ބްލައިންޑް ޑޭޓަށް ދިޔުމަކީ އާއްމު ކަމެކެވެ. މިފަދަ ޑޭޓްތަކަށް ދާއިރު ބައެއް މީހުން އާއިލާ ގެންދާ ފަހަރުވެސް އާދެއެވެ. ހާއްސަކޮށް އަންހެންވެރިން "ޑޭޓް"އަށް އާއިލާ މީހުން ގެންދެއެވެ. ބޭނުމަކީ އޭނާ ޓެސްޓު ކޮށްލުމެއެވެ.
މިގޮތަށް ޓެސްޓަކަށް ޗައިނާއަށް ނިސްބަތްވާ އަންހެނަކު މި ދިޔައީ އޭނާގެ އާއިލާ 23 މީހަކު ގޮވައިގެންނެވެ. އަސްލު އެ ޑޭޓަކީ ދެ މީހުންނަށް ހާއްސަކޮށް ޕްލޭން ކުރި ޑޭޓެކެވެ. ނަމަވެސް،އެކަން ދިޔައީ އެ އަންހެން މީހާ ބޭނުންވި ގޮތަކަށް ނޫނެވެ. އެ ޑޭޓަށް ގޮސް ކެއި އެއްޗެހީގެ ބިލަށް 3000 ޑޮލަރު އެރިއެވެ. އެންމެ ފަހުން އޭނާ ޑޭޓަށް ދިޔަ ފިރިހެން މީހާ ވަނީ އެތަނުން ފިލާފައެވެ.
މީޑިއާ ރިޕޯޓްތައް ބުނާގޮތުގައި، ޒެއިޖެންގއަށް ނިސްބަތްވާ އެ އަންހެން މީހާ ޑޭޓަށް ގޮސްފައި ވަނީ އުމުރުން 29 އަހަރުގެ ލުއި ނަމަކަށް ކިޔާ ފިރިހެނަކާއެވެ. އަދި އެ ޑޭޓަކީ ފިރިހެން މީހާގެ މަންމަ ސެޓް ކުރި ޑޭޓެކެވެ. އެއީ އޭނާ ހުސްހަށިބައިކޮށް ހުންނާތީ އެވެ. އަދި އެ ޑޭޓަށް ލިއު ރެސްޓޯރެންޓަށް ދިޔައިރު، އެތަނުގައި ތިބި މީހުންގެ އަދަދު ބަލާފައި އޭނާއަށްވެސް ލިބުނީ ޝޮކެކެވެ. އެއީ އެ އަންހެން މީހާގެ އާއިލާ މީހުން އެ ޑޭޓަށް އަންނާނެ ކަމަށް އޭނާ ހީވެސް ނުކުރެއެވެ.
އެ އަންހެން މީހާ މީޑިއާތަކަށް މައުލޫމާތުދެމުން ބުނީ، އޭނާ ބޭނުންވީ ލިއު ޓެސްޓު ކުރަން ކަމަށާއި، އަދި އެހާ ގިނަ މީހުން އެ ޑޭޓަށް ގެންދަން ބޭނުންވީ، އެވަރަށް އޭނާގެ އަތުގައި ފައިސާ ހުރިތޯ ބެލުމަށް ކަމަށެވެ. ނަމަވެސް ލިއު ވަނީ އެތަނުން ފިލާފައެވެ. އަދި ފަހުން އެ ބިލް ދައްކަން ޖެހުނީ އެ އަންހެން މީހާ ކަމަށް ވެއެވެ.
