގެ ޕީނަލް ކޯޑްގައި ބަޔާންކޮށްފައި ވެއެވެ.
