އިސްރާއީލުގެ ކުރީގެ ބޮޑުވަޒީރު ނަތަންޔާހޫގެ ވެރިކަން ނިމުމަކަށް ގެނައުމަށް، އެގައުމުގެ އިދިކޮޅު 8 ޕާޓީއަކުން އެކުވެގެން އުފެއްދި ކޯލިޝަންގެ ފަރާތުން ބޮޑުވަޒީރުކަމަށް ވަޑައިގެންނެވި ނަފްތާލީ ބެނެޓއާއެކީ، އުފެއްދުންތެރި ގުޅުމެއް ބާއްވަން ބޭނުންވާކަން ރަޝިއާއިން ހާމަ ކޮށްފިއެވެ.
ރަޝިއާއިން މިކަމަށް ޝައުގުވެރިކަން ފާޅު ކޮށްފައިވަނީ، އެގައުމުގެ އާ ބޮޑުވަޒީރަށް ފޮނުއްވި މަރުހަބާ މެސެޖެއްގައެވެ.
"އަހަރެން އުއްމީދުކުރަނީ، އާ ބޮޑުވަޒީރުގެ ސަރުކާރާއެކީ، ބައިލެޓްރަލް ޖުރިހާ ގުޅުންތަކެއްވެސް ހުރިހާ މާނައެއްގައިވެސް ބަދަހި ކުރުން" މަރުހަބާ ވިދާޅުވެ ޕުޓިން އިސްރާއީލުގެ ބޮޑުވަޒީރަށް ފޮނުވާފައިވާ، ކްރެމްލިންއިން އާންމުކޮށްފައިވާ ލިޔުމުގައި ބަޔާން ކޮށްފައި ވެއެވެ.
"އެއްވެސް ޝައްކެއް ނެތް ގޮތުގައި، މި ގުޅުމަކީ އަހަރެމެންގެ ގައުމުގެ ރައްޔިތުންނަށް ވަރަށް މުހިންމު ގުޅުމަކަށް ވެގެންދާނެ،" ޕުޓިންގެ މެސެޖުގައި ލިޔުއްވާފައި ވެއެވެ.
އިސްރާއީލުގެ އާ ބިޑުވަޒީރަކީ ކަނާތު ފިޔައިގެ، އިސްރާއީލަށް އުފަން ޔަހޫދީއެކެވެ. އަދި އޭނާއަކީ ކުރީގެ ޓެކް މިލިއަނަރެއްވެސްމެއެވެ.
އިސްރާއީލުގައި މި ހެދި ކޯލިޝަންގެ ސަބަބުން، ނަތަންޔާހޫގެ 12 އަހަރުވީ ވެރިކަން ވަނީ ނިމުމަކަށް އައިސްފައެވެ.
އުމުރުން 71 އަހަރުގެ ނަތަންޔާހޫގެ ދައުރުގައި އޭނާވަނީ ރަޝިއާގެ ޕުޓިންއާއެކު ވަރަށް ރަގަޅު ގުލުމެއް ގާއިމް ކޮށްފައެވެ. އަދި އޭނާވަނީ ވަރަށް ގިނައިން ރަޝީއާއަށް ދަރުވެސް ކޮށްފައެވެ.
