އިންޑިއާއައި ކޯވިޑް19ގެ ދެވަނަ ރާޅުގައި، އެގައުމުގެ ސިއްހީ ދާއިރާގައި މަސައްކަތް ކުރަމުންދިޔަ 719 ޑޮކްޓަރަކު މަރުވެފައިވާކަމަށް، އިންޑިއަން މެޑިކަލް އެސޯސިއޭޝަން (އައިއެމްއޭ)އިން ބުނެފިއެވެ.
މިގޮތުން އެންމެ ގިނައަދެއްގެ ޑޮކްޓަރުން މަރުވެފައިވަނީ އެގައުމުގެ ބިހާރު ސްޓޭޓުގައެވެ. އެ ސްޓޭޓުގައި 111 ޑޮކްޓަރުން މަރުވެފައިވައިރު ދެވަނައަށް އެންމެ ގިނަ ޑޮކްޓަރުން މަރުވެފައިވަނީ، ވެރިރަށް ނިއު ދިއްލީންނެވެ. މި ސިޓީގައި 109 ޑޮކްޓަރަކު މަރުވެފައިވާއިރު، ރެކޯޑްތަކުން ދައްކާގޮތުގައި އިންޑިއާގެ 26 ސްޓޭޓެއްގައި ވަނީ މަސައްކަތް ކުރަމުންދިޔަ ގިނަ އަދަދެއްގެ ޑޮކްޓަރުން ކޯވިޑް ބަލީގައި މަރުވެފައެވެ.
އިންޑިއާގައި ކޯވިޑްބަލީގައި މަރުވެފައިވާ ޑޮކްޓަރުންގެ ތެރޭގައި އުމުރުން ދުވަސްވީ ވަރަށް ތަޖުރިބާހުރި ޑޮކްޓަރުންވެސް ހިމެނޭއިރު، އުމުރުން 20 އަހަރުގައި އަލަށް ޚިދުމަތަށް ނުކުމެފައިވާ ޑޮކްޓަރުންވެސް ހިމެނެއެވެ.
އިންޑިއަން މެޑިކަލް އެސޯސިއޭޝަންއިން ކުރިން ހާމަ ކޮށްފައިވާގޮތުގައި، ފާއިތުވި މާރޗްމަހުން ފެށިގެން މޭމަހުގެ ނިޔަލަށް އިންޑިއާގެ 515 އާންމު ބަލިތަކާބެހޭ ޑޮކްޓަރުން (ފިޒީޝަނުން) ވަނީ މަރުވެފައެވެ. އަދި މި އެސޯސިއޭޝަނުންވަނީ މިހުރިހާ ޑޮކްޓަރުން ނަމާއި ފޮޓޯ އަދި ވަނަވަރުވެސް އާންމު ކޮށްފއެވެ.
މި އެސޯސިއޭޝަނުން ހާމަކޮށްފައިވާ ގޮތުގައި، 2020ވަނަ އަހަރު، ކޯވިޑް19 އަށް ޕޮޒިޓިވް ވެގެން އިންޑިއާގައި 748 ޑޮކްޓަރަކު މަރުވެފައި ވެއެވެ.
މިއަހަރުގެ އެޕްރިލްމަހު، އިންޑިއާއަށް އައިސްފައިވާ ކޯވިޑް19ގެ ދެވަނަ ރާޅަށްފަހު، އިންޑިއާގެ އެތައް ސަތޭކަ ޑޮކްޓަރުންނަކާއި، ނަރުހުންނާއި އަދި ސިއްޙީ އެހީތެރިންވަނީ މިބައްޔަށް ޕޮޒިޓިވް، މަސައްކަތް ނުކުރެވޭ ހާލަތުގައި ކަރަންޓީން ވާން ޖެހިފައެވެ.
ނަތީޖާއެއްގެ ގޮތުން، އިންޑިއާގެ ސިއްޙީ ދާއިރާއަށް ބާރުބޮޑުވެ، އިންސާލީ ވަސީލަތްތަކަށް އިންތިހާއަށް ވަނީ ބޭނުންޖެހިފައެވެ.
އިންޑިއާގައި މިހާތަނަށް 29.3 މިލިއަން މީހުން ކޯވިޑް19އަށް ޕޮޒިޓިވް ވެފައިވާއިރު، 368،000 އަށްވުރެ ގިނަ މީހުންވަނީ މިބަލީގައި މަރުވެ ގޮސްފައެވެ. އަދި 27.8 މިލިއަން މީހުން ބަލިން ރަގަޅުވެފައި ވެއެވެ.
2019 ވަނ އަހަރުގެ ޑިސެމްބަރުމަހު އެންމެ ފުރަތަމައަށް ޗައިނާއިން މިބަލި ފެނުނުފަހުން މިހާތަނަށް މުޅި ދުނިޔެއިން 175 މިލިއަން މީހުން ކޯވިޑް19އަށް ޕޮޒިޓިވްވެ 3.78 މިލިއަން މީހުންވަނީ މިބަލީގައި މަރުވެފައެވެ.
