ނޭޕާލުގެ ރައީސް ބިދުޔާ ދެވި ބަންދަރި އެގައުމުގެ ގާނޫނު ހަދާ މަޖިލިސް އުވާލާ، އަންނަ ނޮވެމްބަރުމަހު އާ އިންތިޚަބު ބާއްވާ ގޮތަށް ހަމަޖެއްސުމާއި ގުޅިގެން އެގައުމުގެ ސިޔާސީ މަސްރަހު ހޫނު ވެއްޖެއެވެ.
ނޭޕާލުގެ ސިޔާސީ މަސްރަހު ހޫނުވެފައިވަނީ، ކޯވިޑް19ގެ ހާލަތުވެސް އިންތިހާއަށް ގޯސްވެފައި ވަނިކޮށެވެ.
ހޮނިހިރު ދުވަހު، ކުއްލި ހައިރާންކަމެއްގެ ގޮތުގައި ނޭޕާލުގެ ރައީސް އާންމު ކުރެއްވި ބަޔާނުގައި ބުނެފައިވަނީ، އާ ސަރުކާރެއް އެކުލަވާލުމަށް ފާއިތުވެދިޔަ ހުކުރު ދުވަހާ ހަމައަށް ދީފައި އޮތް މުއްދަތުގައި މިހާރުގެ ވަގުތީ ރައީސް ކެޕީ ޝަރުމާ އޮލިއަށްވެސް އަދި އިދިކޮޅު ލީޑަރ ބަހާދުރު ދެއުބާއަށްވެސް މެޖޯރިޓީގެ ސަރުކާރެއް އެކުލަވާ ލެވިފައި ނުވާކަމަށެވެ.
"ރައީސް ވަނީ ހައުސް އޮފް ރެޕްރެސެންޓޭޓިވްސް އުވާލުމަށްފަހު، އާންމު އިންތިޚާބުފެ ފުރަތަމަ ބުރު ނޮވެމްބަރ މަހުގެ 12 ވަނަ ދުވަހު، އަދި ދެވަނަ ބުރު ނޮވެމްބަރު މަހުގެ 19 ވަނަ ދުވަހު ބޭއްވުމަށް ހަމަޖައްސާފަ،" ރޭގަޑުގެ ދަންވަރުގެ ވަގުތުގައި ނޭޕާލުގެ ރައީސްގެ ފަރާތުން އާންމު ކުރައްވާފައިވާ ބަޔާނުގައި ބުނެފައި ވެއެވެ.
މި ބަޔާނުގައި ބުނެފައިވަނީ، މި ނިންމުން ނިންމާފައިވަނީ، ވަގުތީ ބޮޑުވަޒީރު އޮލިގެ ކެބިނެޓްގެ ލަފަޔާއެކު ކަމަށެވެ. މިހާރުގެ ވަގުތީ ބޮޑުވަޒީރު އޮލި ވަނީ 2020 ވަނަ އަހަރު ޑިސެމްބަރު މަހުވެސް އެގައުމުގެ ގާނޫނު ހަދާ މަޖިލިސް އުވާލަން ނިންމާފައެވެ. އެހެންނަމަވެސް އޭނާ އެނިންމުމަށްފަހު ނޭޕާލުގައި ބޮޑެތި މުޒާހިރާތަކެއް ކުރިޔަށް ގޮސްފައި ވެއެވެ. އަދި ސުޕްރީމް ކޯޓުންވަނީ އޭނާގެ އެ ނިންމުމަކީ ގާނޫނު އަސާސީއާއި ޚިލާފް ނިންމުމެއް ކަމުގައި ކަނޑައަޅާފައެވެ.
ނޭޕާލުގެ ރައީސްގެ މި ނިންމުމާމެދު އެގައުމުގެ ސިޔާސީ ޕާޓީތަކުން ދެކޭ ގޮތެއް އަދި ހާމަކޮށްފައެއް ނުވެއެވެ.
ނޭޕާލުން މިހާރުދަނީ، ކޯވިޑް19 ޕެންޑަމިކްގެ ދެވަ ރާޅަކާއި ކުރިމަތި ލަމުންނެވެ. އަދި މިހާރު އެގައުމުގައި ދުވާލަކަށް އެވްރެޖްކޮށް 8,207 މީހުން ކޯވިޑް19އަށް ދަނީ ޕޮޒިޓިވް ވަމުންނެވެ.
